Galuega a Apositolo 5:1-42
5 E isi se tagata e igoa ki a Anania, fakatasi mo tena avaga ko Safaila, ne fakatau atu ne lāua te lā manafa.
2 Kae ne ‵funa ne ia se vaega o te ‵togi o te manafa kae tuku atu te ‵toega ki te kau apositolo. Ne iloa foki ne tena avaga te mea tenā.+
3 Kae ne fai atu a Petelu: “Anania, kaia ko fai ei ne Satani ke tupu te mea tenei i tou loto, ke fakaloiloi+ ne koe te agaga tapu+ kae ke ‵funa ne koe se vaega o te ‵togi o te manafa?
4 E a, e se i o koe eiloa te manafa tenā i te nofoga mo koe? Kae i te otiga ne fakatau atu ne koe, e a, e se ko koe foki eiloa e pule i te ‵togi o te manafa? Kaia ne fai ei ne koe te fuafuaga tenei i tou loto? E seki loi koe ki tino kae ko loi koe ki te Atua.”
5 I te lagonaga ne ia a pati konei, siga ei a Anania ki lalo kae mate. Kae ne ma‵taku malosi a tino katoa kolā ne ‵logo i te mea tenā.
6 Tenā ne ‵tu aka ei a tamataene ki luga, kofukofu a ia ki laugatu, sau ei ne latou o ave o tanu.
7 Kāti i se tolu itula mai tua ifo kae oko mai tena avaga. E seai eiloa sena mea e iloa i te mea telā ko oti ne tupu.
8 Ne fai atu a Petelu ki a ia: “Fai mai ki a au, tenei eiloa te aofaki ne maua i te fakatauatuga ne koulua te manafa?” Ana muna: “Ao, tenā loa te aofaki.”
9 Fai atu ei a Petelu ki a ia: “Kaia ne talia ei ne koulua ke tofotofo ne koulua te agaga o Ieova?* Kiloke! A vae o latou kolā ne tanu ne latou tau avaga konā ko ‵tu mai i te mataloa, kae ka ave foki ne latou a koe ki tua.”
10 I konā loa, ne siga ifo tou fafine ki vae o Petelu, mate atu ei. I te okomaiga o tamataene, ne maua atu ne latou a ia ko mate, ave ei ne latou ki tua o tanu i tafa o tena avaga.
11 Tenā ne ma‵taku ei te fakapotopotoga kātoa mo tino katoa kolā ne ‵logo i mea konei.
12 E se gata i ei, e auala i te kau apositolo ne fai faeloa ne latou a galuega ‵mana mo mea fakaofoofogia e uke ke lavea ne tino.+ Ne maopoopo fakatasi a latou katoa i te Fakaosoga o Solomona.+
13 E tonu, e seai se isi tino ne loto toa o kau atu ki a latou. E tiga te feitu tenā, ne tavae eiloa latou ne tino.
14 E sili atu i ei, ne fakaopoopo mai faeloa a tino tali‵tonu ki te Aliki, tāgata mo fāfine e tokouke.+
15 Tela la, ne aumai ne latou a tino ma‵saki ki loto i auala kae faka‵moe i luga i tamā moega mo papa i konā, ko te mea ke fano fua te ata o Petelu i luga i nisi tino o latou māfai e fanatu a ia i olotou tafa.+
16 E se gata i ei, ne o‵mai faeloa a tino e tokouke mai i fakai i tafa o Ielusalema, e sausau mai a tino ma‵saki mo tino e ulufia ne agaga ma‵sei, kae ne faka‵lei aka a latou katoa.
17 Kae ne tu aka te faitaulaga sili mo latou katoa kolā ne ‵kau fakatasi mo ia, mai te lotu a te kau Satukaio, kae ne ‵fonu latou i te loto masei.
18 Ne puke ne latou a apositolo kae ‵pei atu ki te falepuipui.+
19 Kae i te po eiloa tenā, ne ‵tala ne te agelu a Ieova a mataloa o te falepuipui,+ aumai ei ne ia a latou ki tua kae fai atu:
20 “Olo o ‵tu i loto i te faletapu kae takutaku atu faeloa ki tino a mea katoa e uiga ki te ola tenei.”
21 I te otiga ne lagona ne latou te mea tenei, ne ulu atu latou ki loto i te faletapu i te vaveao kae kamata o akoako atu i ei.
I te okoatuga a te faitaulaga sili mo ana tino, ne fakamaopoopo ne latou te Sanetulini mo toeaina katoa o tino Isalaelu, kae uga atu a tino ki te falepuipui ke aumai a apositolo ki olotou mua.
22 Kae i te okoatuga a ofisa ki konā, e seai ne tino ne maua ne latou i te falepuipui. ‵Foki atu ei latou o fakailoa atu te mea tenā,
23 olotou muna: “Ne maua atu ne matou a mataloa o te falepuipui e ‵loka katoa kae e ‵tu a leoleo i mataloa, kae i te ‵talaga ne matou e seai eiloa se tino i loto i ei.”
24 I te lagonaga ne te takitaki o te faletapu mo faitaulaga pule a pati konei, ne ‵numi latou i mea konei me ne a mea ka ‵tupu i ei.
25 Kae ne vau se tino kae lipoti atu ki a latou: “Kiloke! A tāgata kolā ne ‵pei ne koutou ki te falepuipui, ko ‵nofo i loto i te faletapu, e ‵tu kae akoako ne latou a tino i ei.”
26 Tenā ne olo atu ei a te pule mo ana ofisa o aumai latou, kae e seki fakasaua atu eiloa ki a latou, me ne ma‵taku i a latou ma peipei ne tino ki fatu.+
27 Ne aumai ne latou a apositolo kae faka‵tu i mua o te Sanetulini. Tenā ne fesili atu ei te faitaulaga sili ki a latou
28 kae fai atu: “Ne fakatonu atu matou ke se toe fakavae otou akoakoga ki luga i te igoa+ tenei, kae kiloke! ko oti ne faka‵fonu ne koutou a Ielusalema ki otou akoakoga, kae e taumafai malosi koutou o ‵ti mai a toto o te tagata tenā ki luga i a matou.”+
29 Ne tali atu a Petelu mo nisi apositolo: “E ‵tau mo matou o faka‵logo ki te Atua e pelā me ko te pule i lō tāgata.+
30 A te Atua o ‵tou tupuga ne fakatu aka ne ia a Iesu, telā ne tamate ne koutou e auala i te fakatautau i luga i se pou.+
31 Ne fakamaluga aka ne te Atua a ia tenei ki tena feitu fakaatamai+ ke fai mo fai te Sui Sili+ mo te Fakaola,+ ko te mea ke sala‵mo a tino Isalaelu kae ke fakamagalo olotou agasala.+
32 A matou ko molimau ki mea konei,+ e penā foki te agaga tapu,+ telā ne tuku atu ne te Atua ki a latou kolā e faka‵logo ki a ia e pelā me ko te lotou pule.”
33 I te lagonaga ne latou a te mea tenei, ne kaitāua malosi latou kae ne ma‵nako o tamate a apositolo.
34 Kae ne tu aka se Falesaio e igoa ki a Kamalielu+ i te Sanetulini; a ia se faiakoga o te Tulafono kae ne āva malosi a tino katoa ki a ia, kae ne fakatonu atu a ia ke ave a tāgata konei ki tua mō se taimi toetoe.
35 Tenā ne fai atu ei a ia ki a latou: “Tāgata o Isalaelu, ke fakaeteete koutou i mea e ma‵nako koutou o fai ki tāgata konei.
36 Me i aso ko ‵teka ne sae mai a Tiutasi, kae ne fai mai i a ia se tino maluga, kae ne ‵kau atu ki tena potukau se aofaki o tāgata, kāti e toko 400. Ne tamate tou tagata kae mafuta valevale a tino kolā ne tau‵tali i a ia, fakaseai atu ei tena potukau.
37 Mai tua o ia ne sae aka a Iuta te tino Kalilaia i aso o te fakamauga o igoa, kae ne ‵futi atu foki ne ia a tino ki a ia. Ne mate foki te tagata tenā, kae ko tino katoa kolā ne tau‵tali i a ia ne mafuta valevale.
38 Tela la, ona ko mea konā, au e fai atu ki a koutou, sa fakalavelave atu ki tāgata konei, kae tuku malie eiloa latou. Me kafai a te fakatokaga io me ko te galuega tenei e māfua mai i tāgata, ka fakaseaigina eiloa a te galuega tenā;
39 kae kafai e māfua mai i te Atua, ka se mafai eiloa ne koutou o fakaseai te galuega tenā.+ I te mea ma iloa fakamuli aka ne koutou me ko taua ‵tonu atu eiloa koutou ki te Atua.”+
40 Ne faka‵logo latou ki a ia kae aumai ne latou a apositolo, ne ‵kini ne latou,+ kae fakatonu atu ke fakagata te lotou fai‵pati i te igoa o Iesu, telā uga atu ei latou ke olo.
41 Ne olo latou ki tua mo te Sanetulini mo te fia‵fia+ me ko taulia latou i mua o te Atua ke fakamasiasigina ona ko tena igoa.
42 Kae i aso takitasi ne tumau eiloa latou i te akoako mo te folafola atu e aunoa mo te ‵fiu a te tala ‵lei e uiga ki te Keliso, ko Iesu,+ i loto i te faletapu kae mai fale ki fale.+
