Galuega a Apositolo 6:1-15

  • Ko filifili tāgata e tokofitu ke tavini atu (1-7)

  • Ne ‵losi ‵se atu i a Setefano ne muna masei (8-15)

6  I aso konā, i te taimi ne gasolo aka ei o tokouke a soko, ne kamata o mui‵mui a tino Iutaia kolā e fai‵pati ki te ‵gana Eleni e uiga ki tino Iutaia kolā e fai‵pati ki te ‵gana Epelu, me ko se maua ne olotou fāfine kolā ko ‵mate olotou avaga a olotou tusaga i mea kolā e tufatufa i aso takitasi.+  Ne fakamaopoopo ne te toko Sefululua a te kau soko katoa kae fai atu ki a latou: “E se ‵tau o tiaki ne matou a te muna a te Atua ko te mea ke tufatufa atu a meakai.+  Tela la, e taina, filifili aka ne tāgata e tokofitu kolā e fakatuagagina+ mai i a koutou, e ‵fonu i te agaga tapu mo te poto,+ ko te mea ke ‵tofi aka ne matou ke fai ne latou te galuega tāua tenei;+  kae ka ‵saga atu matou ki te faiga o ‵talo mo te talaiatuga o te muna.”  Ne fia‵fia malosi a soko katoa ki olotou pati ne fai, fili ei ne latou a Setefano, se tagata e ‵fonu i te fakatuanaki mo te agaga tapu, e pelā foki mo Filipo,+ Polokolasi, Nikanola, Timona, Pamena, mo Nikolasi, se tagata mai Anitioka telā ne ‵fuli ki te lotu Iutaia.  Ne aumai ne latou a tāgata konā ki mua o te kau apositolo, kae i te otiga ne ‵talo, fakaeke atu ei a lima o te kau apositolo ki luga i a latou.+  Ne iku atu i ei ki te salalau+ valevale o te muna a te Atua, kae ne fakaopoopo faeloa a te aofaki o soko+ i Ielusalema; kae e tokouke a faitaulaga ne fai pelā me ne tino tali‵tonu.+  Ne ‵fonu a Setefano i te alofa o te Atua mo te ‵mana, kae ne fai ne ia a mea fakaofoofogia mo galuega ‵mana i mua o tino.  Kae ne ‵tu mai a nisi tāgata mai te potukau e igoa ki te Sunako o Tino Saoloto, fakatasi mo nisi tino Kulene mo tino Alesania, mo nisi tino mai Kilikia mo Asia, o kinau atu ki a Setefano. 10  Kae ne seki mafai ne latou o ‵teke atu a te poto mo te agaga tapu telā e faipati mai i ei a Setefano.+ 11  Tenā ne fakamalosi ei ne latou a nisi tāgata i se auala ‵funa ke fai atu: “Ne lagona ne matou a ia e muna masei ki a Mose mo te Atua.” 12  Kae ne fakamakosu ne latou a tino, toeaina, mo failautusi ke kaitaua, kae ne olo fakavave atu ou tāgata o puke a Setefano kae ave mālō ne latou ki te Sanetulini. 13  Kae ne aumai ne latou a molimau ‵pelo, kolā ne fai atu: “A te tagata tenei e se mafai o gata tena muna masei ki te koga tapu tenei mo te Tulafono. 14  E pelā mo te mea tenei, ne lagona ne matou ana pati me ka ofa ne Iesu te Nasaleta a te fale tenei ki lalo, kae ‵fuli ne ia a tuu masani kolā ne tuku mai ne Mose ki a tatou.” 15  Kae i te taimi ne ‵kilo atu ei ki a ia a tino katoa kolā e saga‵saga i te Sanetulini, ne lavea ei ne latou ana mata e pelā eiloa mo mata o se agelu.

Fakamatalaga mai lalo