Galuega a Apositolo 16:1-40

  • Filifili ne Paulo a Timoteo (1-5)

  • Fakaasiga e uiga ki te tagata Maketonia (6-10)

  • ‵Fuliga o Litia i Filipi (11-15)

  • Ko ‵pei a Paulo mo Sila ki te falepuipui (16-24)

  • Ko papatiso te tausi pagota mo tena kāiga (25-34)

  • Te fakatagi a Paulo ke fakatoese faka‵lei mai ki a ia (35-40)

16  Ne oko atu a Paulo ki Teipe e pelā foki mo Lusa.+ Kae e isi se soko i konā e igoa ki a Timoteo,+ te tama a se fafine talitonu telā se Iutaia, kae ko tena tamana se tino Eleni.  Ne taku ‵lei a ia ne taina i Lusa mo Ikonio.  Ne fakaasi atu ne Paulo tena manakoga ke fanatu a Timoteo i a ia, kae ne puke ne ia tou tagata ke pilitome ona ko tino Iutaia kolā e ‵nofo i koga konā+ e iloa ne latou katoa i tena tamana se tino Eleni.  I te taimi e faima‵laga atu ei latou i loto i fakai ne tuku atu ne latou ki tino i konā a fakatonuga kolā ko oti ne fakaiku aka ne te kau apositolo mo toeaina i Ielusalema, ke tau‵tali latou i ei.+  Tela la, ne tumau kae ‵mautakitaki a te fakatuanaki o fakapotopotoga konā kae ne gasolo aka faeloa o tokouke i aso takitasi.  E se gata i ei, ne ma‵laga atu latou i loto i Felukia mo te fenua o Kalatia,+ me ne seki talia ne te agaga tapu ke fai‵pati atu ne latou a te muna i te kogā fenua o Asia.  I tafa i ei, i te lotou okoatuga ki Musia ne taumafai latou o olo atu ki Pitunia+ kae ne seki talia latou ne te agaga o Iesu.  Ne fakaseke ne latou a Musia kae oko atu ki Teloa.  Kae ne oko atu se fakaasiga ki a Paulo i te po—e isi se tagata Maketonia e tu i konā kae fakamalosi atu ki a ia, ana muna: “Vau ki Maketonia o fesoasoani mai ki a matou.” 10  I te laveaga ne ia a te fakaasiga tenā, ne taumafai matou o olo ki Maketonia, me e iloa ne matou me ko fakatonu mai te Atua ke folafola atu ne matou a te tala ‵lei ki tino i konā. 11  Tenā ne fo‵lau atu ei matou mai Teloa kae olo ‵tonu atu ki Samotake, kae i te suā aso ne oko atu matou ki Neapoli. 12  Mai konā ne olo atu ei matou ki Filipi,+ se kolone, telā ko te laumua o te atufenua o Maketonia. Ne ‵nofo matou i te fakai tenei i nai aso. 13  I te Sapati ne olo atu matou ki tua o te mataloa o te ‵pui i tafa o se vaitafe, me ne mafau‵fau matou me e isi se koga i konā e fai ei a ‵talo. Ne saga‵saga matou ki lalo kae fai‵pati atu ki fāfine kolā ne maopoopo i konā. 14  Ne fakalogologo mai i konā se fafine e igoa ki a Litia, se fafine ‵togi laugatu violeta mai te fakai ko Tuatila,+ kae se tino foki e tapuaki ki te Atua. Ne ‵tala ne Ieova tena loto ko te mea ke saga tonu atu ki mea kolā e faipati mai ne Paulo. 15  I te otiga ne papatiso tou fafine fakatasi mo tena kāiga,+ ne fakamalosi mai a ia: “Kafai e iloa ne koutou i a au e fakamaoni ki a Ieova, o‵mai ke ‵nofo tatou i toku fale.” Ne kinau mai faeloa a ia ke olo atu matou. 16  I te motou oloatuga ki te koga e fai i ei a ‵talo, ne fetaui matou mo se tavini tamafine e pukea ne se agaga,+ se temoni telā e ‵valo ne ia a mea ka ‵tupu. E uke a tupe ne maua sāle ne ana matai mai i ana valoaga. 17  Ne tautali mai faeloa a te tamafine tenei i a matou mo Paulo kae pakalaga mai: “A tāgata konei ko pologa a te Atua Tafasili i te Maluga,+ kae e folafola atu ne latou ki a koutou a te auala o te fakaolataga.” 18  Ne fai faeloa ne ia a te mea tenei i aso e uke kae ne ‵fiu a Paulo i ei, fai atu ei ki te temoni tenā: “Au e fakatonu atu i te igoa o Iesu Keliso ke fano koe ki tua mai te fafine tenā.” Fano ei ki tua a te temoni i te taimi eiloa tenā.+ 19  I te laveaga ne ana matai me ko se toe ai ne olotou tupe e maua i a ia,+ ne puke ne latou a Paulo mo Sila kae toso atu ki tino pule+ i te maketi. 20  Ne ‵taki atu ne latou ki famasino kae fai atu: “A tāgata konei ko fakamakosu valevale ne lāua a te ‵tou fakai.+ A lāua ne tino Iutaia, 21  kae e folafola atu ne lāua a tuu masani kolā e fe‵paki mo faifaiga masani a tatou, me i a tatou ne tino Loma.” 22  Ne ‵teke atu a te vaitino ki a lāua, kae i te otiga ne saesae ne famasino lā gatu ‵loa, fakatonu atu ei ke ‵kini lāua ki lakau.+ 23  I te otiga ne ‵kini ne latou a lāua i taimi e uke, ‵pei atu ei ne latou ki loto i te falepuipui, kae fakatonu atu ki te tausi pagota ke leoleo faka‵lei a lāua.+ 24  Ona ko te fakatonuga tenā ne fai atu, ne ‵pei atu ei ne ia lāua ki te potu tafa ki loto i te falepuipui kae ‵loka lā vae ki mea ‵loka vae. 25  Kae kāti ko te valuapo, ne ‵talo kae usu ne Paulo mo Sila a pese o tavaega ki te Atua,+ kae ne fakalogo‵logo a pagota ki a lāua. 26  Ne poko fakavave se mafuie lasi kae galulu te fakavae o te falepuipui. E se gata i ei, ne ma‵tala fakavave a mataloa katoa kae ‵to kea‵tea a mea kolā ne ‵loka ki ei a latou.+ 27  I te alaakaga a te tausi pagota kae lavea ne ia a mataloa o te falepuipui e ma‵tala, ne tapale tena pelu ke tamate a ia, me ne manatu aka a ia me ko oti ne ‵sao a pagota.+ 28  Kae ne pakalaga atu a Paulo i se leo maluga: “Sa fai ne koe te mea tenā ki a koe, me i a matou konei katoa i konei!” 29  Ne fakamolemole atu a ia ke aumai se moli kae ne tele fakavave mai ki loto kae fakasiga ifo i mua o Paulo mo Sila mo te polepole. 30  Ne aumai ne ia a lāua ki tua kae fai atu: “Tou lua ‵malu, ne a aku mea e ‵tau o fai ke sao ei au?” 31  Ne fai atu lāua: “Talitonu ki te Aliki ko Iesu, kae ka sao koe, ko koe mo tou kāiga.”+ 32  Tenā ne folafola atu ei ne lāua a te muna a Ieova ki a ia mo tino katoa i tena fale. 33  Ne ave ne ia a lāua i te itula eiloa tenā o te po o ‵fulu lā pa‵kiaga. Tenā ne papatiso ei a ia fakatasi mo tena kāiga kātoa e aunoa mo te fakatalave.+ 34  Ne aumai ne ia a lāua ki loto i tena fale kae fakatoka te taipola ke ‵kai lāua, kae ne fiafia malosi a ia fakatasi mo tena kaufale kātoa me ko talitonu nei a ia ki te Atua. 35  I te taeaoakaga, ne uga atu ne famasino a pulisimani ke fai atu: “Fakasaoloto a tāgata konā.” 36  Ne fakailoa atu ne te tausi pagota olotou pati ki a Paulo: “Ko oti ne uga mai ne famasino a tāgata ke fakasaoloto koulua. Tela la, o‵mai ki tua kae olo mo te filemu.” 37  Kae ne fai atu a Paulo ki a latou: “Ne ‵kini ne latou a māua i mua o tino katoa faitalia me ko māua ne tino Loma+ kae seai se mea e ‵tau o sala ei māua, kae ‵pei atu māua ki te falepuipui. Kae nei la, ko ma‵nako latou o ave lēmū a māua ki tua? Ikai, fai atu ke o‵mai eiloa latou o ave māua ki tua.” 38  Ne fakailoa atu ne pulisimani a pati konei ki famasino. Ne ma‵taku latou i te lotou ‵logoga i tāgata konei ne tino Loma.+ 39  Tenā ne o‵mai ei latou o fakatoese ki a lāua kae i te lā ‵talamaiga ki tua ne fakamolemole atu latou ke olo lāua kea‵tea mai te fakai. 40  Kae ne o‵mai lāua ki tua mo te falepuipui kae olo ki te fale o Litia; kae i te laveaga ne lāua a taina, ne fakamalosi atu lāua ki a latou,+ olo ei lāua.

Fakamatalaga mai lalo