Galuega a Apositolo 26:1-32

  • Ko ‵pulu ne Paulo a ia eiloa i mua o Akelipa (1-11)

  • Ko fakamatala atu ne Paulo tena ‵fuliga (12-23)

  • Tali a Feso mo Akelipa (24-32)

26  Ne fai atu a Akelipa+ ki a Paulo: “Ko saoloto nei koe o faipati mai e uiga ki a koe eiloa.” Tenā ne ‵fola atu ei a te lima o Paulo kae kamata o faipati atu:  “Te Tupu ko Akelipa, ko fiafia au i te aso nei o tu atu i ou mua o fakamatala atu a mea katoa kolā ne ‵losi mai ne tino Iutaia+ e uiga ki a au,  ona ko te lasi o tou iloa i tuu masani mo kinauga i va o tino Iutaia. Tela la, e fakamolemole atu au ke fakalogologo mai koe ki a au mo te kufaki.  “E tonu, e iloa ne tino Iutaia katoa a te auala ne ola aka ei au talu mai te taimi koi talavou ei au i toku fenua e pelā foki mo Ielusalema,+  me i a latou ne masani mo au i aso mua, kae e mafai o molimau atu latou me i a au ne ola e pelā me se Falesaio,+ ko te ‵toe vaega faigata eiloa o ‵tou lotu.+  Kae nei la, ko fakamasino au ona ko toku fakamoemoe ki te folafolaga telā ne fai ne te Atua ki ‵tou tupuga;+  ko te fakamoemoega foki eiloa tenei e fakamoe‵moe ki ei a ‵tou matakāiga e 12 ke fakataunu mai i te tukuatuga o te taviniga tapu ki a ia i po mo ao. Tenei eiloa a te fakamoemoega e ‵losi mai ne tino Iutaia ki a au,+ e te Tupu.  “Kaia e faigata ei o tali‵tonu koutou me e faka‵tu aka ne te Atua a tino ‵mate?  Au se tokotasi telā ne mafaufau ifo me e ‵tau eiloa o fai ne au ne ‵tekeatuga e uke ki te igoa o Iesu te Nasaleta. 10  Tenā eiloa te mea ne fai ne au i Ielusalema, kae ne ‵loka ne au a tino tapu e tokouke i falepuipui,+ me ne maua ne au te taliaga mai i faitaulaga pule;+ kae i te taimi ka tamate ei latou ne ‵lago atu foki au ki ei. 11  Ne fakasala sāle ne au latou i taimi e uke i sunako katoa kae ne taumafai o faimālō ne au a latou ke tiaki te lotou talitonuga. Kae ona ko te lasi o toku kaitaua ki a latou, ne fanatu eiloa au ki nisi fakai o fakasaua latou i ei. 12  “I te faiga o mea konei ne faimalaga atu au ki Tamaseko kae ko oti ne maua ne au te saolotoga mo te fakatonuga a faitaulaga pule, 13  kae i te tutonu ne lavea ei ne au, e te Tupu, a te mainaga mai te lagi telā e maina atu i te la, kae ne sulu mai ki oku feitu katoa e pelā foki mo tino kolā ne faima‵laga fakatasi mo au.+ 14  Kae i te taimi ne ‵siga ei matou katoa ki lalo ne lagona ne au se leo e faipati mai ki a au i te ‵gana Epelu: ‘Saulo, Saulo, kaia e fakasaua mai ei koe ki a au? A te aka atu faeloa ki fiti makai‵kai e fai ei ke faigata ki a koe.’ 15  Ne fai atu au, ‘Ko oi koe, e te Aliki?’ Kae ne fai mai te Aliki, ‘Au ko Iesu telā e fakasaua ne koe. 16  Kae tu nei ki luga. Tenei te pogai ne fakasae mai ei au ki a koe, ke filifili koe mo fai se tavini mo se molimau ki mea ko oti ne lavea ne koe mo mea ka fakaasi atu ne au e uiga ki a au.+ 17  Kae ka fakasao ne au a koe mai tino konei, e pelā foki mo fenua fakaa‵tea kolā ka uga atu ne au a koe ki ei+ 18  ke faka‵pula olotou mata,+ ke ‵fuli latou mai te pouliga+ ki te mainaga+ kae mai te pulega a Satani+ ki te pulega a te Atua, ko te mea ke fakamagalo olotou agasala+ kae ke maua ne latou a te meaalofa a te Atua telā e tuku atu ki tino kolā ko oti ne fakatapu ne ia, ona ko te lotou fakatuanaki ki a au.’ 19  “Tela la, e te Tupu ko Akelipa, au ne seki ‵teke ki te fakaasiga mai te lagi, 20  kae ne mua atu au o talai te fekau ki tino i Tamaseko+ kae ‵soko atu ki ei ko tino i Ielusalema,+ mo koga katoa i Iuta, mo fenua fakaa‵tea ko te mea ke sala‵mo latou kae ‵fuli atu ki te Atua mai te faiga o galuega e fakaasi mai ei te salamō.+ 21  Tenei te pogai ne puke ei au ne tino Iutaia i te faletapu kae taumafai o tamate au.+ 22  Kae ona ko te mea ko oti ne maua ne au te fesoasoani mai te Atua, e tumau eiloa au i te molimau atu i te aso nei ki tino fatauva mo tino ma‵luga. Ne talai atu fua ne au a mea kolā ne fai mai ne te kau Pelofeta mo Mose me ka fakataunu+ 23  me ka puapuagatia+ a te Keliso, kae pelā me ko te tino muamua ke fakatu mai i te mate,+ ka fanatu eiloa a ia o folafola atu te mainaga tenei ki tino konei e pelā foki mo fenua fakaa‵tea.”+ 24  Kae koi faipati atu ne Paulo a mea konei ke ‵pulu ei a ia, ne faipati mai a Feso i se leo maluga: “A koe ko fakavalevale e Paulo! Ko fakavalevale koe ona ko te lasi o tau sukesuke!” 25  Kae ne fai atu a Paulo: “Tou ‵Malu e Feso, au e se fakavalevale, kae e fai atu fua ne au a muna ‵tonu mo te mafaufau ‵lei. 26  Se mea tonu, i te tupu telā e faipati au ki ei e iloa ‵lei ne ia a mea konei; e talitonu au me e seai se mea i mea konei e se iloa ne ia, me e seai se mea i mea konei ne fai ‵funa.+ 27  E talitonu koe, e te tupu ko Akelipa, ki te kau Pelofeta? E iloa ne au me e talitonu koe ki ei.” 28  Kae ne fai atu a Akelipa ki a Paulo: “Ko pili eiloa o ‵fuli ne koe au mo fai se Kelisiano.” 29  Ne fai atu a Paulo: “Au e ‵talo ki te Atua faitalia me i se taimi toetoe io me i se taimi leva, ka fai eiloa koe e pelā foki mo tino katoa konei e fakalogo‵logo mai ki a au i te aso nei e penei mo au e aunoa mo saisaiga konei.” 30  Tenā ne tu aka ei te tupu e pelā foki mo te kovana mo Pelenike mo tāgata kolā ne saga‵saga fakatasi mo latou. 31  Kae i te lotou ologa, ne fai‵pati latou i a latou eiloa: “E seai se mea e ‵tau o mate io me saisai ei te tagata tenei.”+ 32  Tenā ne fai atu ei a Akelipa ki a Feso: “Moi ne seki toe tagi a te tagata tenei ki a Kaisala penei ko oti ne fakasaoloto a ia.”+

Fakamatalaga mai lalo