Galuega a Apositolo 23:1-35

  • Ko faipati Paulo i mua o te Sanetulini (1-10)

  • Ko fakamalosi aka Paulo ne te Aliki (11)

  • Se togafiti masei ke tamate a Paulo (12-22)

  • Ko avatu a Paulo ki Kaisaleia (23-35)

23  Ne kilo ‵tonu atu a Paulo ki te kau o te Sanetulini kae fai atu: “Taina, ko oti ne fai ne au a mea katoa i mua o te Atua mo toku loto lagona e ‵ma+ pakipaki ke oko mai eiloa ki te aso nei.”  Ona ko ana pati konā ne fakatonu atu a te faitaulaga sili ko Anania ki a latou kolā e ‵tu i ana tafa ke ‵pa atu ana gutu.  Tenā ne fai atu ei a Paulo ki a ia: “A koe ka ‵pa ne te Atua, e te ‵pui ne vali ke ‵kena. E a, e sagasaga koe o fakamasino au e ‵tusa mo te Tulafono kae e soli foki ne koe te Tulafono mai tau fakatonuga ke ‵pa au?”  Ne fai atu a tino kolā e ‵tu i ana tafa: “E a, ko se āva koe ki te faitaulaga sili a te Atua?”  Kae ne fai atu a Paulo: “Oku taina, e se iloa ne au i a ia ko te faitaulaga sili. Me e tusi i te tusi, ‘E se ‵tau o taku fakamasei ne koe se tino pule.’”+  I te iloaga ne Paulo i te vaega e tasi o latou ne Satukaio kae ko te suā vaega ne Falesaio, ne pakalaga atu ei a ia i loto i te Sanetulini: “Taina, au se Falesaio,+ se tama a te kau Falesaio. Ko fakamasinogina au e uiga ki te fakamoemoega ko te toetu.”  Ona ko ana pati konei ne sae aka ei se kinauga i te va o te kau Falesaio mo te kau Satukaio, kae ne vaelua ei te fakapotopotoga.  Me e fai mai te kau Satukaio me e seai se toetu io me ne agelu io me ne agaga, kae ko te kau Falesaio e talia ne latou a mea katoa konā.+  Ne fakatau paka‵laga latou, kae ne ‵tu mai a failautusi o te kau Falesaio kae kamata o kinau mālō mai, olotou muna: “E seai se mea ‵se e maua ne matou i te tagata tenei, kae kafai ne faipati ki a ia se agaga io me se agelu+—.” 10  Ne gasolo aka eiloa o malosi te kinauga, kae ne mataku a te takitaki kautau i te mea ma saesae likiliki ne latou a Paulo. Fakatonu atu ei a ia ke olo a sotia o puke mai a Paulo kea‵tea mai i a latou kae aumai ki te koga e ‵nofo ei a sotia. 11  Kae i te po tenā ne tu atu te Aliki i ana tafa kae fai atu: “Ke loto malosi koe!+ E pelā eiloa mo te molimau maea ko oti ne tuku atu ne koe e uiga ki a au i Ielusalema, e ‵tau foki mo koe o tuku atu se molimau penā i Loma.”+ 12  I te taeaoakaga, ne fakatoka ne tino Iutaia se togafiti kae fai foki te lotou tautoga, ke se ‵kai io me inu latou seiloga ke oti ne tamate ne latou a Paulo. 13  E silia atu i te toko 40 tāgata ne aofia i te togafiti tenei kae fai olotou tautoga. 14  Ne olo atu a tāgata konei ki faitaulaga pule mo toeaina kae fai atu: “Ko oti ne tau‵to matou ke se ‵kai eiloa ki se meakai seiloga ke oti ne tamate ne matou a Paulo. 15  Tela la, e ‵tau o fakailoa atu ne koutou fakatasi mo sui o te Sanetulini ki te takitaki kautau me e ‵tau o aumai ne ia a Paulo ki a koutou, e pelā eiloa mo te otou manakoga ke iloilo faka‵lei a ia. Kae ka ‵nofo fakatali‵tali matou o tamate a ia māfai ko pili mai.” 16  Kae ne lagona ne te tama tagata a te tuagane o Paulo a te lotou togafiti, fanatu ei ki loto i te koga e ‵nofo ei sotia kae fakailoa atu te mea tenā ki a Paulo. 17  Tenā ne kalaga atu ei a Paulo ki se ofisa o te kautau e tokotasi kae fai atu: “Avatu te tamataene tenei ki te takitaki kautau me e isi se mea e fia fakailoa atu ne ia ki a ia.” 18  Ne aumai a ia ne te ofisa kae avatu ki te takitaki kautau kae fai atu: “Ne kalaga mai ki a au te pagota ko Paulo kae fakamolemole mai ke aumai ne au te tamataene tenei ki a koe, me e isi se mea e fia fakailoa atu ne ia ki a koe.” 19  Ne puke ne te takitaki kautau tena lima kae ‵taki atu kea‵tea kae fesili atu: “Se a te mea e ‵tau o fakailoa mai ne koe ki a au?” 20  Ana muna: “Ko oti ne aofaga fakatasi a tino Iutaia ke fakamolemole atu ki a koe ke avatu a Paulo ki te Sanetulini ma taeao ko te mea ke iloa ne latou a nisi fakamatalaga e uke atu e uiga ki a ia.+ 21  Ke mo a eiloa ma talia ne koe te lotou fakamolemole, me e silia atu i te toko 40 tāgata kolā e ‵muni ke ta ne latou a ia, kae ko oti ne tau‵to latou ke se ‵kai io me inu seiloga ke oti ne tamate ne latou a ia;+ kae ko toka nei latou, kae faka‵tali ki tau ikuga.” 22  Ne uga atu ne te takitaki kautau a te tamataene tenā ke fano kae fakatonu atu ki a ia: “Sa fai atu ki se tino me ko oti ne fakaasi mai ne koe a te mea tenei ki a au.” 23  Ne ‵kami mai ne ia a ofisa o te kautau e tokolua kae fai atu: “Fakatoka ne sotia e toko 200 ke māti ‵tonu atu ki Kaisaleia, e pelā foki mo tāgata e faka‵tele solofanua e toko 70 mo tāgata e tau ki tao e toko 200, ke toka i te tolu o itula i te po nei.* 24  Fakatoka foki ne solofanua ke tele i ei a Paulo ke oko faka‵lei atu ki te kovana ko Filiki.” 25  Kae ne tusi atu ne ia se tusi i pati konei: 26  “Au ko Kalaotia Lusia ko tusi atu ki Tou ‵Malu, te Kovana ko Filiki: Talofa! 27  A te tagata tenei ne puke ne tino Iutaia kae toeitiiti ko tamate ne latou a ia, kae ne o‵mai fakavave au mo aku sotia o fakasao a ia,+ me ne iloa ne au i a ia se tino Loma.+ 28  Kae ona ko te fia iloa ne au a te pogai e ‵losi atu ei latou ki a ia, ne ave ne au a ia ki te lotou Sanetulini.+ 29  Ne maua aka ne au me ne ‵losi atu latou ki a ia e uiga ki te lotou Tulafono,+ kae e seai se mea e tasi e ‵tau ei o tamate a ia io me ‵pei ki te falepuipui. 30  Kae ona ko te mea ko oti ne fakaasi mai ki a au te lotou togafiti ke tamate a ia,+ ko uga fakavave atu ne au a ia ki a koe, kae fakatonu atu au ki tino kolā e isi ne olotou tagi ki a ia ke fai‵pati atu ki a koe.” 31  Ne puke ne sotia konei a Paulo+ e ‵tusa mo fakatonuga ki a latou kae aumai a ia ki Anipateli i te po. 32  I te suā aso ne talia ne latou a tāgata faka‵tele solofanua ke olo mo ia, kae ne toe ‵foki atu latou ki te koga e ‵nofo ei a sotia. 33  Ne ulu atu a tāgata faka‵tele solofanua ki Kaisaleia kae tuku atu te tusi ki te kovana kae tuku atu foki a Paulo ki a ia. 34  Ne faitau ne te kovana te tusi kae fesili atu me ko ia se tino mai fea kae ne iloa aka ne ia me i a ia se tino mai Kilikia.+ 35  Ne fai atu a ia: “Ka fakamasino faka‵lei ne au a koe māfai e oko mai a tino kolā e isi ne olotou tagi ki a koe.”+ Kae ne fakatonu atu a ia ke tausi a Paulo i te palesi o Helota.

Fakamatalaga mai lalo

Telā kāti ko te 9:00 i te po.