Galuega a Apositolo 8:1-40

  • Saulo te tino fakasaua (1-3)

  • Te galuega magoi a Filipo i Samalia (4-13)

  • Ko uga atu Petelu mo Ioane ki Samalia (14-17)

  • Simona ko taumafai ke ‵togi te agaga tapu (18-25)

  • Te eunuka Aitiope (26-40)

8  Ne lotomalie a Saulo ke tamate+ a Setefano. I te aso tenā, ne oko atu se fakasauaga lasi ki te fakapotopotoga i Ielusalema. Ne salalau atu a soko katoa ki kogā koga o Iuta mo Samalia kae ‵toe mai fua i ei ko te kau apositolo.+  Ne ave ne tāgata fakamaoni a Setefano o tanu, kae ne ‵tagi fanoa‵noa latou ona ko ia.  Kae ko Saulo ne kamata o fakasaua malosi atu ki te fakapotopotoga. Ne ulu mālō atu a ia ki fale takitasi, ‵futi mai ki tua a tāgata mo fāfine, kae avatu ne ia o ‵pei ki te falepuipui.+  E tiga te feitu tenā, ne olo atu a latou kolā ne salalau valevale i loto i te fenua kātoa o folafola te tala ‵lei e uiga ki te muna a te Atua.+  Ne fanatu a Filipo ki te fakai* o Samalia+ kae kamata o talai ki a latou e uiga ki te Keliso.  Ne loto tasi a te vaitino kae ne ‵saga tonu atu ki pati a Filipo i te taimi ne fakalogo‵logo kae onoono atu ei latou ki galuega ‵mana ne fai ne ia.  Me e tokouke a tino ne ‵nofo i ei a agaga ma‵sei, kae ne paka‵laga mai a agaga ma‵sei konei i se leo lasi kae o‵mai ki tua.+ E se gata i ei, e tokouke a tino ‵pili mo tino vae ma‵sei ne faka‵lei.  Tela la, ne fia‵fia malosi eiloa a tino o te fakai tenā.  E isi se tagata i te fakai tenā e igoa ki a Simona, telā ne fai sāle ana faifaiga faivailakau kae ne ofo i ei a te fenua o Samalia, kae ne fai mai i a ia se tagata sili. 10  A tino katoa, mai te ‵toe tino malalo ke oko eiloa ki te ‵toe tino maluga, ne ‵saga atu katoa ki a ia kae fai aka: “A te tagata tenei ko te Malosi o te Atua, telā e taku ko te Sili.” 11  Ne ‵saga atu latou ki a ia me ne ofo latou i se taimi tai mata leva i ana poto faivailakau. 12  Kae i te taimi ne tali‵tonu ei latou ki a Filipo, telā ne folafola atu ne ia te tala ‵lei o te Malo o te Atua+ mo te igoa o Iesu Keliso, ne papatiso+ ei a tāgata mo fāfine. 13  Ne fai foki a Simona mo fai se tino talitonu, kae i tena otiga ne papatiso ne kau atu faeloa a ia ki a Filipo;+ ne ofo tou tagata i galuega ‵mana kae fakaofoofogia kolā ne lavea ne ia. 14  I te taimi ne ‵logo ei a te kau apositolo i Ielusalema me ko oti ne talia ne tino Samalia te muna a te Atua,+ uga atu ei ne latou a Petelu mo Ioane ki a latou; 15  kae ne olo atu a lāua konā o ‵talo ko te mea ke maua ne latou te agaga tapu.+ 16  Me ne seki ‵ligi ifo a te agaga tapu ki se tino e tokotasi i a latou, kae ne papatiso fua latou i te igoa o te Aliki ko Iesu.+ 17  Tenā ne fakaeke atu ei lā lima ki luga i a latou,+ kae ne kamata o maua ne latou te agaga tapu. 18  I te laveaga ne Simona me ne maua te agaga tapu e auala i te fakaekeatuga o lima o apositolo, ne ofo atu ei ne ia a tupe ki a lāua, 19  ana muna: “Tuku mai foki ki a au te ‵mana tenei, ko te mea ke maua ne so se tino telā e fakaeke oku lima ki luga i ei a te agaga tapu.” 20  Kae ne fai atu a Petelu ki a ia: “Ke ‵mate fakatasi atu koe mo au siliva, me e mafaufau koe i te meaalofa faivasaga a te Atua e maua e auala i tupe.+ 21  E seai sou vaega io me se tusaga i te mea tenei, me i tou loto e se tonu i te kilokiloga a te Atua. 22  Tela la, ke salamō koe i tau mea masei tenei, kae fakatagi atu ki a Ieova, me kafai e mafai, ko fakamagalo ei a mafaufauga ma‵sei i tou loto, 23  me e lavea ne au i a koe se mea poisini kae se pologa o te amio sē tonu.” 24  Ne tali atu a Simona ki a lāua: “‵Talo ki a Ieova mō oku ko te mea ke seai se mea i mea kolā ne fai mai ne koulua e tupu ki a au.” 25  Tela la, i te otiga ne tuku atu ne lāua se molimau maea kae fai‵pati atu te muna a Ieova, ne toe ‵foki lāua ki Ielusalema kae olo atu lāua o folafola te tala ‵lei ki fakai e uke o tino Samalia.+ 26  Kae ne faipati atu te agelu+ a Ieova ki a Filipo, ana muna: “Tu ki luga kae fano ki saute ki te auala telā e fanatu mai i Ielusalema ki Kasa.” (Te auala tenei e tele i loto i te toafa.) 27  Ne tu a ia ki luga kae fano, kae kiloke! e isi se eunuka* mai Aitiope, se tagata maluga a te Kanake,* ko te tupu fafine o tino Aitiope, telā e pule i koloa katoa a te tupu. Ne fano a ia ki Ielusalema o tapuaki i ei,+ 28  kae ko toe foki a ia kae ne sagasaga i luga i tena kaliota kae faitau i se leo maluga a te tusi a te pelofeta ko Isaia. 29  Tenā ne fai atu ei te agaga tapu ki a Filipo: “Fano o fakapilipili ki te kaliota tenā.” 30  Ne tele atu a Filipo i tafa o te kaliota kae lagona ne ia me e faitau a tou tagata ki te tusi a te pelofeta ko Isaia, fai atu ei a ia: “E malamalama koe i au mea e faitau?” 31  Ana muna: “E mafai pefea o malamalama au, māfai e seai se tino e fesoasoani mai ki a au?” Fakamolemole atu ei ke sopo aka a Filipo ke saga‵saga lāua. 32  Tenei a te vaega o Tusitusiga Tapu ne faitau ne ia: “Ne aumai a ia e pelā me se tamā mamoe ko ave o ta, e pelā me se tamā mamoe telā e nofo filemu i mua o ana tino ‵vele fulufulu, e se ‵tala eiloa a tena gutu.+ 33  I te taimi ne fakamasiasi ei a ia, ne seki fai se fakamasinoga tonu ki a ia.+ Ko oi ka taku atu ne ia a fakamatalaga likiliki o tena kautama? Me i tena ola ko ave kea‵tea mai te lalolagi.”+ 34  Tenā ne fai atu ei te eunuka ki a Filipo: “Fakamolemole, ko oi te tino e fakauiga ki ei a pati a te pelofeta tenei? E fakauiga ki a ia eiloa io me se isi tagata?” 35  Ne kamata a Filipo o faipati, kae kamata mai te fuaiupu tenei i tusitusiga tapu, folafola atu ei ne ia ki tou tagata a te tala ‵lei e uiga ki a Iesu. 36  I te lā auala, ne oko atu ei lāua ki se vai, kae ne fai atu te eunuka: “Kiloke! Tenei te vai; e isi se pogai e se ‵tau ei au o papatiso?” 37 * —— 38  Ne fakatonu atu a ia ke fakatu te kaliota, olo ifo ei a Filipo mo te eunuka ki te vai, papatiso ei a ia ne Filipo. 39  I te lā oloakaga mai te vai, ne ‵taki fakavave ne te agaga o Ieova a Filipo kea‵tea, kae ne seki toe lavea a ia ne te eunuka; kae ne fano a ia i tena auala mo te fiafia. 40  Ne fano a Filipo ki Asetota, kae ne fanatu a ia i loto i te fenua tenā o folafola atu faeloa te tala ‵lei i fakai katoa ke oko eiloa ki Kaisaleia.+

Fakamatalaga mai lalo

Io me kāti, “se fakai.”
Io me “se ofisa maluga.”
Se tofi telā e tuku atu ki tupu fāfine o Aitiope.
Onoono ki te MF A3.