Ielemia 24:1-10
-
Mati ‵lei mo mati ma‵sei (1-10)
24 Tenā ne fakaasi mai ei ne Ieova ki a au a tapola mati e lua e tuku i mua o te faletapu o Ieova, mai tua o te avega fakapagota ne te tupu o Papelonia ko Nepukanesa* a Iekonia*+ te tama tagata a Ieoiakimo,+ te tupu o Iuta, fakatasi mo pelenise o Iuta, tufuga faite mea, mo tino e ga‵lue i fiti; ne puke ne ia latou mai i Ielusalema ki Papelonia.+
2 A te tapola e tasi e tuku i ei a toe mati ‵lei, e pelā eiloa me ne mati ‵fou, kae ko te suā tapola e tuku i ei a toe mati ma‵sei, ko tō ma‵sei telā ko se mafai eiloa o kai.
3 Tenā ne fesili mai ei a Ieova ki a au: “Ielemia, ne a mea e lavea ne koe?” Ne fai atu au: “Ne mati; a mati ‵lei e ‵lei ‵ki, kae ko mati ma‵sei e ma‵sei ‵ki, ko tō ma‵sei telā ko se mafai eiloa o kai.”+
4 Tenā ne oko mai ei te fekau a Ieova ki a au, ana muna:
5 Konei a pati a Ieova te Atua o Isalaelu ne fai mai, ‘E pelā mo mati ‵lei konei, ka ‵lei eiloa aku mea e fai ki tino Iuta kolā ne ave fakapagota, kolā ne uga atu ne au kea‵tea mai i te koga tenei ki te fenua o tino Kaletaia.
6 Ka kilo atu eiloa oku mata ki a latou mō te lotou ‵lei, kae ka fai ne au latou ke toe ‵foki mai ki te fenua tenei.+ Ka ati aka ne au latou, kae ka se ofa ne au ki lalo; ka ‵toki ne au latou, kae ka se unu ne au kea‵tea.+
7 Kae ka tuku atu ne au ki a latou se loto ke iloa ne latou au, me i a au ko Ieova.+ Ka fai latou mo oku tino, kae ka fai au mo olotou Atua,+ me ka toe ‵foki mai latou ki a au mo olotou loto kātoa.+
8 “‘Kae e uiga ki mati ma‵sei kolā ko tō ma‵sei telā ko se mafai eiloa o kai,+ konei a pati a Ieova ne fai mai: “Ka penā eiloa aku mea ka fai ki te tupu o Iuta ko Setekaia,+ ana pelenise, te ‵toega o Ielusalema kolā e ‵toe i te fenua tenei, mo latou kolā e ‵nofo i te fenua o Aikupito.+
9 Ka fai ne au latou e pelā me se mea fakamataku kae se mea fakapuapuaga ki malo katoa o te lalolagi,+ se mea fakamasiasi, se faigamuna, se mea fakaitaita a tino katoa kae se mala+ i koga katoa e fakamavae‵vae ne au latou ki ei.+
10 Kae ka uga atu ne au ki a latou a te pelu,+ te oge mo te famai,+ ke oko ki te taimi ko fakaseai ei latou mai i te fenua ne tuku atu ne au ki a latou mo olotou tupuga.”’”
Fakamatalaga mai lalo
^ Epelu, “Nepukalesa,” te suā tusiga o te igoa.
^ E fakaigoa foki ki a Ieoiakini mo Konia.
