Galuega a Apositolo 21:1-40
21 I te otiga ne fakamavae atu matou ki a latou, folau ‵tonu atu ei te motou vaka ki Ko, i te suā aso ne oko atu matou ki Lotesi, kae mai i konā olo atu ei ki Patala.
2 Kae i te mauaga ne matou se vaka e fano ki Foinikia, ‵sopo ei matou o fo‵lau i ei.
3 Ne lavea atu ne matou a te fenua ko Kupelu mai i te feitu fakamaui kae ne fo‵lau atu eiloa matou ki Sulia, kae ne oko atu ki Tulo ke laku ifo a kako i ei.
4 Ne ‵sala atu matou ki te kau soko kae ne ‵nofo matou i konā i aso e fitu. Kae e auala i te agaga, ne fai atu faeloa latou ki a Paulo ke mo a ma fanatu ki Ielusalema.+
5 I te otiga o te motou ‵nofoga mo latou, fano ei te motou malaga. Ne o‵mai latou katoa, fakatasi mo fāfine mo tama‵liki o olo tasi mo matou ke oko eiloa ki tua mo te fakai. Ne to‵tuli ifo matou i te tafatai o ‵talo
6 kae fakatofa atu ki a latou taki tokotasi. Tenā ne ‵sopo ei matou ki te vaka kae toe ‵foki atu latou ki olotou fale.
7 Ne fo‵lau matou mai Tulo kae oko atu ki Tolumai. Ne fakafetaui atu matou ki te kautaina kae ne ‵nofo matou i konā i se aso e tasi.
8 Ne toe ma‵laga atu matou i te suā aso kae oko atu ki Kaisaleia. Ne ulu atu matou ki loto i te fale o Filipo, te tino talai, telā se tokotasi o tāgata e tokofitu+ kolā ne filifiligina, kae ne ‵nofo matou mo ia.
9 A te tagata tenei e tokofa ana tama fāfine e seki a‵vaga, kolā e fai valoaga.+
10 Kae mai tua o nai aso ne ‵nofo ei matou i konā, ne oko mai se pelofeta e igoa ki a Akapasi+ mai i Iuta.
11 Kae ne vau a ia ki a matou kae puke ne ia te fusi o Paulo, saisai ana vae mo ana lima kae fai mai: “Ne fai mai a te agaga tapu, ‘A te tagata telā i o ia te fusi tenei ka saisai eiloa penei ne tino Iutaia i Ielusalema,+ kae ka tuku atu a ia ne latou ki lima o tino o fenua fakaa‵tea.’”+
12 I te lagonaga ne matou a te mea tenei, ne kamata o fakatagi atu matou mo tino ne ‵nofo atu i konā ki a ia ke mo a ma fano ki Ielusalema.
13 Tenā ne tali atu ei a Paulo: “Kaia e ‵tagi mautuutu ei koutou kae taumafai o fakavāivāi au?* Tali‵tonu mai, au ko toka ke saisai au kae ke mate foki i Ielusalema mō te igoa o te Aliki ko Iesu.”+
14 I te taimi ne seki mafai ei o taofi ne matou a ia, ne fakagata te motou ‵teke atu* kae fai atu: “Ke fai eiloa te loto o Ieova.”
15 I te otiga o aso konā, fakatoka ei matou mō te malaga kae olo atu ki Ielusalema.
16 Ne olo fakatasi matou mo nisi soko mai Kaisaleia o avatu matou ki te fale o Masoni mai Kupelu, se soko mua e tokotasi telā ka ‵nofo matou i ei.
17 I te motou okoatuga ki Ielusalema ne talimalo matou ne taina i ei mo te fia‵fia.
18 Kae i te suā aso ne olo atu matou mo Paulo ki a Iakopo,+ kae ne ‵nofo mai foki i konā a toeaina katoa.
19 Ne fakatalofa atu a ia ki a latou kae kamata o fakamatala likiliki atu a tala e uiga ki mea kolā ne fai ne te Atua mō fenua fakaa‵tea e auala i tena galuega.
20 I te otiga ne lagona ne latou a te mea tenei, tavae atu ei ki te Atua kae fai atu latou ki a ia: “Taina, e lavea ne koe a te fia afe o tino tali‵tonu i tino Iutaia, kae e loto finafinau katoa latou ki te Tulafono.+
21 Kae ne ‵logo latou me ne akoako ne koe a tino Iutaia katoa kolā e ‵nofo i fenua fakaa‵tea ke fulitua ki te tulafono* a Mose, kae fai atu ki a latou ke se pilitome olotou tama‵liki io me tau‵tali i tuu masani.+
22 Se a la te mea e ‵tau o fai? Ka ‵logo eiloa latou i a koe ko oko mai.
23 Tela la, fai a te mea e fai atu ne matou: E tokofa tāgata mai i a matou kolā e isi ne olotou tautoga ko oti ne fai.
24 Olo mo tāgata konei kae faka‵ma fakatasi atu koe mo latou e ‵tusa mo te Tulafono kae ke ‵togi ne koe a tupe e manakogina ne latou, ko te mea ke mafai o ‵vele olotou ulu. Tenā ko iloa ei ne tino katoa me e se tonu te tala ne fai atu ki a latou e uiga ki a koe, kae e sasale eiloa koe i te auala tonu, kae ne tausi foki ne koe te Tulafono.+
25 Kae e pelā mo tino tali‵tonu mai fenua fakaa‵tea, ko oti ne avatu ne matou ki a latou i se tusi te motou fakaikuga ke ‵kalo kea‵tea latou mai mea ne ofo ki tupua+ e pelā foki mo toto,+ mai i manu ne ‵kumi a ua*+ kae mai i amioga fakatauavaga sē ‵tau.”*+
26 Tenā ne ave ei ne Paulo a tāgata konei i te suā aso kae ne faka‵ma a ia e ‵tusa mo te Tulafono fakatasi mo tāgata konā,+ kae ne fanatu a ia ki loto i te faletapu ke fakailoa atu a te taimi ka oti ei a aso o te faka‵māga, mo te taimi ke ofo atu ei a taulaga mō latou taki tokotasi.
27 Ko pili o oti atu a aso e fitu, kae i te laveaga ne tino Iutaia mai Asia a ia i loto i te faletapu ne fai ne latou ke kaitāua valevale a te vaitino, kae ne puke ne latou a ia,
28 kae paka‵laga atu: “Tāgata Isalaelu, fesoasoani mai! Tenei te tagata e akoako ne ia a tino i koga katoa ke ‵teke mai ki ‵tou tino mo ‵tou Tulafono mo te koga tenei. Kae e sili atu i te masei, ne aumai ne ia a tino Eleni ki loto i te faletapu kae ko oti ne fakalailai ne ia te koga tapu tenei.”+
29 Me ne lavea muamua ne latou a Tofimo+ te tino Efeso fakatasi mo Paulo i loto i te fakai, kae ne leake latou me ne avatu ne ia a te tagata tenā ki te faletapu.
30 Ne kaitaua valevale a te fakai kātoa, kae ‵tele fakatasi mai a tino o puke a Paulo kae toso atu a ia ki tua mo te faletapu, kae ne ‵pono fakavave i ei a mataloa katoa.
31 Kae koi taumafai latou o tamate a Paulo kae oko atu te tala ki te takitaki kautau me ko ua‵te valevale a Ielusalema kātoa;
32 kae ne puke fakavave ne ia ne sotia mo ofisa o te kautau kae ‵tele atu ki a latou. I te laveaga ne latou a te takitaki kautau mo sotia, fakagata ei ne latou te ‵tāga o Paulo.
33 Tenā ne fanatu ei te takitaki kautau ki olotou tafa, puke ne ia a Paulo kae fakatonu atu ke saisai a ia ki seni e lua;+ fesilisili atu ei me ko oi te tagata tenā, kae ne a foki ana mea ne fai.
34 Kae ne kamata o paka‵laga mai a nisi tino mai i te vaitino ki se mea e tasi, kae ko nisi tino ki se isi mea. Ona ko te seai o se mea mautinoa ne iloa ne ia me ko ua‵te valevale a tino, ne fakatonu atu a ia ke ave a Paulo ki te koga e ‵nofo ei a sotia.
35 Kae i tena okoatuga ki te kakega, ne sau a ia ne sotia ona ko te kaitāua malosi o te vaitino,
36 me ne tau‵tali atu se vaitino i a latou, kae paka‵laga atu: “Tamate atu a ia!”
37 Kae koi takitaki atu a ia ki loto i te koga e ‵nofo ei a sotia ne fai atu a Paulo ki te takitaki kautau: “E saoloto ke faipati atu au ki a koe?” Ne fai atu a ia: “E iloa ne koe o faipati faka-Eleni?
38 E a, e se ko koe te tino Aikupito telā ne fakaoso ne koe a te ‵tekeatuga ki te malo i aso ko ‵teka kae takitaki ne koe a tāgata ‵ta tino e toko 4,000 i loto i te koga lavaki?”
39 Ne fai atu a Paulo: “A te ‵tonuga loa, au se tino Iutaia+ mai Taso+ i Kilikia, se tino mai se fakai takutakua. Au e fakamolemole atu ke talia mai ke faipati aka au ki tino konei.”
40 I te taliaga ne ia, ne tu atu a Paulo i luga i te kakega kae fakatu atu tena lima ki tino. I te taimi ko se logoa ei, ne faipati atu a ia ki a latou i te ‵gana Epelu,+ ana muna:
Fakamatalaga mai lalo
^ Io me “fakalotovāivāi au.”
^ Eleni, “ne ‵nofo filemu matou.”
^ Eleni, “se faifaiga aposetasi e ‵teke atu ki te.”
^ Io me “ko manu ne tamate kae seki fakasali a toto.”
