Te Tusi a Iakopo 2:1-26

  • Te fakailoga tino, se agasala (1-13)

    • Alofa, te tulafono fakatupu (8)

  • Fakatuanaki e aunoa mo galuega e mate (14-26)

    • Tali‵tonu temoni kae pole‵pole i te ma‵taku (19)

    • Ne taku Apelaamo ko te taugasoa o Ieova (23)

2  E a, e oku taina, e tausi ne koutou te fakatuanaki o te ‵tou Aliki ‵malu ko Iesu Keliso kae e fakaasi mai foki ne koutou te fakailoga tino?+  Me kafai e ulu mai se tagata ki te otou fakatasiga mo mama aulo i ana matikao lima kae e pei ki gatu ‵gali, kae e ulu mai foki se tagata mativa mo ana gatu lai‵lai,  e a, ka fapito koe ki te tino telā e pei ki gatu ‵gali kae fai atu, “Nofo koe i te nofoga gali tenei,” kae e a, e fai atu koe ki te tino mativa, “Tu koe i luga” io me, “Sagasaga i tafa o te koga telā e tuku ei oku vae”?+  Kafai e penā loa, e mata, ko se fakailoga tino koutou+ kae ko fai foki koutou mo fai a famasino kolā e fai ne latou a fakaikuga ma‵sei?+  Faka‵logo mai, e oku taina pele. E a, e seki filifili ne te Atua a tino kolā e ma‵tiva i te kilokiloga a te lalolagi ke mau‵mea i te fakatuanaki+ kae ke fai mo sui o te Malo, telā ne folafola atu ne ia ki a latou kolā e a‵lofa ki a ia?+  Kae ko oti ne se āva koutou ki tino ma‵tiva. E a, e se ko tino mau‵mea konā e fakasaua atu ki a koutou+ kae toso koutou ki fono fakamasino?  E a, e se muna ma‵sei latou ki te igoa ‵lei telā ne kalagagina ei koutou?  Kafai ko fakaaoga nei ne koutou a te tulafono fakatupu telā e fakaasi mai i te fuaiupu tenei: “E ‵tau mo koe o alofa ki tou tuakoi e pelā mo koe ki a koe eiloa,”+ ko oko eiloa i te ‵lei o koutou.  Kae kafai e tumau koutou i te fakailoga tino,+ a koutou ko agasala, kae ko sala koutou i te tulafono e pelā me ne tino solitulafono.+ 10  Me kafai e fakalogo se tino ki te Tulafono kātoa kae soli ne ia se vaega e tasi i ei, ko soli eiloa ne ia a te tulafono kātoa.+ 11  Me i te tino telā ne fai mai: “E se ‵tau mo koe o mulilua,”+ ne fai mai foki, “E se ‵tau mo koe o tatino.”+ Kafai la koe e se mulilua kae ko koe e tatino, ko fai ei koe mo fai se tino solitulafono. 12  Ke tumau i te fai‵pati kae amio e pelā mo tino kolā ka fakamasinogina e auala i te tulafono o tino saoloto.*+ 13  Me i te tino e se alofa fakamagalo ka fai tena fakamasinoga e aunoa mo te alofa fakamagalo.+ E manumalo a te alofa fakamagalo i te fakamasinoga. 14  Se a la te aoga, e oku taina, māfai e fai mai se tino i a ia e fakatuanaki kae e seai ne ana galuega?+ E a, e mafai o fakasao a ia ne te fakatuanaki tenā?+ 15  Kafai se taina io me se tuagane e se lava ana gatu* mo meakai mō te aso, 16  kae fai atu se tino i a koutou ki a ia: “Fano mo te filemu; ke mafanafana kae ke kai makona koe,” kae e se tuku atu ne koutou a mea kolā e manakogina ne ia mō tena foitino, se a te aoga o te mea tenā?+ 17  E penā foki te fakatuanaki, e mate māfai e seai ne galuega.+ 18  Kāti ka fai mai se tino: “E maua ne koe te fakatuanaki, kae fai ne au a galuega. Fakaasi mai ki a au tou fakatuanaki e aunoa mo galuega, kae ka fakaasi atu ne au ki a koe toku fakatuanaki e auala i aku galuega.” 19  E a, e talitonu koe me e tokotasi te Atua? E tonu loa koe. Kae e tali‵tonu foki a temoni ki ei kae pole‵pole i te ma‵taku.+ 20  E mata, e fia iloa ne koe, e te tino valea, me i te fakatuanaki e aunoa mo galuega e seai sena aoga? 21  E a, e se ko Apelaamo te ‵tou tupuga telā ne taku amiotonugina e auala i ana galuega i te otiga ne ofo atu ne ia a Isaako, tena tama, i luga i te fatafaitaulaga?+ 22  E lavea ne koe me ne ga‵lue fakatasi tena fakatuanaki mo ana galuega kae ne ‵lei katoatoa tena fakatuanaki e auala i ana galuega,+ 23  kae ne fakataunu i ei a pati konei i tusitusiga tapu: “Ne fakatuanaki a Apelaamo ki a Ieova,* kae ne fai a te mea tenā ki a ia e pelā me se faifaiga amiotonu,”+ kae ne taku a ia ko te taugasoa o Ieova.*+ 24  Ko lavea ne koutou me e taku amiotonugina te tino i ana galuega kae e se ko te fakatuanaki fua. 25  E a, e se penā foki o taku amiotonugina a Lahapa te fafine talitāgata e auala i ana galuega i te otiga ne talimalo ne ia a avefekau kae uga atu ke olo i se isi auala?+ 26  E tonu, e pelā eiloa mo te foitino e mate māfai e seai se agaga,*+ e penā foki te fakatuanaki e mate māfai e seai ne galuega.+

Fakamatalaga mai lalo

Eleni, “tulafono o te saolotoga.”
Eleni, “e nofo fuafua.”
Onoono ki te MF A5.
Onoono ki te MF A5.
Io me “mānava.”