Galuega a Apositolo 24:1-27

  • ‵Losiga ‵se ne fai ki a Paulo (1-9)

  • Ko ‵pulu ne Paulo a ia eiloa i mua o Filiki (10-21)

  • Ne taofi te fakamasinoga o Paulo mō se lua tausaga (22-27)

24  I aso e lima mai tua ifo i ei ne olo atu a te faitaulaga sili ko Anania+ mo nisi toeaina mo te loia ko Tetulo, kae fai olotou tagi e uiga ki a Paulo ki te kovana.+  I te okomaiga o tou tagata, ne kamata o ‵losi atu a Tetulo e uiga ki a Paulo, ana muna: “Ona ko te mea e maua ne matou te filemu e auala i a koe mo fakamafuli‵fuliga konei e fai i te fenua ona ko tou matapulapula,  e fakatalitonu ne matou a mea katoa konei, Tou ‵Malu e Filiki, i taimi mo koga katoa mo te loto fakafetai lasi.  Kae ko te mea ke se fakalavelave atu au ki a koe, e fakamolemole atu au ke fakalogologo malie mai koe mo te atafai ki a matou.  Ko oti ne maua ne matou a te tagata tenei se tagata faka‵tupu fakalavelave+ kae e fakaoso ne ia a tino Iutaia i te lalolagi nofoaki kātoa ke ‵teke ki te malo+ kae e takitaki foki ne ia a te potukau fakalotu a te kau Nasaleta.+  Ne taumafai foki a ia o sonafai valevale a te faletapu, kae ne puke ne matou a ia.+ 7 * ——  Kafai e fakamasino ne koe a ia ka iloa ei ne koe a mea katoa konei e ‵losi atu ne matou ki a ia.”  Ona ko te mea tenā, ne ‵kau atu foki a tino Iutaia ki te ‵losiga tenā, kae kinau atu me e ‵tonu eiloa a pati konā. 10  I te taimi ne kalo atu ei te ulu o te kovana ki a Paulo ke faipati, kae ne tali atu a ia: “E iloa ne au me ko oti koe ne fai mo famasino i te fenua tenei i tausaga e uke. Tela la, ko toka ‵lei au o fai atu taku fakamasakoga ke sao ei au.+ 11  Me e mafai o iloa ne koe me fatoa kātoa nei te 12 o aso talu mai te taimi ne fanatu ei au o tapuaki i Ielusalema;+ 12  kae ne seki maua aka eiloa ne latou au e kinau mo se tino i loto i te faletapu io me ne fakatupu ne au se fakalavelave ki te vaitino i loto i sunako io me i te fakai kātoa. 13  E se mafai foki ne latou o fakatalitonu atu ki a koe i te taimi nei a mea kolā e ‵losi mai ne latou ki a au. 14  Kae e fakaasi ‵tonu atu ne au a te mea tenei ki a koe, me i te mea telā e fakaigoa ne latou ki te ‘potukau fakalotu,’ ko te auala eiloa tenā e tuku atu ei ne au a te taviniga tapu ki te Atua o oku tupuga,+ me e talitonu au ki mea katoa kolā e fakaasi mai i te Tulafono mo tusi a te kau Pelofeta.+ 15  Kae e isi soku fakamoemoega mai te Atua, ko te fakamoemoega foki telā e fakamoe‵moe ki ei a tāgata konei, me ka toe‵tu+ mai a tino amio‵tonu mo tino sē amio‵tonu.+ 16  Ona ko te mea tenei e taumafai faeloa au ke maua se loto lagona ‵ma i mua o te Atua mo tino.+ 17  Mai tua o tausaga e uke, ne fanatu au o tuku atu a meaalofa+ ki toku fenua kae ofo atu foki a taulaga. 18  Kae koi fai ne au a mea konei, ne maua ne latou au i te faletapu+ kae ko oti au ne faka‵ma e ‵tusa mo te Tulafono, kae e seai eiloa se vaitino i ei io me se fakalavelave ne tupu. Kae e isi ne nai tino Iutaia mai te kogā fenua o Asia 19  kolā e ‵tau o ‵tu i ou mua i te taimi tenei māfai e isi ne olotou ‵losiga e fia fai mai e uiga ki a au.+ 20  Io me fai atu ki tāgata konei ke fai mai eiloa ne latou me se a te mea ‵se ne fai ne au i te taimi ne tu atu ei au i mua o te Sanetulini, 21  i tafa o aku pati konei ne fai kae koi tu atu au i olotou mua: ‘Ona ko te toetu mai te mate ko fakamasino ei au ne koutou i te aso nei!’”+ 22  Kae ona ko te mea e iloa ‵lei ne Filiki a mea ‵tonu e uiga ki te Ala+ o te Aliki, ne taofi ne ia te fakamasinoga kae fai atu: “Ka fai ne au se fakaikuga e uiga ki mea konei mai i a koutou māfai e oko mai ki konei a Lusia te takitaki kautau.” 23  Kae ne fakatonu atu a ia ki te ofisa o te kautau ke tausi a Paulo i te falepuipui kae tuku atu se tamā saolotoga ki ei, kae ke talia ana tino ke fesoasoani atu ki a ia. 24  I nai aso mai tua ifo, ne o‵mai a Filiki mo tena avaga ko Tusila, se fafine Iutaia kae ne ‵kami mai ne ia a Paulo kae fakalogologo ki a ia e faipati ki te talitonuga e uiga ki a Keliso Iesu.+ 25  Kae koi faipati a Paulo e uiga ki faifaiga amio‵tonu mo te loto pulea mo te fakamasinoga telā ka oko mai,+ ne mataku a Filiki kae tali atu: “E ‵lei ke fano koe kea‵tea mō te taimi nei, kae kafai e maua ne au se avanoaga ‵lei ka toe ‵kami mai ne au a koe.” 26  Ne fakamoemoe foki a ia i te taimi tenā ke avatu ne Paulo ne tupe ma ia. Ona ko te mea tenā ne ‵kami mai faeloa ne ia a Paulo ko te mea ke sau‵tala lāua. 27  Mai tua o tausaga e lua ne sui a Filiki ne Pokio Feso; kae ona ko te mea ne fia maua ne Filiki te taliaga mai tino Iutaia,+ ne tiakina ne ia a Paulo ke nofo i te falepuipui.

Fakamatalaga mai lalo

Onoono ki te MF A3.