Galuega a Apositolo 25:1-27

  • Ko fakamasino a Paulo i mua o Feso (1-12)

    • “Au e toe tagi ki a Kaisala!” (11)

  • Ko fesokotaki a Feso mo te Tupu ko Akelipa (13-22)

  • Paulo i mua o Akelipa (23-27)

25  Tela la, i te tolu o aso mai tua ifo o te okoatuga a Feso+ ki te kogā fenua telā ka pule a ia i ei, ne fanatu a ia ki Ielusalema mai Kaisaleia.  Kae ne tuku atu ne faitaulaga pule mo tāgata takutakua o te kau Iutaia a fakamatalaga e uiga ki a Paulo ki a ia.+ Ne kamata o fakatagi atu latou ki a Feso  kae fai atu te lotou fakamolemole ke ‵kami mai a Paulo ke vau ki Ielusalema. Kae ko oti ne fai ne latou se togafiti ke tamate ne latou a Paulo i tafa o te auala.+  Kae ne tali atu a Feso me e ‵tau o tausi a Paulo i Kaisaleia kae ko pili o toe foki atu a ia ki konā.  Ne fai atu a ia: “Tela la, fai ke olo fakatasi matou mo takitaki o koutou ke ‵losi atu ki a ia, māfai e tonu e isi se mea ‵se ne fai ne te tagata tenei.”+  I te otiga o aso e valu io me e sefulu ne ‵nofo ei a ia mo latou, ne toe foki ifo a ia ki Kaisaleia, kae i te suā aso ne sagasaga a ia i luga i te nofoga fakamasino kae fakatonu atu ke aumai a Paulo ki loto.  I tena uluatuga ki loto, ne ‵tu fakatamilo atu i ana tafa a tino Iutaia kolā ne o‵mai mai Ielusalema o fakaasi atu ana agasala ‵mafa e uke kolā e seai ne olotou fakamaoniga ki ei.+  Kae ne tali atu a Paulo: “Au e seki agasala eiloa ki te Tulafono a tino Iutaia io me ki te faletapu io me ki a Kaisala.”+  Ona ko tena manakoga ke talia a ia ne tino Iutaia,+ ne tali atu a Feso ki a Paulo: “E manako koe o fano ki Ielusalema ke fakamasino ne au a koe i ei e uiga ki mea konei?” 10  Kae ne fai atu a Paulo: “Ko tu atu nei au i mua o te nofoga fakamasino o Kaisala, ko te koga telā e ‵tau o fakamasino i ei au. E seai se mea ‵se ne fai ne au ki tino Iutaia, e pelā eiloa mo te mea ko iloa ‵lei ne koe. 11  Kafai au ne agasala eiloa kae ko oti ne fai ne au se mea e ‵tau ei au o mate,+ e lotomalie eiloa au ke mate; kae kafai e seai se mea e tonu i ‵losiga ne fai ne tāgata konei ki a au, e seai se tino e mafai o tuku atu ne ia au ke fakafiafia atu fua ki a latou. Au e toe tagi ki a Kaisala!”+ 12  Tenā ne tali atu ei a Feso i te otiga ne fai‵pati mo tino fakatonutonu o te fono: “Ko oti ne toe tagi koe ki a Kaisala; ka fano eiloa koe ki a Kaisala.” 13  I nai aso mai tua ifo i ei, ne āsi fakaaloalo atu a te tupu ko Akelipa mo Pelenike ki a Feso i Kaisaleia. 14  I te taimi ne ‵nofo atu ei a lāua i konā i aso e tai uke, ne fakaasi atu ne Feso ki te tupu a mea e uiga ki a Paulo, ana muna: “E isi se tagata ne ‵loka ne Filiki i te falepuipui, 15  kae i taku nofoga i Ielusalema ne aumai ne faitaulaga pule mo toeaina o Iutaia a fakamatalaga e uiga ki a ia,+ kae fakamolemole mai ou tāgata ke fakasala a ia. 16  Kae ne tali atu au ki a latou me e seai se fakatokaga a te malo o Loma ke fakasala se tino ke faka‵lei aka fua i ei olotou loto kae koi tuai o fakafesagai atu a te tagata tenā mo tino kolā ne fai olotou ‵losiga e uiga ki a ia; kae tuku atu foki se avanoaga ke fai ana fakamasakoga ke sao ei a ia.+ 17  Tela la, i te taimi ne oko mai ei latou ki konei, ne seki fakatalave eiloa au, kae i te suā aso ne sagasaga au i te nofoga fakamasino kae fakatonu atu ke aumai a te tagata tenā. 18  Ne ‵tu aka a tino kolā ne fai olotou ‵losiga, kae e seai eiloa ne olotou fakatalitonuga ki mea ma‵sei kolā ne mafaufau au me ne fai ne ia.+ 19  Ne kinau mai fua latou ki a ia e uiga ki te lotou tapuakiga fakalotu+ e pelā foki mo te tino e igoa ki a Iesu telā ko mate kae ne fai mai faeloa a Paulo me ko toe ola mai.+ 20  Ona ko toku ‵numi i te auala ka faka‵lei aka ei a te kinauga tenei, ne fesili atu au me e mata, e fiafia a ia o fano ki Ielusalema ke fakamasino a ia i ei e uiga ki mea konei.+ 21  Kae i te taimi ne toe tagi ei a Paulo ke tausi a ia i te falepuipui ke maua te ikuga a te Tupu ‵Malu,+ ne fakatonu atu au ke tausi a ia ke oko ki te taimi e ave ei ne au a ia ki a Kaisala.” 22  Tenā ne fai atu ei a Akelipa ki a Feso: “Au e manako eiloa o fakalogologo ki te tagata tenā.”+ Ne fai atu a Feso, “Ka fakalogologo eiloa koe ki a ia i te aso taeao.” 23  I te suā aso, ne olo atu ei a Akelipa mo Pelenike, ne fakaaloalogina malosi lāua kae ulu atu ki loto i te fale fono fakatasi mo takitaki kautau e pelā foki mo tāgata ma‵luga o te fakai, kae mai te fakatonuga a Feso, aumai ei a Paulo ki loto. 24  Kae ne fai atu a Feso: “Te tupu ko Akelipa mo koutou katoa kolā ko fakatasi mo matou i te taimi tenei, ko lavea ne koutou a te tagata telā ne fakamolemole mai ei a tino Iutaia katoa i Ielusalema penā foki loa mo te koga tenei, kae ne ka‵laga mai latou me e se ‵tau o toe ola a ia.+ 25  Kae ne iloa ne au me e seai se mea ne fai ne ia e ‵tau ei o tamate a ia.+ Tela la, i te taimi ne toe tagi ei te tagata tenei ki te Tupu ‵Malu, ne fakaiku aka ne au ke uga atu eiloa a ia. 26  Kae e seai se mea mautinoa e uiga ki a ia ke tusi atu ne au ki toku Aliki. Tenā ne aumai ei ne au a ia ki mua o koutou katoa, kae maise eiloa ki mua o koe, e te Tupu ko Akelipa, ko te mea kafai ko oti te iloiloga tenei, kāti ka isi se mea e mafai o tusi atu ne au. 27  Me e sē se mea ‵lei ke uga atu ne au se pagota e aunoa mo te fakaasi atu o ‵losiga e uiga ki a ia.”

Fakamatalaga mai lalo