Galuega a Apositolo 28:1-31

  • Ake aka i te matafaga o Melita (1-6)

  • Faka‵lei fakavavega te tamana o Popilio (7-10)

  • Ko fanatu ki Loma (11-16)

  • Ko faipati Paulo ki te kau Iutaia i Loma (17-29)

  • Paulo ko talai mo te loto toa i tausaga e lua (30, 31)

28  I te motou okoatuga mo te manuia ki uta i te fenua, ne iloa aka ei ne matou i te fenua tenā ko Melita.+  Ne atafai malosi mai ki a matou a tino o te fenua kolā e fai‵pati ki se ‵gana fakaa‵tea. Ne faka‵ka ne latou se afi kae tali faka‵lei ne latou a matou katoa ona ko te ‵to o te vaiua mo te ‵moko.  I te taimi ne fakaputuputu ei ne Paulo a fafie kae tuku atu ki te afi, ne vau ki tua se gata poisini ona ko te ‵vela o te afi kae ‵piki ‵mau ki tena lima.  I te laveaga ne tino e fai‵pati ki se ‵gana fakaa‵tea a te gata ‵poisini e tautau ifo mai tena lima, ne fai aka ei olotou pati i a latou eiloa: “A te tagata tenei se tino tatino, kae faitalia me ne sao a ia mai te tai, ne seki talia ne te Fakamasinoga Tonu* ke tumau a ia i te ola.”  Kae ne lu kea‵tea ne Paulo a te gata ‵poisini ki loto i te afi kae e seki logo‵mae a ia i ei.  Ne faka‵tali latou ke fula‵fula tena foitino io me e mate fakavave tou tagata. Ko tai mata leva eiloa te lotou faka‵taliga kae lavea ne latou me e seai eiloa se mea masei ne tupu ki a ia, ‵fuli ei olotou manatu kae fai atu i a ia se atua.  E pili atu ki te koga tenā ko manafa o te pule o te fenua e igoa ki a Popilio, kae ne talimalo faka‵lei ne ia matou i aso e tolu.  Kae ko te tamana o Popilio e takato mo te masaki i tena moega, e poko ne te fiva kae sanatoto. Ne fanatu a Paulo ki loto i ei o ‵talo, fakaeke atu ana lima ki luga i ei kae ne faka‵lei ne ia.+  I te otiga o te mea tenei, ne olo atu foki a tino katoa o te fenua kolā e ma‵saki ki a ia kae ne faka‵lei katoa latou.+ 10  Ne tuku mai foki ne latou a meaalofa e uke, kae i te taimi ka fo‵lau ei matou, ne fakauta ne latou te vaka ki so se mea e ma‵nako matou ki ei. 11  E tolu masina mai tua ifo, ne fo‵lau atu matou i se vaka telā e isi se fakamailoga i ei penei “Fanau a Seu.” Ne vau te vaka tenā mai Alesania, kae ne faka‵lafi i te fenua tenā i te taimi o te tau ‵moko. 12  Ne oko atu matou ki te koga ‵sai vaka i Silakusa kae ‵nofo i konā i aso e tolu, 13  kae mai konā ne fo‵lau matou kae oko atu ki Lekiuma. I te aso mai tua ifo ne agi mai te matagi mai saute, oko atu ei matou ki Puteoli i te lua o aso. 14  E isi ne taina ne fetaui matou i konā kae fakamolemole mai ke ‵nofo matou i aso e fitu, i te motou auala o olo atu ki Loma. 15  Ne ‵logo a taina i a matou ko ‵nofo i konā, ne o‵mai latou o fakafetaui ki a matou i te Maketi o Apiasi mo Fale Talimalo e Tolu. I te laveaga ne Paulo a latou, ne siki tena fakafetai ki te Atua, malosi ei tena loto.+ 16  I te motou okoatuga ki Loma, ne talia ke nofo a Paulo i a ia eiloa kae leoleo ne se sotia. 17  Kae i te tolu o aso mai tua ifo, ne ‵kami mai ne ia a takitaki o tino Iutaia. I te lotou maopoopomaiga, ne fai atu a ia ki a latou: “Oku taina, e tiga eiloa e seai saku mea ‵se ne fai ki tino io me soli ne au a tuu mo aganuu a ‵tou tupuga,+ ko oti ne tuku atu au e pelā me se pagota mai i Ielusalema ki lima o te kau Loma.+ 18  Kae i te otiga ne iloilo ne latou au,+ ne ma‵nako latou o fakasaoloto au me e seai se pogai e ‵tau ei au o mate.+ 19  Kae i te taimi ne ‵teke mai ei a tino Iutaia ki te mea tenei, ne faimālōgina au ke toe tagi ki a Kaisala,+ e se ona ko te mea e isi se mea e fia ‵losi atu ne au ki toku fenua. 20  Tela la, ona ko te mea tenei ne fakatagi atu ei au ke fetaui kae ke faipati atu au ki a koutou, me ko saisai au ki filifili ona ko te mea telā e fakamoemoe ki ei a Isalaelu.”+ 21  Ne fai atu latou ki a ia: “E seai ne tusi ne maua ne matou mai i Iuta e uiga ki a koe, io me ne taina ne o‵mai mai i konā kae fai mai se tala masei e uiga ki a koe. 22  Kae e mafau‵fau matou me se mea ‵lei ke fakalogo‵logo matou ki ou manatu, me e iloa ne matou i te potukau fakalotu+ tenei e fakamaseigina faeloa i koga katoa.”+ 23  Ne fakatoka ne latou se aso ke fetaui mo ia, kae ne olo atu a tino e tokouke ki a ia i te koga e nofo i ei. Kae mai te tafataeao ke oko ki te afiafi, ne fakamatala atu ne ia te mea tenā ki a latou mai te molimau maea atu e uiga ki te Malo o te Atua ke fakatalitonu atu ki a latou e uiga ki a Iesu,+ mai te Tulafono a Mose+ mo tusi a te kau Pelofeta.+ 24  Ne kamata o tali‵tonu a nisi tino ki ana pati kae ko nisi tino ne seki tali‵tonu. 25  Ona ko te kese‵kese o olotou manatu, ne kamata ei o fakatau olo atu latou kea‵tea, kae ne fai atu ne Paulo a te manatu e tasi tenei: “Ne faipati ‵tonu atu te agaga tapu ki otou tupuga e auala i te pelofeta ko Isaia, 26  ana muna, ‘Fano ki tino konei kae fai atu: “Ka lagona eiloa ne koutou kae ka se malama‵lama; kae ka ‵kilo atu eiloa koutou kae ka se lavea ne koutou.+ 27  Me i tino konei e loto ma‵keke, ko oti ne lagona ne latou ki olotou taliga kae e se fia ‵saga atu ki ei, kae ko ‵moe olotou mata ko te mea ke se lavea eiloa ne latou ki olotou mata kae ke se lagona ki olotou taliga kae ke se malama‵lama olotou loto kae ‵fuli mai, ke faka‵lei ne au latou.”’+ 28  Tela la, fai ke na iloa ne koutou i te fakaolataga tenei mai i te Atua ko oti ne fakaoko atu ki tino o fenua fakaa‵tea;+ ka faka‵logo eiloa latou ki ei.”+ 29 * —— 30  Ne nofo a ia i tena fale ‵togi i tausaga e lua,+ kae talimalo faka‵lei atu a ia ki tino katoa kolā ne āsi atu ki a ia, 31  kae talai atu te Malo o te Atua ki a latou kae akoako atu a mea e uiga ki te Aliki ko Iesu Keliso mo te saolotoga lasi ‵ki,+ e aunoa mo se mea e fakalavelave atu ki a ia.

Fakamatalaga mai lalo

Eleni Diʹke, kāti e fakasino atu ki te atua fafine o te fakamasinoga tonu io me ki te fakamasinoga tonu eiloa.
Onoono ki te MF A3.