Galuega a Apositolo 15:1-41

  • Kinauga i Anitioka e uiga ki te pilitome (1, 2)

  • Fesili ne avatu ki Ielusalema (3-5)

  • Ko fono fakatasi a toeaina mo te kau apositolo (6-21)

  • Tusi mai te potukau pule (22-29)

    • ‵Kalo kea‵tea mai te toto (28, 29)

  • Fakamalosi aka fakapotopotoga e auala i se tusi (30-35)

  • Ko taki olo a Paulo mo Panapa (36-41)

15  Ne olo ifo a nisi tāgata mai Iuta kae kamata o akoako atu ki te kautaina: “E se mafai o ‵sao koutou seiloga ke pilitome koutou e ‵tusa mo tulafono a Mose.”+  Kae mai tua o se kinauga a latou mo Paulo mo Panapa, ne fai ei se fakatokaga ke uga atu a Paulo, Panapa mo nisi o latou ki te kau apositolo mo toeaina i Ielusalema+ e uiga ki te kinauga tenei.  Ne olo fakatasi atu a te fakapotopotoga mo tāgata konei i te auala ko te mea loa ko toe ‵foki, ne faima‵laga atu eiloa a tāgata konei ki Foinikia mo Samalia, kae ne fakamatala fakalikiliki atu i ei te ‵fulimaiga o tino o fenua fakaa‵tea, kae ne fai ei ke fia‵fia a taina katoa.  I te lotou okoatuga ki Ielusalema ne talimalo faka‵lei latou ne te fakapotopotoga mo apositolo mo toeaina, kae ne fakamatala atu ne lāua a mea e uke ne fai ne te Atua e auala i a lāua.  Kae ko nisi tino mai te vaega e tasi o te kau Falesaio kolā ko fai pelā me ne tino tali‵tonu ne ‵tu aka ki luga mai olotou nofoga kae fai mai: “E ‵tau o pilitome latou kae fakatonu atu ki a latou ke tausi ki te Tulafono a Mose.”+  Tenā ne maopoopo ei a te kau apositolo mo toeaina o fai‵pati ki te mataupu tenei.  Mai tua o fai‵patiga e uke, ne tu aka a Petelu kae fai atu ki a latou “Taina, e iloa ‵lei ne koutou i aso ko ‵teka me ne filifili au ne te Atua mai i a koutou ke folafola atu a te tala ‵lei, e auala i toku gutu, ki tino o fenua fakaa‵tea, ko te mea ke lagona kae ke tali‵tonu foki latou.+  Kae ko te Atua telā e lavea ne ia a te loto,+ ne molimau mai e auala i te tukuatuga ki a latou a te agaga tapu,+ e pelā mo te mea ne fai foki ne ia ki a tatou.  Kae ne seki faka‵kese ne ia a tatou mo latou,+ kae ne faka‵ma ne ia olotou loto i te fakatuanaki.+ 10  Tela la, kaia e tofotofo ei ne koutou a te Atua mai te fakaeke atu ki tuauma o soko se amoga+ ‵mafa telā ne seki mafai o amo ne ‵tou tupuga e pelā foki mo tatou?+ 11  E ‵kese mai i ei, e tali‵tonu tatou me ka faka‵sao tatou e auala i te alofa tauanoa o te Aliki ko Iesu+ e pelā eiloa mo tino konā.”+ 12  Ne ‵nofo ‵mu a te potukau kātoa, kae kamata o fakalogo‵logo ki a Panapa mo Paulo e fakamatala mai ne lāua a galuega ‵mana mo mea fakaofoofogia kolā ne fai ne te Atua ki atufenua e auala i a lāua. 13  I te otiga a lāua ne fai‵pati, tali atu ei a Iakopo: “Taina, faka‵logo mai ki a au. 14  Ko oti ne fakamatala fakalikiliki mai ne Simeona+ a te taimi muamua ne saga atu ei a te Atua ki fenua fakaa‵tea ke aumai mai i a latou ne tino mō tena igoa.+ 15  E fetaui eiloa a te mea tenei mo pati a te kau Pelofeta kolā ne tusi mai: 16  ‘Ka oti a mea konei ka toe foki atu au o toe fakatu a te faleie o Tavita telā ko siga ki lalo; ka toe faite ne au ana mea ma‵sei kae toe fakatu aka, 17  ko te mea ke ‵sala malosi atu ki a Ieova a tāgata kolā e ‵toe mai, fakatasi mo tino o atufenua katoa, ko tino kolā e fakaigoa ki toku igoa, ko muna a Ieova, telā e fai ne ia a mea konei,+ 18  kae ko leva ne iloa ne latou mai i aso mua.’+ 19  Tela la, ko oti ne fakaiku aka ne au ke se fakalavelave atu ki tino mai fenua fakaa‵tea kolā ko ‵fuli mai ki te Atua,+ 20  kae ke tusi atu ki a latou ke faka‵mao kea‵tea mai mea se ‵mā o te ifo ki tupua,+ mai amioga fakatauavaga sē ‵tau,*+ mai manu ne ‵kumi olotou ua,* kae mai toto.+ 21  E isi ne tino i aso mua ne talai atu mai fakai ki fakai e uiga ki mea i tusi a Mose, me ne faitau atu eiloa ki luga a mea e uiga ki a ia i loto i sunako i sapati katoa.”+ 22  Tenā ne lotoma‵lie ei a te kau apositolo mo toeaina, fakatasi mo te fakapotopotoga kātoa ke filifili aka ne tāgata mai i a latou ke uga atu ki Anitioka fakatasi mo Paulo mo Panapa; ne uga ne latou a Iuta telā ne fakaigoa ki a Pasapa mo Sila,+ ne tāgata kolā e fai ne lāua te takitakiga i loto i te kautaina. 23  Ne tusi ne latou a te mea tenei kae avatu e auala i a latou: “Ko tusi atu otou taina ko apositolo mo toeaina ki taina mai fenua fakaa‵tea i Anitioka,+ Sulia mo Kilikia: Talofa! 24  Ona ko te mea ko oti ne ‵logo matou me e isi ne tino mai i a matou ne fakalavelave atu ki a koutou i olotou pati ne fai,+ kae taumafai o fakamasei koutou, kae e seki fakatonu ne matou a latou ke fai penā, 25  ko oti ne lotoma‵lie fakatasi matou ke filifili ne tāgata ke uga atu ki a koutou fakatasi mo ‵tou taina pele ko Panapa mo Paulo, 26  ko tāgata kolā ne tuku atu lā ola mō te igoa o te ‵tou Aliki ko Iesu Keliso.+ 27  Tela la, ko uga atu ne matou a Iuta mo Sila, ko te mea ke fakamatala atu foki ne lāua a mea konā.+ 28  Me ko talia ne matou mo te agaga tapu+ ke se toe fakaopoopo atu ne amoga ‵mafa ki a koutou, kae na ko mea tāua konei: 29  ke ‵kalo faeloa kea‵tea koutou mai mea kolā ne ofo atu ki tupua,+ mai te toto,+ mai manu ne ‵kumi a ua,*+ kae mai amioga fakatauavaga sē ‵tau.*+ Kafai e fakaeteete koutou kae ‵kalo kea‵tea mai mea konei, ka ‵lei ei otou olaga. Ke manuia koutou!”* 30  I te ologa a tāgata konei, ne oko atu latou ki Anitioka, kae ne fakamaopoopo mai ne latou a te potukau kātoa kae tuku atu ki a latou a te tusi. 31  I te lotou otiga ne fai‵tau ki te tusi, fia‵fia ei latou ona ko pati fakamalosi ne maua mai i ei. 32  Ona ko Iuta mo Sila ne pelofeta, ne fesoasoani atu a lāua ki te kautaina mai te faiga o lāuga mo fakamalosiga e uke ki a latou.+ 33  Tela la, i te ‵nofoatuga o lāua i konā mō se vaitaimi, ne uga atu lāua mo te filemu ne taina ki a latou kolā ne uga mai ne latou a lāua. 34 * —— 35  Kae ne ‵nofo atu eiloa a Paulo mo Panapa fakatasi mo nisi tino i Anitioka o akoako kae folafola atu a te tala ‵lei o te muna a Ieova. 36  Mai tua o nai aso ne fai atu a Paulo ki a Panapa: “Tāua ka ‵foki o āsi atu ki taina i fakai katoa kolā ne folafola atu ne tāua ki ei a te muna a Ieova, ke onoono aka foki me pefea nei latou.”+ 37  Ne manako malosi a Panapa ke puke ne lāua a Ioane telā e fakaigoa foki ki a Maleko.+ 38  Kae ne seki manako a Paulo ke puke ne lāua a ia, me ne tiaki ne ia a lāua i Pafulia kae seki fanatu i a lāua o fai te galuega.+ 39  Ne kinau malosi a lāua ona ko te mea tenei, ma‵vae ei lāua i konā. Ne puke ne Panapa+ a Maleko kae fo‵lau atu ki Kupelu. 40  Ne filifili ne Paulo a Sila, olo ei lāua, i te otiga ne tuku atu ne taina ke tausi a ia ne te alofa tauanoa o Ieova.+ 41  Ne fanatu a ia i loto i Sulia mo Kilikia kae fakama‵losi atu a fakapotopotoga i ei.

Fakamatalaga mai lalo

Eleni, por·neiʹa. Onoono ki te FP.
Io me “ko manu ne tamate kae seki fakasali a toto.”
Io me “ko manu ne tamate kae seki fakasali a toto.”
Eleni, por·neiʹa. Onoono ki te FP.
Io me “Tofa.”
Onoono ki te MF A3.