Galuega a Apositolo 20:1-38

  • Paulo i Maketonia mo Eleni (1-6)

  • Ko fakatu aka a Eutikasi mai te mate i Teloa (7-12)

  • Mai Teloa ki Mileta (13-16)

  • Ko fetaui Paulo mo toeaina mai Efeso (17-38)

    • Akoako atu mai fale ki fale (20)

    • “Sili atu te fiafia o te tino telā e tuku atu ana mea” (35)

20  I te ‵nogaifoga o te fakalavelave tenā, ne uga atu ei te fekau a Paulo ke o‵mai te kau soko, kae i te otiga ne fakamalosi kae fakatofa atu ki a latou, ne faimalaga atu ei a ia ki Maketonia.  I te otiga ne fano a ia i loto i kogā koga konā o tuku atu a muna fakamalosi e uke ki tino i konā, ne oko atu a ia ki Eleni.  Ne nofo a ia i konā i se tolu masina, kae ona ko te togafiti masei a te kau Iutaia+ ka fai ki a ia i te taimi ne fakatoka ei a ia o folau ki Sulia, ne fakaiku aka ei ne ia ke ui atu a ia i Maketonia i tena auala o foki.  Ne olo fakatasi mo ia a Sopata te tama tagata a Pilasi mai Pelea, Alitako+ mo Sekuno mai Tesalonia, Kaio mai Teipe, Timoteo,+ mo Tukasi+ mo Tofimo+ mai te kogā fenua o Asia.  Ne ‵mua atu a tāgata konei kae faka‵tali mai ki a matou i Teloa.  I te otiga o aso fakamanatu o Falaoa sē Faka‵fete,+ ne fo‵lau atu matou i te vasa mai Filipi, kae oko atu ki a latou i Teloa mai tua o aso e lima, kae ne ‵nofo matou i konā i aso e fitu.  I te aso muamua o te vaiaso, i te taimi ne maopoopo ei matou o ‵kai, ne kamata o lāuga atu a Paulo ki a latou, me i a ia ka fano i te suā aso; kae ne fai tena lāuga ke oko eiloa ki te valuapo.  E uke a moli i te potu i luga telā ne maopoopo ei matou.  E isi se tamataene e igoa ki a Eutikasi ne sagasaga i te famalama kae ne tō tena moe i te taimi koi faipati ei a Paulo, ko te mea eiloa ko tō ifo ki lalo mai te tolu o fogafale, kae puke aka ne latou me ko mate. 10  Ne fanaifo a Paulo ki lalo, takato mai luga i tou tagata, ‵sai+ atu ki a ia kae fai atu: “Sa fakalogoa me ko toe ola mai a ia.”+ 11  Tenā ne toe foki aka ei a ia ki luga, kae kamata o kai. Ne tumau a ia i te sau‵tala mō se taimi tai mata leva ke oko eiloa ki te vaveao, fano ei a ia. 12  Ne puke ne latou te tamataene telā ko toe ola mai kae ne maua ne latou mai i ei a fakamafanafanaga e uke. 13  Ne olo ‵tonu atu matou ki te vaka kae fo‵lau atu ki Aso, ko te koga telā ka puke i ei ne matou a Paulo, me ne fakatonu mai ke fetaui matou i konā, i a ia ne manako o sasale ki ei. 14  I tena okomaiga ki a matou i Aso, ne puke ne matou a ia kae fo‵lau atu ki Metulene. 15  Ne fo‵lau atu matou i te suā aso kae oko atu ki te fenua i te suā feitu o Kiosa, i te aso mai tua ifo ne afe matou i Samosi, kae i te suā aso ne oko atu matou ki Mileto. 16  Ko oti ne fakaiku aka ne Paulo ke se afe atu matou ki Efeso+ ko te mea ke se fakamāumāu ne ia se taimi i te kogā fenua o Asia, me ne fakava‵vave ke oko atu a ia ki Ielusalema+ i te aso o te ‵Kaiga Fiafia o te Penitekoso māfai e mafai. 17  Kae ne uga atu tena fekau mai Mileto ke olo atu ki a ia a toeaina mai te fakapotopotoga i Efeso. 18  I te lotou okoatuga ki a ia, fai atu ei a ia ki a latou: “E iloa ‵lei ne koutou aku mea ne fai i a koutou talu mai te aso muamua ne ‵laka ei oku vae ki te kogā fenua o Asia+ 19  o pologa ki te Aliki mo te loto maulalo+ mo loimata mo tofotofoga kolā ne oko mai ki a au ona ko togafiti a tino Iutaia, 20  kae ne seki taofi ne au mai i a koutou so se mea telā e aoga ki a koutou, kae ne akoako ne au koutou i mua o tino+ e tokouke kae mai fale ki fale.+ 21  Ne tuku atu ne au se molimau maea ki tino Iutaia mo tino Eleni e uiga ki te salamō+ ki te Atua mo te fakatuanaki ki te ‵tou Aliki ko Iesu.+ 22  Kae kiloke! ko fakamalosi mai te agaga o te Atua ke faimalaga au ki Ielusalema, e tiga e se iloa ne au a mea ka ‵tupu ki a au i konā, 23  kae mai fakai ki fakai e molimau mai faeloa a te agaga tapu ki a au, i ana muna me e faka‵tali mai eiloa ki a au a te falepuipui mo puapuaga.+ 24  E tiga te feitu tenā, e se fakatāua ne au toku ola, kae e ‵tau o fakaoti ne au a te fakatau‵telega+ mo te galuega telā ne maua ne au mai te Aliki ko Iesu, ke tuku atu se molimau maea e uiga ki te tala ‵lei o te alofa tauanoa o te Atua. 25  “Kae nei la, ko iloa ne au me i a koutou katoa kolā ne talai ne au ki ei a te Malo ka se toe lavea ne koutou oku mata. 26  Tenā te pogai ne kalaga atu ei au ki a koutou ke molimau koutou i te aso nei me i a au e ‵ma i toto o tino katoa,+ 27  me e seai se mea ne taofi ne au mai i a koutou e uiga ki fuafuaga a te Atua.+ 28  Ke ‵saga tonu ki a koutou+ eiloa mo te lafu mamoe katoa, me ko oti ne filifili koutou ne te agaga tapu ke fai mo ovasia,+ ke tausi te fakapotopotoga a te Atua,+ telā ne ‵togi ne ia ki te toto o tena Tama tonu.+ 29  E iloa ne au me kafai ko fano au kea‵tea, ka ulu mai a kuli vao fe‵kai ki loto i a koutou+ kae ka se fai faka‵lei ne latou te lafu mamoe, 30  kae ka ‵sae mai foki i a koutou eiloa a tāgata kolā ka fai‵pati ki mea sē ‵tonu ke ‵futi atu ei a soko ki a latou.+ 31  “Tela la, ke tumau i te matapula‵pula, kae ke masaua ne koutou me i tausaga e tolu,+ ne seki fakagata eiloa toku fakamalosi atu mo loimata ki a koutou taki tokotasi, i te ao mo te po. 32  Kae nei la, ko tuku atu ne au koutou ki te Atua mo te muna o tena alofa tauanoa, ko te muna telā e ati aka i ei koutou kae tuku atu ki a koutou a te tofi telā e tuku atu ne te Atua ki a latou kolā ne filifili ke fai pelā me ne tino tapu.+ 33  Ne seki manako eiloa au ki siliva io me ki aulo io me ko gatu o se tino.+ 34  E iloa ne koutou me ko lima eiloa konei ne ga‵lue ke maua a mea kolā e ‵tau o maua ne au+ mo mea e ‵tau o maua ne latou kolā e fakatasi mo au. 35  Ko oti ne fakaasi atu ne au ki a koutou a mea katoa me kafai e ga‵lue malosi koutou i te auala tenei,+ e ‵tau mo koutou o fesoasoani atu ki a latou kolā e vāi‵vai, kae e ‵tau o masaua ne koutou a pati a te Aliki ko Iesu, kolā ne fai mai ‘E sili atu te fiafia o te tino telā e tuku atu+ ana mea i lō te maua ne ia.’” 36  I te otiga o ana pati konei, ne to‵tuli ifo a ia fakatasi mo latou katoa kae fai te lotou ‵talo. 37  E tonu, ne ‵tagi mautuutu a latou katoa kae ‵sai kae sogi atu mo te a‵lofa ki a Paulo, 38  me ne fanoa‵noa malosi latou i ana pati ne fai me ka se toe lavea ne latou ana mata.+ Tenā ne ‵taki atu ei ne latou a ia ki te vaka.

Fakamatalaga mai lalo