Galuega a Apositolo 4:1-37

  • Ko puke fakapagota a Petelu mo Ioane (1-4)

    • Ko toko 5,000 nei a tāgata tali‵tonu (4)

  • Ko fakamasino i mua o te Sanetulini (5-22)

    • “E se mafai eiloa o fakagata te mā fai‵pati” (20)

  • ‵Talo ke maua te loto toa (23-31)

  • Fakatau fesoasoani a soko (32-37)

4  I te taimi koi fai‵pati ei a Petelu mo Ioane ki tino, ne oko mai a faitaulaga, te takitaki pule o te faletapu, mo Satukaio+ ki a lāua.  Ne ita latou me ne akoako ne apositolo a tino kae fakaasi manino atu ne lāua a te toetu o Iesu mai te mate.+  Tenā ne puke ei ne latou a lāua kae ‵loka i te falepuipui+ ke oko ki te suā aso i te mea ko po.  Kae ne tali‵tonu a tino e tokouke kolā ne fakalogo‵logo ki te lāuga, kae kāti e ‵tusa mo te toko 5,000 tāgata i konā.+  I te suā aso ne maopoopo fakatasi olotou takitaki, toeaina, mo failautusi i Ielusalema,  fakatasi mo Anasa+ te faitaulaga pule, Kaiafa,+ Ioane, Alesana, mo tino katoa kolā e kāiga mo te faitaulaga pule.  Ne faka‵tu ne latou a Petelu mo Ioane i olotou mua kae fesili atu ki a lāua: “I o oi te ‵mana io me i o oi te igoa ne fai ei ne koulua a te mea tenei?”  Tenā ne fai atu ei a Petelu, telā ko ‵fonu i te agaga tapu,+ ki a latou: “Takitaki o tino mo toeaina,  kafai ko iloilo aka a māua i te aso tenei, ona ko te faiga o se mea ‵lei ki se tagata ‵pili,+ kae e fia iloa ne koutou me ko oi ne faka‵lei ne ia te tagata tenei, 10  fai ke iloa ne koutou katoa e pelā foki mo tino Isalaelu me i te igoa o Iesu Keliso te Nasaleta,+ telā ne tamate ne koutou i luga i se pou+ kae telā ne toe fakatu aka ne te Atua mai te mate,+ e auala i a ia ko tu atu ei te tagata tenei i otou mua mo te foitino malosi. 11  Tenei a ‘te fatu telā ne fai ne koutou e tufuga fai fale e pelā me e se taulia kae ko oti ne fai mo fai te fatu tulimanu tafasili i te aoga.’+ 12  E se gata i ei, e seai se fakaolataga e maua i se isi tino, me e seai aka foki se igoa+ mai lalo i te lagi ne tuku mai ki tino ke mafai o ‵sao ei tatou.”+ 13  I te laveaga ne latou a te loto ‵toa o Petelu mo Ioane i lā pati, kae iloa foki ne latou me i a lāua ne tino e seki a‵koga faka‵lei kae ne tino fatauva foki,+ ne ofo eiloa latou. Kae ne kamata o iloa ne latou me ne ‵nofo lāua mo Iesu.+ 14  Ne kilo‵kilo atu latou ki te tagata telā ne faka‵lei e ‵tu mai mo lāua,+ kae ne seki ai eiloa ne olotou pati ne mafai o fai atu.+ 15  Ne fakatonu atu latou ki a lāua ke olo ki tua mo te fale fono o te Sanetulini, kae ne fai‵pati ei latou, 16  olotou muna: “Ne a ‵tou mea e ‵tau o fai ki tāgata konei?+ Me ko oti ne fai ne lāua se galuega ‵mana mautinoa, se mea telā ko iloa ne tino katoa o Ielusalema,+ kae e se mafai o fakafiti ne tatou. 17  Ko te mea ke se salalau atu a te mea tenei ki tua i tino, ke fakamatakutaku ne tatou a lāua kae fai ki a lāua ke se toe fai‵pati eiloa ki so se tino i te igoa tenei.”+ 18  Ne toe ‵kami mai ne latou a lāua kae fakatonu atu ke mo a ma toe fai‵pati io me akoako atu lāua i te igoa o Iesu. 19  Kae ne tali atu a Petelu mo Ioane ki a latou: “Kafai e tonu i te kilokiloga a te Atua ke faka‵logo māua ki a koutou i lō te Atua, fakamasino aka eiloa ne koutou. 20  Kae e pelā mo māua, e se mafai eiloa o fakagata te mā fai‵pati ki mea ko oti ne lavea kae lagona ne māua.”+ 21  Tela la, i te otiga ne fakamatakutaku ne latou a lāua, fakasaoloto atu ei lāua, me e seai se pogai ne maua ne latou ke fakasala ei lāua me ne ma‵taku latou i tino,+ me ne tavae atu latou katoa ki te Atua ona ko te mea telā ne tupu. 22  Me i te tagata telā ne faka‵lei fakavavega tena masaki ko silia atu i te 40 tausaga tena matua. 23  I te otiga ne fakasaoloto lāua, olo atu ei ki olotou tino kae fakaasi atu ki a latou a pati a faitaulaga pule mo toeaina kolā ne fai atu ki a lāua. 24  I te lagonaga ne latou a te mea tenei, ne ‵talo fakatasi ei latou ki te Atua, olotou muna: “Te Aliki Sili, ko koe te Atua telā ne faite ne koe te lagi mo te lalolagi mo te tai mo mea katoa i ei,+ 25  kae e auala i te agaga tapu ne faipati mai ei koe ki te motou tupuga ko Tavita,+ tau tavini: ‘Kaia e manava‵se ei a atufenua kae ko tino e mafaufau ‵mafa ki mea e seai ne aoga? 26  A tupu o te lalolagi ne ‵tu i olotou tulaga kae ko pule ne maopoopo fakatasi e pelā me se potukau e tasi o ‵teke ki a Ieova* kae ‵teke ki tena tino fakaekegina.’*+ 27  E tonu, ne ‵kau fakatasi a Helota mo Ponitio Pilato+ mo tino o fenua fakaa‵tea mo tino Isalaelu i te fakai tenei o taua atu ki tau tavini tapu, ko Iesu, telā ne fakaeke ne koe,+ 28  ko te mea ke fai a mea kolā ko leva ne fuafua ne koe i tou ‵mana mo tou loto.+ 29  Kae nei la, e Ieova, saga atu ki olotou pati fakamataku‵taku, kae talia mai au tavini ke fai‵pati atu faeloa ne latou tau muna mo te loto ‵toa, 30  kae ke ‵fola mai tou lima o faka‵lei aka a masaki kae fai foki a galuega ‵mana+ mo mea fakaofoofogia e auala i te igoa o tau tavini tapu, ko Iesu.”+ 31  Kae i te otiga o te lotou ‵talo, ne galulu te koga telā ne maopoopo ei latou, kae ne ‵fonu katoa latou i te agaga tapu+ kae faipati atu ne latou te muna a te Atua mo te loto ‵toa.+ 32  E se gata i ei, ne loto tasi a tino e tokouke kolā ne tali‵tonu, kae e seai eiloa se tino ne fai mai pelā me i ana mea totino i a ia eiloa, ne fakaaoga fakatasi ne latou olotou mea katoa.+ 33  Ne tumau te kau apositolo i te molimau atu mo te ‵mana lasi, e uiga ki te toetu o te Aliki ko Iesu,+ kae ne maua ne latou katoa a te lasi o te alofa tauanoa o te Atua. 34  E tonu, e seai eiloa se tino i a latou ne mativa i se mea,+ me ne fakatau atu ne tino katoa kolā e isi ne olotou manafa mo fale a mea konā kae aumai a ‵togi o mea kolā ne fakatau atu, 35  kae ne tuku atu ki mua o te kau apositolo.+ Ko tufa atu ei a mea konā ki tino taki tokotasi e ‵tusa mo olotou manakoga totino.+ 36  Tela la, a Iosefa, telā ne fakaigoa foki ne te kau apositolo ki a Panapa,+ (ko tena uiga ko te “Tama o Fakamafanafanaga”), se tino Levi mai Kupelu, 37  e isi sena manafa, kae ne fakatau atu ne ia te manafa tenā kae tuku atu a tupe ki mua o te kau apositolo.+

Fakamatalaga mai lalo

Onoono ki te MF A5.
Io me “tena Keliso.”