Galuega a Apositolo 12:1-25

  • Ko tamate Iakopo; Petelu ko ‵pei ki te falepuipui (1-5)

  • Fakasaoloto fakavavega a Petelu (6-19)

  • Tamate Helota ne se agelu (20-25)

12  Kāti ko te taimi eiloa tenā ne kamata ei o fakasaua atu a te tupu ko Helota ki nisi tino i te fakapotopotoga.+  Ne tamate ne ia a Iakopo te taina o Ioane+ ki te pelu.+  I te iloaga ne ia me ne fakafiafia atu a te mea tenā ki tino Iutaia, ne puke fakapagota foki ne ia a Petelu. (Ne ‵tupu a mea konei i aso o te fakamanatuga o Falaoa sē Faka‵fete.)+  Ne puke ne ia tou tagata kae ‵pei atu ki te falepuipui,+ ke leoleo a ia ne sotia e taki tokofa i ‵tuga e fa, me ne manako a ia o aumai a Petelu ki mua o tino māfai ko oti te Paseka.  Ne tausi a Petelu i te falepuipui, kae ne ‵talo malosi a te fakapotopotoga ki te Atua e uiga mō ia.+  I te taimi ko pili ei o aumai ne Helota a ia ki tua, ne moe a Petelu i te po tenā i te va o sotia e tokolua, kae saisai ki seni e lua. E isi foki ne leoleo e ‵tu mai tua o te mataloa o tausi te falepuipui.  Kae kiloke! ne tu atu te agelu a Ieova i konā,+ kae ne maina atu se mainaga i te potu tenā. Ne fakapatele atu a ia ki te kaokao o Petelu, kae ‵fagu atu a ia, ana muna: “Tu ke vave ki luga!” Kae ne ‵to ifo a seni i ana lima.+  Ne fai atu te agelu ki a ia: “Pei ou gatu kae faka‵mau ou taka.” Ne fai eiloa ne ia a mea konā. Ne toe fai atu te agelu ki a ia: “Pei tou gatu ‵loa kae tautali mai faeloa i a au.”  Ne fano a ia ki tua kae tautali atu faeloa i a ia, kae ne seki iloa ne ia me i mea kolā e ‵tupu e auala i te agelu ne mea ‵tonu eiloa. Ne leake a ia me ne lavea ne ia se fakaasiga. 10  Ne olo atu lāua i tafa o te potukau leoleo muamua penā foki loa mo te lua o potukau, ne oko atu lāua ki te mataloa fiti telā e fakafesagai atu ki te fakai kae ne matala mai ki a lāua a te mataloa i a ia eiloa. I te lā ‵toga ki tua, ne olo atu lāua i se auala e tasi, kae ne fakagalo fakavave te agelu. 11  Ne kamata o maina a Petelu i te mea ne tupu, kae fai aka: “Ko iloa nei ne au me ne uga mai ne Ieova a tena agelu ke fakasao ne ia au mai i lima o Helota mo mea katoa kolā ne fakamoe‵moe ki ei a tino Iutaia ke ‵tupu.”+ 12  I te otiga ne mafaufau tou tagata ki te mea tenei, fano ei a ia ki te fale o Malia te mātua o Ioane telā e fakaigoa foki ki a Maleko,+ telā e isi ne nai tino e maopoopo kae ‵talo i ei. 13  I te taimi ne tukituki ei a ia i te mataloa, ne vau se tavini tamafine e igoa ki a Lotē ki te mataloa. 14  I te lagonaga ne ia me ko te leo o Petelu, ne fiafia malosi tou fafine telā ne seki ‵tala ei ne ia te mataloa, kae ne toe tele ki loto o fakailoa atu i a Petelu telā ko tu i te mataloa. 15  Olotou muna ki a ia: “A koe ko fakavalevale.” Kae ne fai atu faeloa tou fafine i a ia e tonu. Ne fai atu latou: “Ko tena agelu eiloa tenā.” 16  Kae ne tukituki mai faeloa a Petelu i tua. I te ‵talaatuga ne latou te mataloa, lavea ei ne latou a ia kae ko oko eiloa i te lotou ofo. 17  Ne fakatu atu tena lima ki a latou ke se logoa kae fakamatala likiliki atu ne ia a te auala ne aumai ei a ia ne Ieova ki tua mo te falepuipui, kae fai atu: “Fakailoa atu a mea konei ki a Iakopo+ mo te kautaina.” Fano ei a ia ki tua kae faimalaga atu ki se isi koga. 18  I te taeaoakaga, ne kinau malosi a sotia e uiga ki te mea ne tupu ki a Petelu. 19  Ne salasala malosi a Helota ki a ia. Ne seki maua ne ia, sukesuke ei ne ia a leoleo kae fakatonu atu ke ave latou o fakasala+ kae ne fanatu a ia mai Iuta ki Kaisaleia o nofo i konā i se vaitaimi. 20  Ne kaitaua a ia ki tino o Tulo mo Saitonu. Ne o‵mai latou ki a ia mō te pogai e tasi, kae i te otiga ne fakatalitonu atu latou ki a Palasitone, te tagata telā e tausi ne ia a mea a te tupu, ne fakamolemole atu latou ke maua se filemu, me ne maua a meakai a te lotou fenua mai te fenua o te tupu. 21  I te aso e tasi, ne pei a Helota ki teuga o te tupu kae sagasaga i luga i te nofoga fakamasino kae kamata o lāuga atu i mua o tino katoa. 22  Tenā ne kamata ei o paka‵laga mai a tino kolā ne maopoopo i konā: “A te leo tenā se leo o se atua, kae e sē se tagata!” 23  I konā eiloa ne ta fakavave a ia ne te agelu a Ieova, me ne seki faka‵malu atu a ia ki te Atua, kae ne kai a ia ne anufe kae mate. 24  Kae ko te muna a Ieova ne gasolo atu faeloa ki mua kae salalau atu foki.+ 25  Kae e pelā mo Panapa+ mo Saulo, i te taimi ne maea faka‵lei ei a galuega fesoasoani kolā ne fai ne lāua i Ielusalema,+ ne ‵foki atu kae puke ne lāua a Ioane,+ telā e fakaigoa foki ki a Maleko.

Fakamatalaga mai lalo