Galuega a Apositolo 1:1-26

  • Te tusi ki a Teofilo (1-5)

  • Molimau ki toe koga ‵mao o te lalolagi (6-8)

  • Iesu ko fanaka ki te lagi (9-11)

  • Ko maopoopo fakatasi a soko mo te fealofani (12-14)

  • Ko filifili Matatia ke sui ne ia a Iuta (15-26)

1  Teofilo, a te tusi muamua telā ne tusi ne au e aofia i ei a mea katoa kolā ne kamata o fai kae akoako atu ne Iesu+  ke oko ki te aso telā ne avaka ei a ia ki te lagi,+ i te otiga ne tuku atu ne ia a fakatonuga e auala i te agaga tapu ki apositolo kolā ne filifili ne ia.+  I te otiga ne logo‵mae a ia, ne fakaasi atu ne ia a ia eiloa ki a latou i a ia ko toe ola mai e auala i fakamaoniga mautinoa e uke.+ Ne lavea ne latou a ia i aso e 40 kae ne faipati atu a ia e uiga ki te Malo o te Atua.+  I te taimi koi maopoopo fakatasi ei a ia mo latou, ne fakatonu atu a ia ki a latou: “Sa tiaki ne koutou a Ielusalema,+ kae ‵nofo fakatali‵tali faeloa ki te mea ne folafola mai ne te Tamana,+ telā ne lagona ne koutou mai i a au;  me ne papatiso eiloa a Ioane ki te vai, kae e se leva nei ka papatiso koutou ki te agaga tapu.”+  I te taimi ne maopoopo ei latou, ne fesili atu latou ki a ia: “Te Aliki, e a, ka toe fakafoki mai ne koe a te malo ki Isalaelu i te taimi tenei?”+  Ana muna ki a latou: “E se ‵tau o iloa ne koutou a taimi io me ko tau o aso kolā ko oti ne fakatoka ne te Tamana i tena pule eiloa.+  Kae ka maua ne koutou a te ‵mana māfai e oko atu te agaga tapu ki luga i a koutou,+ kae ka fai koutou mo molimau+ ki a au i Ielusalema,+ i Iuta kātoa mo Samalia,+ ke oko eiloa ki toe koga ‵mao i te lalolagi.”+  I te otiga o ana pati konei, ne masagi aka a ia ki luga kae kilo‵kilo atu eiloa latou, kae ne ‵pono a ia ne se kaumana.+ 10  Kae koi kilo‵kilo atu latou ki tena fanakaga ki te lagi, ne ‵tu atu i olotou tafa a tāgata e tokolua e ‵pei ki gatu ‵kena+ 11  kae fai atu: “Tāgata Kalilaia, kaia e ‵tu ei koutou kae kilo‵kilo ki te lagi? A Iesu telā ne avaka mai i a koutou ki luga i te lagi ka toe foki mai i te auala eiloa telā ne lavea ne koutou e fanaka ei a ia ki te lagi.” 12  Tenā ne toe ‵foki atu ei latou ki Ielusalema+ mai te mauga telā e taku ko te Mauga o Olive, telā e pili ki Ielusalema, e nofo ki se kilomita e tasi* te ‵mao. 13  I te lotou okoatuga, ne olo aka latou ki te potu i luga telā ne ‵nofo i ei latou. Ko Petelu e pelā foki mo Ioane mo Iakopo mo Anitelea, Filipo mo Toma, Patolomaio mo Mataio, Iakopo te tama a Alefaio, mo Simona te tino loto finafinau, mo Iuta te tama a Iakopo.+ 14  Ne ‵talo atu faeloa a latou katoa konei mō se pogai fua e tasi, fakatasi mo nisi fāfine+ mo Malia te mātua o Iesu mo taina+ o Iesu. 15  I aso konā, ne tu aka a Petelu i mua o te kautaina (a te aofaki o tino katoa e ‵tusa mo te toko 120) kae fai atu: 16  “Taina, e ‵tau o fakataunu a pati i tusitusiga tapu kolā ne faipati fakavaloaga ki ei te agaga tapu e auala i a Tavita e uiga ki a Iuta,+ telā ne takitaki ne ia a latou kolā ne puke fakapagota ne latou a Iesu.+ 17  Me ne aofia a ia i a tatou+ kae ne fai foki tena tusaga i te galuega tenei. 18  (Tela la, ko te tagata eiloa tenei, ne ‵togi ne ia se manafa ki tupe ne maua i faifaiga sē ‵tonu,+ ne tō kae sulu tena ulu ki lalo, mapā ei tena tinae, kae ta‵tela ana gakau katoa ki tua.+ 19  Ne iloa ne tino katoa i Ielusalema te mea tenei, fakaigoa ei te manafa tenā i te lotou ‵gana ki a Akeletama, ko tena uiga ko te “Manafa o Toto.”) 20  Me e tusi i te tusi ko Salamo, ‘Ke fakamasei atu a tena koga nofo, kae ke seai eiloa ne tino e ‵nofo i ei’+ kae, ‘Ke puke ne se isi tino tena tofi e pelā me se ovasia.’+ 21  Tela la, a tāgata kolā ne ‵kau fakatasi sāle tatou i taimi katoa ne fai ei a galuega a te Aliki ko Iesu i a tatou, 22  kamata mai i tena papatisoga ne Ioane+ ke oko ki te aso ne avaka ei a ia ki luga mai i a tatou,+ e ‵tau se tokotasi o tāgata konei o molimau fakatasi mo tatou e uiga ki tena toetu.”+ 23  Tela la, ne ‵tofi aka ne latou a tino e tokolua, ko Iosefa telā e taku ko Pasapa, kae fakaigoa foki ki a Tiasitasi, mo Matatia i ei. 24  Tenā ne ‵talo ei latou kae fai atu: “Ieova,* e iloa ne koe a loto o tino katoa,+ fakaasi mai a te tino telā ko oti ne filifili ne koe mai i tāgata e tokolua konei 25  ke puke ne ia te galuega tenei mo te tulaga fakaapositolo, telā ne tiaki ne Iuta ko ia ke fano i tena auala eiloa.”+ 26  Ne fai ne latou a te vili i a lāua konei,+ kae ne fakasino atu a te vili ki a Matatia, kae ne lau fakatasi a ia mo te toko 11 apositolo.

Fakamatalaga mai lalo

Eleni, “ko te malaga i loto i te Sapati.” Ko te ‵mao telā e mafai o faimalaga i ei se tino Iutaia i te Sapati.
Onoono ki te MF A5.