Ki te Kau i Filipi 4:1-23
4 Tela la, e oku taina kolā e alofa au ki ei kae e fia lavea ne au, ko toku fiafia mo toku foualiki,+ ke ‵tu ‵mautakitaki+ koutou i te auala tenei i te Aliki, e oku taina fagasele.
2 E fakamalosi atu au ki a Evotia kae e fakamalosi atu au ki a Sunetui ke tasi lā mafaufau i te Aliki.+
3 Ao, e fakatagi atu foki au ki a koe, te tino tonu telā e ga‵lue fakatasi māua, ke tumau i te fesoasoani atu ki fāfine konei, ko fāfine kolā ne ga‵lue* fakatasi matou i te tala ‵lei fakatasi mo Kelemene e pelā foki mo nisi o oku taina mo tuagane ga‵lue, kolā ko ‵mau olotou igoa i te tusi o te ola.+
4 Ke fia‵fia faeloa koutou i te Aliki. E toe fai atu au, Ke fia‵fia!+
5 Fai ke iloa ne tino katoa i a koutou e uiga faigofie.*+ Ko pili mai te Aliki.
6 Ke mo a ma manava‵se koutou ki so se mea,+ kae ke tuku atu a mea katoa kolā e ma‵nako koutou ki ei ki te Atua fakatasi mo otou fakafetai e auala i otou talosaga;+
7 kae ko te filemu+ o te Atua telā e sili fakafia atu i mea katoa kolā e malamalama i ei a tino ka puipui ne ia otou loto+ mo te malosi o otou mafaufau* e auala i a Keliso Iesu.
8 Kae ko te ‵toe mea, e oku taina, so se mea telā e tonu, so se mea telā e manavase malosi ki ei, so se mea telā e amiotonu, so se mea telā e ‵ma, so se mea telā e alofagina, so se mea telā e uke ana tavaega, so se mea telā e ‵lei mo so se mea telā e ‵tau o tavaegina, ke mafau‵fau* faeloa ki mea konei.+
9 A mea kolā ne iloa kae talia kae lagona kae lavea ne koutou mai i a au, ke fai faeloa ne koutou a mea konā,+ kae ko te Atua o te filemu ka fakatasi atu ki a koutou.
10 E lasi ‵ki toku fiafia i te Aliki me ko toe amanaia koutou ki a au.+ E tiga eiloa ne amanaia koutou ki a au, ne seki ai se avanoaga ke fakaasi mai ne koutou te mea tenā.
11 E se fai atu ne au a te mea tenei ona ko au e manako ki ne mea, me ko oti ne iloa ne au o fai ke lotomalie au ki so se mea mai lalo i so se fakanofonofoga.+
12 E iloa ne au o ola māfai ko se uke aku meakai,+ e pelā foki māfai ko uke aku meakai. Ko oti ne tauloto au ki aku mea e ‵tau o fai māfai ko makona au e pelā foki māfai ko fiakai au mai lalo i fakanofonofoga katoa, māfai ko uke aku mea io me māfai ko seai ne aku mea.
13 Me e maua ne au a te malosi i mea katoa e auala i a ia telā ne tuku mai ne ia te ‵mana ki a au.+
14 E tiga te feitu tenā, ne fai eiloa ne koutou a te mea ‵lei i te ‵kau mai ki oku puapuaga.
15 E tonu, e iloa foki ne koutou, e tino Filipi, me mai tua o te iloaga ne koutou o te tala ‵lei, i te taimi ne tiaki ei ne au a Maketonia, e seai eiloa se fakapotopotoga ne ‵kau fakatasi matou i te tukumaiga mo te avatuga o meaalofa, kae na ko koutou fua;+
16 me i te taimi ne nofo ei au i Tesalonia, ne aumai ne koutou ki a au a mea mō oku tausi e se fakatasi kae fakalua taimi.
17 E se ‵sala atu au ki se meaalofa, kae e manako au ki fuataga kolā e fakauke aka ei otou koloa.*
18 E tiga te feitu tenā, ko maua ne au a mea katoa e manako au ki ei kae ko silia atu foki. Ko malie toku loto me ko oti ne maua ne au mai i a Epafeloti+ a te mea telā ne aumai ne koutou, se mea manogi gali,+ se taulaga telā e talia kae fakafiafia malosi atu ki te Atua.
19 Kae ka toe tuku atu ne toku Atua a mea katoa e ma‵nako koutou ki ei+ e ‵tusa mo te maumea o tena ‵malu e auala i a Keliso Iesu.
20 Ke i luga i te ‵tou Atua mo te ‵tou Tamana a te ‵malu ki te se-gata-mai, se-gata-mai eiloa. Amene.
21 ‵Moli atu oku alofaaga ki tino tapu katoa kolā e ‵kau fakatasi mo Keliso Iesu. Ko a‵lofa atu foki a taina konei e ‵nofo mo au i konei.
22 Ko ‵moli atu a alofaaga o tino tapu katoa, kae maise eiloa a latou kolā i te kaufale o Kaisala.+
23 Ke ga‵lue tasi te alofa tauanoa o te Aliki ko Iesu Keliso mo te agaga telā e fakaasi mai ne koutou.
Fakamatalaga mai lalo
^ Io me “kolā ne ga‵lue malosi.”
^ Io me “loto malamalama.”
^ Io me “otou mafaufau; otou mafaufauga.”
^ Io me “mafaufau e uiga; mafaufau ‵loto.”
^ E fakasino atu te mea tenei ki koloa faka-te-agaga.
