Se Fakaasiga ki a Ioane 6:1-17

  • E ‵tala ne te Tamā Mamoe a fakamailoga e ono (1-17)

    • Te tino manumalo i luga i te solofanua ‵kena (1, 2)

    • Te tino i luga i te solofanua kula e ave kea‵tea ne ia te filemu (3, 4)

    • Te tino i luga i te solofanua uli e aumai ne ia te ogega meakai (5, 6)

    • Te tino i luga i te solofanua lanu kenakena e igoa ki te Mate (7, 8)

    • Tino kolā ne tamate mai lalo i te fatafaitaulaga (9-11)

    • Se mafuie lasi (12-17)

6  Kae ne matea ne au a te ‵talaga ne te Tamā Mamoe+ te fakamailoga e tasi mai i fakamailoga e fitu,+ kae ne lagona ne au se tasi o manu ola e fa+ e fai mai i se leo e pelā me se fa‵tili: “Vau!”  Kae ne kilo atu au, kae kiloke! se solofanua ‵kena,+ kae ko te tino e sopo i luga i ei e isi sena kausana; kae ne tuku atu ki a ia se foualiki,+ kae ne fanatu a ia ke manumalo kae ke fakaoti tena manumalo.+  I te taimi ne ‵tala ei ne ia te lua o fakamailoga, ne lagona ne au te lua o manu ola+ e fai mai: “Vau!”  Ne tele mai a te suā solofanua, e lanu e pelā me se afi, kae ko te tino telā e sopo i ei ne tuku atu ki a ia te taliaga ke ave kea‵tea te filemu mai i te lalolagi ko te mea ke fakatau tamate valevale ne tino a latou eiloa, kae ne tuku atu ki a ia se pelu lasi.+  I te ‵talaga ne ia a te tolu o fakamailoga,+ ne lagona ne au a te tolu o manu ola+ e fai mai: “Vau!” Ne kilo atu au, kae kiloke! se solofanua uli, kae ko te tino ne sopo i ei ne puke ne ia se fua-mea-‵mafa i tena lima.  Ne lagona ne au te mea e pelā me se leo i te kogāloto o manu ola e fa e fai mai: “A te ‵togi o te ‵kilo saito, e tasi te tenali,*+ kae ko te tolu ‵kilo kalite, e tasi te tenali; kae sa sona fakaaoga te sinu olive mo te uaina.”+  I te ‵talaga ne ia a te fa o fakamailoga, ne lagona ne au te leo o te fa o manu ola+ e fai mai: “Vau!”  Kae ne kilo atu au, kae kiloke! se solofanua lanu kenakena, kae ko te igoa o te tino e sopo i ei ko Mate. Kae ne tautali fakapilipili atu a te Tanuga* ki a ia. Kae ne tuku atu ki a lāua te pulega ki luga i te tasi-vae-fa o te lalolagi, ke tamate a tino ki se pelu loa mo te oge meakai+ mo famai fakama‵taku mo manu fe‵kai o te lalolagi.+  I te ‵talaga ne ia a te lima o fakamailoga, ne matea ne au i lalo o te fatafaitaulaga+ a toto+ o latou kolā ne tamate ona ko te muna a te Atua kae ona ko te molimau ne tuku atu ne latou.+ 10  Ne ka‵laga atu latou i se leo maluga, olotou muna: “Te Aliki Sili telā e tapu kae tonu,+ ka pefea te leva e faka‵tali ei koe ke fai te fakamasinoga kae avatu te taui o latou kolā e ‵nofo i te lalolagi ke sui ei omotou toto?”+ 11  Ne tuku atu ki a latou taki tokotasi se gatu ‵loa ‵kena,+ kae fai atu ki a latou ke fa‵ki malie aka, ke oko ki te taimi ko kātoa ei te aofaki o olotou taina tavini mo olotou taina kolā ko pili o tamate e pelā mo latou.+ 12  Kae ne matea ne au i te ‵talaga ne ia a te ono o fakamailoga, se mafuie lasi e poko; kae ne pouli te la e pelā me se gatu lautaga uli e faite ki fulufulu,* kae ne liu toto te masina kātoa,+ 13  kae ne ta‵tela ifo a fetū o te lagi ki te lalolagi e pelā eiloa mo fuagā mati ‵moto e tatela ki lalo māfai ko lue te mati ne se matagi lasi. 14  Ne galo atu te lagi e pelā me se peluga tusi ne pelu,+ kae ko mauga katoa mo fenua katoa ne tapale kea‵tea mai i olotou tulaga.+ 15  Tenā ne ‵muni ei a tupu o te lalolagi, tino ma‵luga, takitaki o kautau, tino mau‵mea, tino ‵mafi, pologa katoa, mo tino saoloto katoa i ana mo kaupapa i mauga.+ 16  Kae ne fai atu faeloa latou ki mauga mo kaupapa: “Ma‵toli mai ki luga i a matou+ ke ‵muni matou mai i mata o te Atua telā e sagasaga i te nofogaaliki+ mo te kaitaua o te Tamā Mamoe,+ 17  me ko oko mai te aso lasi o te lā kaitaua,+ kae ko oi la te tino e mafai o sao i ei?”+

Fakamatalaga mai lalo

Se tupe siliva Loma telā e ‵pau mo te peofuga i te aso. Onoono ki te MF E14.
Io me “Heitisi,” telā ko te tanuga masani o tino. Onoono ki te FP.
Kāti ne fulufulu o kouti.