Galuega a Apositolo 9:1-43

  • Saulo i tena auala ki Tamaseko (1-9)

  • Ko uga atu a Anania ke fesoasoani ki a Saulo (10-19a)

  • Saulo ko talai atu e uiga ki a Iesu i Tamaseko (19-25)

  • Ko āsi atu Saulo ki Ielusalema (26-31)

  • Ko faka‵lei ne Petelu a Ainea (32-35)

  • Ko toe fakatu aka a Tokasi telā e uiga kaimalie (36-43)

9  Kae ko Saulo, telā koi tumau eiloa i te fakamatakutaku kae fia tamate ne ia a soko o te Aliki,+ ne fanatu ki te faitaulaga sili  kae fakamolemole atu ki ne tusi ke avatu ki sunako i Tamaseko, ko te mea ke saisai kae puke mai ne ia ki Ielusalema so se tagata io me se fafine telā e maua atu ne ia e kau i Te Ala.*+  Ko pilipili atu a ia ki Tamaseko i tena malaga, kae ne sulu fakavave atu se mainaga mai te lagi ki luga i a ia.+  Ne siga a ia ki lalo, kae lagona ne ia se leo e fai atu ki a ia: “Saulo, Saulo, kaia e fakasaua ei ne koe au?”  Ne fesili atu a ia: “Ko oi koe, e te Aliki?” Ana muna: “Ko au ko Iesu+ telā e fakasaua ne koe.+  Kae tu ki luga o fano ki loto i te fakai, kae ka fai atu ki a koe a mea kolā e ‵tau o fai ne koe.”  Ne ‵tu a tāgata kolā ne faima‵laga fakatasi mo ia kae e seai ne olotou pati e fai, me ne lagona ne latou te leo kae e se lavea ne latou se tino.+  Tenā ne tu aka ei a Saulo ki luga, kae e tiga eiloa e ‵pula mai ana mata, e se lavea ne ia se mea. Ne puke ne latou tena lima kae ‵taki atu ki Tamaseko.  E ‵tusa mo aso e tolu ne seki lavea ne ia se mea,+ kae ne seki kai io me inu foki a ia. 10  E isi se soko i Tamaseko e igoa ki a Anania,+ kae ne fai atu te Aliki ki a ia i se fakaasiga: “Anania!” Ana muna: “Tenei au, e te Aliki.” 11  Ne fai atu te Aliki ki a ia: “Tu ki luga o fano ki te auala ko Tonu, kae ‵sala ki te tagata e igoa ki a Saulo mai i Taso,+ i te fale o Iuta. Kiloke! a ia e ‵talo, 12  kae ne lavea ne ia i se fakaasiga se tagata e igoa ki a Anania e fanatu ki loto kae fakaeke atu ana lima ki luga i a ia ko te mea ke ‵kite ana mata.”+ 13  Ne tali atu a Anania: “Te Aliki, ko oti ne logo au mai i tino e tokouke e uiga ki te tagata tenei, ki mea ma‵sei katoa ne fai ne ia ki ou tino tapu i Ielusalema. 14  Kae ko maua nei ne ia te taliaga mai faitaulaga pule ke puke fakapagota ne ia a tino katoa kolā e ka‵laga atu ki tou igoa.”+ 15  Kae ne fai atu te Aliki ki a ia: “Fano! me i te tagata tenei ko oti ne filifili+ ne au ke fakailoa atu a toku igoa ki fenua fakaa‵tea+ e pelā foki mo tupu+ mo tino Isalaelu. 16  Me ka fakaasi manino atu ne au ki a ia a te uke o puapuaga ka oko ki a ia ona ko toku igoa.”+ 17  Ne fano a Anania, ulu atu ki loto i te fale kae fakaeke atu ana lima ki luga i a ia kae fai atu: “Saulo, toku taina, a te Aliki, ko Iesu, telā ne fakasae atu ki a koe i te auala ne vau ei koe, ne uga mai ne ia au, ko te mea ke toe ‵kite ou mata kae ke faka‵fonu foki koe ki te agaga tapu.”+ 18  I konā eiloa, ne ‵to mai a mea e pelā me ne unafi o ika mai i ana mata, kae ne toe ‵kite ei a ia. Tenā ne tu aka ei a ia ki luga ko te mea eiloa ko papatiso a ia, 19  ne kai a ia kae toe maua ne ia te malosi. Ne ‵nofo fakatasi a ia mo te kau soko i nai aso i Tamaseko,+ 20  kae i konā eiloa ne talai atu a ia e uiga ki a Iesu i loto i sunako, me i a ia tenei ko te Tama a te Atua. 21  Kae ne ofo malosi a tino katoa kolā ne fakalogo‵logo ki a ia kae fai aka: “E a, e se tenei te tagata ne fakasaua valevale ne ia a tino i Ielusalema kolā e ka‵laga ki te igoa tenei?+ E a, e seki vau a ia ki konei o puke fakapagota latou kae ave latou ki faitaulaga pule?”+ 22  Kae ne gasolo aka eiloa o malosi a Saulo kae ne ofo a tino Iutaia kolā e ‵nofo atu i Tamaseko i tena poto o fakatalitonu atu me tenei eiloa te Keliso.+ 23  I aso e uke mai tua ifo, ne fai te togafiti a tino Iutaia ke tamate ne latou a ia.+ 24  Kae ne iloa ne Saulo te lotou togafiti. Ne alamati faeloa ne latou a ia i ao mo po i mataloa o te fakai ko te mea ke tamate ne latou a ia. 25  Ne puke a ia ne ana soko i te po kae tukutuku ifo ne latou i loto i se kete+ mai i se famalama i te ‵pui o te fakai. 26  I tena okoatuga ki Ielusalema,+ ne taumafai a ia ke kau atu ki te kau soko, kae ne ma‵taku katoa latou i a ia me ne seki tali‵tonu latou i a ia se soko. 27  Ne fesoasoani atu a Panapa+ ki a ia kae ‵taki atu a ia ki te kau apositolo, kae ne fakamatala likiliki atu ne ia ki a latou a te laveaga ne Saulo a te Aliki i te auala,+ kae ko oti foki ne faipati atu ki a ia, e pelā foki mo te auala ne faipati atu ei a ia mo te loto toa i Tamaseko i te igoa o Iesu.+ 28  Tenā ne ‵nofo ei a ia mo latou, kae olo sāle i loto mo tua o Ielusalema o fai‵pati atu mo te loto ‵toa i te igoa o te Aliki. 29  Ne fai‵pati kae kinau a ia mo tino Iutaia kolā e fai‵pati i te ‵gana Eleni, kae ne taumafai a latou konei o tamate a ia.+ 30  I te iloaga ne taina a te mea tenei, aumai ei ne latou a ia ki Kaisaleia kae uga atu ke fano ki Taso.+ 31  Tenā ne maua ei te filemu i te fakapotopotoga i Iuta kātoa mo Kalilaia mo Samalia.+ Ne fakamalosi aka latou, kae ona ko te lotou sa‵sale mo te ma‵taku ki a Ieova e pelā foki mo te fakamafanafanaga e maua mai i te agaga tapu,+ ne gasolo aka faeloa latou o tokouke. 32  I te taimi ne faimalaga atu ei a Petelu ki kogā koga katoa, ne oko atu foki a ia ki tino tapu kolā e ‵nofo i Lita.+ 33  Ne maua atu ne ia i konā se tagata e igoa ki a Ainea, telā ne takato faeloa i luga i tena moega i tausaga e valu me e ‵pili. 34  Ne fai atu a Petelu ki a ia: “Ainea, ko faka‵lei koe ne Iesu Keliso.+ Tu ki luga kae fakatoka tou moega.”+ I konā eiloa, tu aka ei tou tagata. 35  I te taimi ne lavea ei a ia ne tino katoa kolā e ‵nofo i Lita mo te fenua laugatasi o Salona, ne ‵fuli atu a latou ki te Aliki. 36  E isi se soko i Iopa e igoa ki a Tapita, telā kafai e ‵fuli tena igoa e fakauiga ki a “Tokasi.”* Ne fai ne ia a galuega ‵lei e uke kae tufa atu foki a meaalofa e uke kolā ne faite ne ia. 37  Ne masaki a ia i aso konā, mate atu ei. Ne fakakoukou ne latou a ia kae tuku atu i te potu i luga. 38  Ona ko te pili o Lita ki Iopa, i te ‵logoga a soko i a Petelu ko nofo i te fakai tenā, uga atu ei ne latou a tāgata e tokolua ke fakamalosi atu ki a ia: “Fakamolemole, vau fakavave ki a matou.” 39  Ne tu a Petelu ki luga, olo ei mo lāua. Kae i tena okoatuga, ne ‵taki atu ne latou a ia ki te potu i luga; kae ne fakafetaui atu ki a ia a fāfine katoa ko ‵mate olotou avaga, e ‵tagi mautuutu kae fakaasi atu a gatu mo gatu ‵loa e uke kolā ne ‵sui ne Tokasi kae koi ‵nofo fakatasi a ia mo latou. 40  Tenā ne uga ei ne Petelu a tino katoa ki tua,+ totuli ifo, kae fai tena ‵talo. Ne ‵fuli atu a ia ki te tino mate, ana muna: “Tapita, tu ki luga!” Ne ‵pula mai ana mata, kae i te laveaga ne ia a Petelu, nofotu aka ei a ia ki luga.+ 41  Ne ‵fola atu tena lima ki tou fafine, ‵futi aka ne ia ki luga, kae kalaga atu a ia ki tino tapu mo fāfine ko ‵mate olotou avaga kae tuku atu ne ia ki a latou me ko ola.+ 42  Ne salalau atu a te mea tenā i Iopa kātoa, kae e tokouke a tino i ei ne tali‵tonu ki te Aliki.+ 43  Ne nofo atu a ia i Iopa i nai aso, i a Simona, se tino faite mea ki pa‵kili o manu.+

Fakamatalaga mai lalo

E fakasino atu ki te olaga mo akoakoga faka-Kelisiano.
A te igoa Eleni ko Tokasi mo te igoa Alamaika ko Tapita e fakauiga katoa ki te “Kasele.”