Se Fakaasiga ki a Ioane 9:1-21

  • Te fitu o pu (1-11)

  • Ko oti te mala e tasi, toe lua koi ‵mai (12)

  • Te ono o pu (13-21)

9  Ne ili ne te tokolima o agelu tena pu.+ Kae ne matea ne au se fetū telā ne tō ifo mai te lagi ki te lalolagi, kae ne tuku atu ki a ia te kī o te lua ‵poko.+  Ne ‵tala ne ia te lua ‵poko, kae ne fanaka te au mai te lua e pelā mo te au mai se ogaumu lasi, kae ne pouli te la,+ penā foki te ea, ona ko te au mai i te lua.  Kae ne o‵mai a seakelise ki tua mo te au tenā ki te lalolagi,+ kae ne tuku atu te malosi ki a latou, ko te malosi foki telā e maua ne akalava o te lalolagi.  Ne fai atu ki a latou ke se fakama‵sei a lakau kaina o te lalolagi io me ko so se lakau lanu launiu io me ko so se lakau lasi, kae ko tino fua kolā e se maua ne latou te fakamailoga a te Atua i olotou lae.+  Kae ne talia ke mo a ma tamate ne seakelise a latou, kae ke fakapuapuaga atu fua latou i se lima masina, kae ko te lotou puapuaga e ‵pau eiloa mo te puapuaga o se tino māfai ko ū ne se akalava.+  I aso konā, ka ‵sala a tino ki te mate kae ka se maua ne latou, kae ka fia ‵mate latou, kae ka tele kea‵tea te mate mai i a latou.  Kae ne foliga mai a seakelise konā e pelā me ne solofanua ko toka mō te taua;+ i luga i olotou ulu ne mea e foliga pelā me ne foualiki aulo, kae ko olotou mata ne fai pelā me ne mata o tino,  kae ko olotou laulu e fai pelā me ne laulu o fāfine. Kae ko olotou nifo e fai pelā me ne nifo o leona,+  kae ko olotou ufi fatafata ne fai pelā me ne ufi fatafata fiti. Kae ko te logoa o olotou kapakau ne fai pelā mo te logoa o kaliota e ‵taki ne solofanua kolā e ‵tele ki te taua.+ 10  E isi foki ne olotou felo mo suki e pelā me ne akalava, kae i olotou felo ko te lotou malosi ke fakapuapuaga a tino i masina e lima.+ 11  E isi se lotou tupu telā e pule ki a latou, ko te agelu o te lua ‵poko.+ A tena igoa faka-Epelu ko Apatoni* kae faka-Eleni ko Apolioni.* 12  Ko oti atu te mala e tasi. Kiloke! E toe lua a mala+ ka ‵soko atu ki ei. 13  Ne ili ne te tokoono o agelu+ tena pu.+ Kae ne lagona ne au te leo e tasi mai i suki o te fatafaitaulaga aulo+ telā e tu i mua o te Atua 14  ana muna ki te tokoono o agelu telā e isi sena pu: “‵Tala mai a agelu e tokofa kolā e ‵sai i te vaitafe lasi ko te Eufilate.”+ 15  Kae ko agelu e tokofa kolā ne fakatoka mō te itula te aso te masina mo te tausaga ne ‵tala ke tamate ne latou te tasi-vae-tolu o tino. 16  Ne lagona ne au te aofaki o kautau kolā e ‵sopo i solofanua e lua selau miliona. 17  Kae konei a foliga o solofanua kolā ne lavea ne au i te fakaasiga mo tino kolā e ‵sopo i ei: E isi ne olotou ufi fatafata kolā e kula pelā me se afi kae e lanu moana e pelā me se safaila kae e ‵sega e pelā me se pauta ‵ka, kae ko ulu o solofanua e fai pelā mo ulu o leona,+ kae ko te afi mo te au mo te pauta ‵ka ne ‵to mai ki tua mo olotou gutu. 18  Ne tamate te tasi-vae-tolu o tino i mala e tolu konei, mai i te afi mo te au mo te pauta ‵ka kolā ne ‵to mai ki tua mo olotou gutu. 19  Me i te malosi o solofanua e maua i olotou gutu mo olotou felo, me i olotou felo e fai pelā me ne gata kae e isi ne olotou ulu, kae e fakapuapuaga ne latou a tino ki mea konei. 20  Kae ko te ‵toega o tino kolā ne seki ‵mate i mala konei ne seki sala‵mo i galuega a olotou lima; ne seki fakagata te lotou tapuaki atu ki temoni mo tupua aulo mo siliva mo kopa mo fatu mo lakau, kolā e se mafai o ‵kite io me e ‵logo i se mea io me sa‵sale.+ 21  Kae ne seki sala‵mo latou i olotou amioga tatino io me ko olotou faifaiga faivailakau io me ko olotou amioga fakatauavaga sē ‵tau* io me ko olotou amioga kai‵soa.

Fakamatalaga mai lalo

Tena uiga “Fakamaseiga.”
Tena uiga “Tino Fakamasei.”
Eleni, por·neiʹa. Onoono ki te FP.