Ielemia 7:1-34
7 Tenei te fekau ne oko mai ki a Ielemia mai i a Ieova, ana muna:
2 “Tu i te mataloa o te fale o Ieova kae folafola atu te fekau tenei i konā, ‘Faka‵logo mai ki te fekau a Ieova, koutou katoa e tino o Iuta kolā e ulu ki loto i mataloa konei o ifo ki a Ieova.
3 Konei a pati a Ieova o kautau, te Atua o Isalaelu ne fai mai: “Toe ‵fuli otou auala mo otou faifaiga, kae ka talia ne au koutou ke ‵nofo faeloa i te koga tenei. +
4 Ke mo a ma tali‵tonu koutou ki pati sē ‵tonu kae fai aka, ‘Tenei te* faletapu o Ieova, te faletapu o Ieova, te faletapu o Ieova!’+
5 Me kafai e ‵fuli eiloa ne koutou otou auala mo faifaiga; kafai e fai eiloa ne koutou a te fakamasinoga tonu i te va o se tagata mo tena tuakoi;+
6 kafai e se pule fakasaua atu koutou ki tino fakaa‵tea, tama‵liki kolā e seai ne olotou mātua,* mo fāfine kolā ko ‵mate olotou avaga;+ kafai e se fakama‵ligi ne koutou a toto o tino e seai ne olotou ‵se i te koga tenei; kae kafai e se tau‵tali koutou i nisi atua ke puapuaga ei koutou;+
7 tenā ko talia ei ne au koutou ke ‵nofo faeloa i te koga tenei, i te fenua ne tuku ne au ki otou tupuga i taimi katoa.”’”*
8 “Kae ko koutou e tali‵tonu ki pati sē ‵tonu+—ka seai eiloa ne mea aoga e maua mai i ei.
9 E a, e mafai ne koutou o kai‵soa,+ tatino, mulilua, tau‵to fakaloiloi,+ ofo atu a taulaga ki a Paala+ kae tau‵tali i atua e se iloa ne koutou,
10 ko o‵mai ei koutou o ‵tu i oku mua i te fale tenei telā e maua i ei toku igoa kae fai atu, ‘A matou ka faka‵sao,’ faitalia a mea fakatakalia‵lia katoa konei e fai ne koutou?
11 E a, ko oti ne fai a te fale telā e maua i ei toku igoa e pelā me se ana o tino kai‵soa i te otou kilokiloga?+ Tenei eiloa ko lavea ne au ki oku mata,” ko te folafolaga a Ieova.
12 “‘Kae na fano nei ki toku faletapu i Sailo,+ ko te koga muamua ne tuku atu ne au i ei toku igoa,+ kae onoono atu ki mea ne fai ne au ki ei ona ko te ma‵sei o oku tino Isalaelu.+
13 Kae ne fai faeloa ne koutou a mea katoa konei,’ ko te folafolaga a Ieova, ‘kae e tiga eiloa ne faipati atu faeloa au ki a koutou, ne seki faka‵logo mai eiloa koutou.+ Ne kalaga atu faeloa au ki a koutou, kae e se tali mai koutou.+
14 Tela la, ka fai eiloa ne au ki te fale telā e maua i ei toku igoa,+ telā e talitonu koe ki ei,+ mo te koga tenei ne tuku ne au ki a koutou mo otou tupuga, a te mea telā ne fai ne au ki Sailo.+
15 Ka ‵pei kea‵tea ne au koutou mai i oku mua, e pelā eiloa mo te ‵peiga kea‵tea ne au otou taina katoa, ko tino katoa ne ‵tupu mai i a Efalaima.’+
16 “E pelā mo koe, sa ‵talo mai mō tino konei. Ke mo a ma tagi io me fai atu se ‵talo io me fakatagi mai ki a au mō latou,+ me i a au ka se fakalogo eiloa ki a koe.+
17 E a, e se lavea ne koe a mea e fai ne latou i fakai o Iuta mo auala o Ielusalema?
18 A tama tāgata e fai fafie, a tamana e faka‵ka te afi, kae ko avaga fāfine e palu falaoa ke fai a keke mo fai te taulaga ki te Tupu Fafine o te Lagi,*+ kae e ‵ligi ki tua ne latou a taulaga meainu ki nisi atua ke fai ei au ke kaitaua.+
19 ‘Kae e a, ko au te tino e fakalogo‵mae ne latou?’ ko te folafolaga a Ieova. ‘E a, e se ko latou eiloa, e fakamasiasi ne latou a latou eiloa?’+
20 Tela la, konei a pati a te Aliki Sili ko Ieova ne fai mai, ‘Kiloke! A toku kaitaua mo toku ita ka ‵ligi ki tua i te koga tenei,+ ki luga i te tagata mo te manu fekai, ki luga i lakau o te fatoaga mo fuataga o te laukele; kae ka ‵ka a mea konā kae ka se mafai o tamate.’+
21 “Konei a pati a Ieova o kautau, te Atua o Isalaelu ne fai mai, ‘Fakaopoopo atu otou taulaga ‵sunu kātoa ki otou nisi taulaga, kae ‵kai koutou ki ‵kano.+
22 Me i te aso ne aumai ei ne au otou tupuga ki tua mo te fenua o Aikupito, ne seki faipati atu au ki a latou io me fakatonu atu ki a latou e uiga ki taulaga ‵sunu kātoa mo nisi taulaga aka.+
23 Kae ne tuku atu ne au ki a latou te fakatonuga tenei: “Faka‵logo mai ki toku leo, kae ka fai au mo fai te otou Atua, kae ka fai koutou mo fai oku tino.+ E ‵tau mo koutou o sa‵sale i auala katoa e fakatonu atu ne au, ko te mea ke ‵lei a mea katoa mō koutou.”’+
24 Kae ne seki faka‵logo mai latou io me tuku mai olotou taliga;+ i lō te fai penā, ne sa‵sale eiloa latou i olotou auala faitogafiti,* kae tau‵tali atu mo te loto ma‵keke i auala ma‵sei o olotou loto,+ kae ne olo ei latou ki tua kae e se olo ki mua,
25 talu mai te aso ne o‵mai ei otou tupuga ki tua mo te fenua o Aikupito ke oko mai ki te aso nei.+ Tenā ne uga atu faeloa ne au aku tavini katoa ko pelofeta ki a koutou, e uga atu latou i aso takitasi i taimi katoa.+
26 Kae ne ita latou ma faka‵logo mai ki a au, kae ne seki tuku mai olotou taliga.+ I lō te fai penā, ne loto ma‵keke latou, kae ne fai ne latou a faifaiga e sili atu i te ma‵sei i lō olotou tupuga!
27 “Ka faipati atu ne koe a pati katoa konei ki a latou,+ kae ka se faka‵logo atu latou ki a koe; ka kalaga atu koe ki a latou, kae ka se tali mai latou ki a koe.
28 Kae ka fai atu koe ki a latou, ‘Tenei te fenua telā ne seki faka‵logo ki te leo o Ieova te lotou Atua kae ita ma talia ana pati polopoloki. Ko galo atu te fakamaoni kae ko se takutaku atu eiloa i loto i a latou.’*+
29 “‵Vele ou laulu kolā e seki ‵kati* kae ‵pei kea‵tea, kae fai se pese fanoanoa i luga i tamā mauga kolā e seai ne lakau i ei, me ko oti ne ‵teke ne Ieova kae ka tiakina ne ia te kautama telā ne fai ne latou a ia ke kaitaua malosi.
30 ‘Me ne fai ne tino o Iuta a mea ma‵sei i taku kilokiloga,’ ko te folafolaga a Ieova. ‘Ko oti ne faka‵tu ne latou olotou tupua fakatakalia‵lia i loto i te fale e maua i ei toku igoa, ko te mea ke fakalailai i ei.+
31 Ko oti ne faite ne latou a koga ma‵luga o Tofeta,* kolā e ‵tu i te Vanu o te Tama Tagata a Hinomo,*+ ko te mea ke ‵sunu i ei olotou tama tāgata mo olotou tama fāfine i te afi,+ se mea telā ne seki fakatonu atu ne au kae e seki māfua mai foki i toku loto.’*+
32 “‘Tela la, kiloke! ka oko mai a aso,’ ko te folafolaga a Ieova, ‘ka se toe taku i ei ko Tofeta io me ko te Vanu o te Tama Tagata a Hinomo* kae ko te Vanu o te Tamatega. Ka tanu ne latou a tino ‵mate i Tofeta ke oko eiloa ki te taimi ko seai ei se avanoaga.+
33 Kae ko foitino ‵mate o tino konei ka fai pelā me ne meakai a manu eva o te lagi mo manu fe‵kai o te lalolagi, kae ka seai se tino e fakamatakutaku atu ki a latou.+
34 Ka fakagata ne au a te leo o te fiafia mo te leo o te ‵lifu, te leo o te tagata ka fakaipoipo mo te leo o te fafine ka fakaipoipo,+ i fakai o Iuta mo auala o Ielusalema, me i te laukele ka fakamasei katoatoa.’”+
Fakamatalaga mai lalo
^ Epelu, “Konei a,” e fakasino atu ki fale o te faletapu kātoa.
^ Io me “tama‵liki e seai ne tamana.”
^ Io me “mai te se-gata-mai ki te se-gata-mai.”
^ Ko te tofi o se atua fafine ne tapuaki ki ei a tino Isalaelu ‵teke; e se taumate se atua fafine o te fanafanau.
^ Io me “pati fakatonutonu.”
^ Epelu, “ko ‵kati kea‵tea mai i olotou gutu.”
^ Io me “ne tukugina atu.”
^ Se koga i tua o Ielusalema telā e ofo atu i ei ne tino Isalaelu ‵teke olotou tama‵liki e pelā me ne taulaga.
^ Io me “ne seki mafaufau eiloa au ki ei.”
