Te Tusi a Ioane 10:1-42

  • Tausi mamoe mo lulu mamoe (1-21)

    • Iesu ko te tausi mamoe ‵lei (11-15)

    • “E isi foki ne aku nisi mamoe” (16)

  • Ko fakafesagai atu te kau Iutaia ki a Iesu i te ‵Kaiga Fiafia o te Tukuatuga (22-39)

    • Ne ita fitifiti a tino Iutaia e tokouke ke tali‵tonu (24-26)

    • “E faka‵logo aku mamoe ki toku leo” (27)

    • E ‵kau fakatasi te Tama mo te Tamana (30, 38)

  • Ne tali‵tonu a tino e tokouke i te suā feitu o te Iolitana (40-42)

10  “Au e fai ‵tonu atu ki a koutou, a te tino telā e se ulu atu ki te lulu mamoe i te mataloa kae e kake aka i se isi koga, a te tino tenā se tino kaisoa kae ‵fao mea.+  Kae ko te tino telā e ulu atu i te mataloa ko te tausi mamoe o te lafu mamoe.+  E ‵tala ne te tino tausi mataloa a te mataloa ki te tino tenei,+ kae e faka‵logo a mamoe ki tena leo.+ E kalaga atu a ia ki ana mamoe i olotou igoa, takitaki ei ne ia a latou ki tua.  Kafai ko oti ne aumai ne ia ana mamoe katoa ki tua, ko mua ei a ia i a latou, kae e tau‵tali atu a mamoe i a ia, me e iloa ne latou a tena leo.  E se mafai o tau‵tali atu latou i se tino fakaa‵tea kae ka ‵tele latou kea‵tea mai i a ia, me e se iloa ne latou a leo o tino fakaa‵tea.”  Ne fai atu ne Iesu a te tala fakatusa tenei ki a latou, kae ne seki iloa ne latou a pati kolā ne fai atu ne ia ki a latou.  Ne toe faipati atu a Iesu ki a latou, “Au e fai ‵tonu atu ki a koutou, au ko te mataloa o mamoe.+  A tino katoa kolā ne o‵mai kae fakaaoga ‵se ne latou toku igoa ne tino kai‵soa kae ‵fao mea; kae ne seki faka‵logo a mamoe ki a latou.  Au ko te mataloa; so se tino e ulu mai e auala i a au ka sao, kae ka ulu a ia ki loto kae fano ki tua kae ka maua ne ia a koga e uke a mouku i ei.+ 10  A te tino kaisoa e vau fua o kaisoa, o tamate, kae fakamasei.+ Au ne vau ko te mea ke maua ne latou a te ola kae ke katoatoa. 11  Au ko te tausi mamoe ‵lei;+ e tuku atu ne te tausi mamoe ‵lei a tena ola mō ana mamoe.+ 12  Kafai e lavea ne te tagata faigaluega telā e sē se tausi mamoe kae e se i a ia foki a mamoe, a te kuli vao ko vau, e tiakina ne ia a mamoe kae tele kea‵tea—ko puke ei ne te kuli vao a mamoe ko mafuta valevale ei latou— 13  i te mea i a ia se tino faigaluega fua kae e se alofa ki mamoe. 14  Au ko te tausi mamoe ‵lei. E iloa ne au aku mamoe kae e iloa foki ne aku mamoe a au,+ 15  e pelā eiloa mo au e iloa ne te Tamana kae e iloa foki ne au a te Tamana;+ e tuku atu ne au toku ola mō aku mamoe.+ 16  “Kae e isi foki ne aku nisi mamoe, kolā e se ‵tu i te lulu tenei;+ e ‵tau foki o aumai ne au a latou ki loto, kae ka faka‵logo latou ki toku leo, kae ka fai latou mo lafu mamoe e tasi, mo te tausi mamoe e tokotasi.+ 17  Tenei te pogai e alofa mai ei te Tamana ki a au,+ me e tuku atu ne au toku ola,+ ko te mea ke toe maua ne au. 18  E seai se tino ne ave ne ia kea‵tea te ola mai i a au, kae ko au eiloa ne tuku atu ne au. E isi saku pule ke tuku atu, kae e isi foki saku pule ke toe maua ne au.+ Ne maua ne au te fakatonuga tenei mai toku Tamana.” 19  Ne toe vaelua foki a tino Iutaia+ ona ko pati konei. 20  E tokouke a tino ne fai atu penei: “E isi se temoni i a ia kae ko masei foki tena ulu. Kaia e fakalogo‵logo ei koutou ki a ia?” 21  Ne fai atu a nisi tino: “A pati konei e se ne pati a se tagata e pukea ne temoni. E a, e mafai ne se temoni o faka‵pula a mata o tino ‵kivi?” 22  I te taimi tenā ne fai ei te ‵Kaiga Fiafia o te Tukuatuga* i Ielusalema. A te taimi tenā ko te tau ‵moko, 23  kae ne sasale atu a Iesu i loto i te faletapu i te fakaosoga o Solomona.+ 24  Ne ualolo atu a tino Iutaia ki a ia kae fai atu ki a ia: “Ka pefea te leva ka faka‵tali ei matou ki a koe? Kafai koe ko te Keliso na fakaasi ‵tonu mai ki a matou.” 25  Ne tali atu a Iesu ki a latou: “Ko oti ne fai atu ne au ki a koutou, kae e se tali‵tonu koutou. A galuega kolā e fai ne au i te igoa o toku Tamana, e molimau atu a mea konei e uiga ki a au.+ 26  Kae e se tali‵tonu eiloa koutou, me i a koutou e se ko aku mamoe.+ 27  E faka‵logo aku mamoe ki toku leo, kae e iloa ne au latou, kae e tau‵tali mai latou i a au.+ 28  E tuku atu ne au ki a latou a te ola se-gata-mai,+ kae ka se mafai o fakaseai latou, e seai foki se tino e mafai o ‵futi ne ia latou kea‵tea mai toku lima.+ 29  A mea kolā ko oti ne tuku mai ne toku Tamana ki a au ne mea kolā e sili atu i te tāua i nisi mea katoa, kae e seai se tino e mafai o ‵futi kea‵tea ne ia mai te lima o te Tamana.+ 30  A māua mo toku Tamana e tasi eiloa.”*+ 31  Ne toe puke aka ne tino Iutaia a fatu ke peipei a ia. 32  Ne fai atu a Iesu ki a latou: “Ne fakaasi atu ne au ki a koutou a galuega ‵lei e uke mai te Tamana. Tefea la te galuega i mea konā ko peipei ei au ne koutou ki fatu?” 33  Ne tali atu a tino Iutaia ki a ia: “E se peipei ne matou a koe ki fatu ona ko galuega ‵lei, kae ona ko koe e pati masei ki te Atua,+ me e tiga eiloa a koe se tagata, kae e fai mai koe i a koe se atua.” 34  Ne tali atu a Iesu ki a latou: “E a, e se tusi i te otou Tulafono, ‘Au ne fai atu, “A koutou ne atua”’?*+ 35  Kafai ne fakaigoa ne ia ki ‘atua’+ a tino kolā ne taku fakamasei ne te muna a te Atua, kae e se mafai eiloa o fakaseaoga a tusitusiga tapu, 36  e a, e fai mai koutou ki a au, te tino telā ne fakatapu ne te Tamana kae uga mai ki te lalolagi, ‘A koe ne pati masei ki te Atua,’ ona ko au ne fai atu penei, ‘Au ko te Tama a te Atua?’+ 37  Kafai e se fai ne au a galuega a toku Tamana, sa tali‵tonu mai ki a au. 38  Kae kafai e fai ne au a galuega konā, faitalia eiloa me e se tali‵tonu koutou ki a au, tali‵tonu fua ona ko galuega,+ ko te mea ke iloa kae ke iloa faeloa ne koutou me e ‵kau fakatasi mai te Tamana ki a au kae ko au e ‵kau fakatasi ki te Tamana.”+ 39  Ne toe taumafai latou o puke a ia, kae ne sao a ia mai i a latou. 40  Ne toe foki atu a ia ki te suā feitu o te Iolitana ki te koga telā ne fai muamua i ei ne Ioane te papatisoga,+ kae ne nofo atu a ia i konā. 41  E tokouke a tino ne olo atu ki a ia, kae fai atu penei: “E seai eiloa se galuega ‵mana e tasi ne fai ne Ioane, kae ko mea katoa kolā ne fai mai ne Ioane e uiga ki te tagata tenei e ‵tonu katoa.”+ 42  Kae e tokouke a tino ne fakatuanaki ki a ia i konā.

Fakamatalaga mai lalo

Onoono ki te FP.
Io me “‵kau fakatasi.”
Io me “e pelā me ne atua.”