Failauga 2:1-26

  • Te fakatautauga o mea ne kausaki ki ei a Solomona (1-11)

  • Te tāua o te poto o tāgata (12-16)

  • Te sē aoga o galuega ‵mafa (17-23)

  • Kai, inu kae fiafia ki au galuega (24-26)

2  Tenā ne fai aka ei au i toku loto: “Vau ke ‵tofo aka ne au a fakafiafiaga* kae ke onoono aka me se a te mea ‵lei e maua mai i ei.” Kae kiloke! a te mea foki tenā e seai se aoga.  Ne fai atu au e uiga ki te kata, “A te mea tenā ko te fakavalevale!” Kae e uiga ki fakafiafiaga, “Se a te aoga o mea konā?”  Ne sukesuke ne au i toku loto mai te fakaaoga ne au a te uaina,+ kae taofi eiloa au ki toku poto; ne puke mai foki ne au a te valea ke iloa aka me se a te ‵toe mea ‵lei ke fai ne tino i nai aso koi ‵toe i olotou olaga mai lalo o te lagi.  Ne fai ne au a galuega ‵lasi.+ Ne faite ne au a fale mō oku;+ ne ‵toki ne au a togavine mō oku.+  Ne fai ne au a fatoaga mo malae ta‵fao mō oku, kae ne ‵toki ne au i loto i ei a vaegā lakau fai fuaga katoa.  Ne keli ne au a vai mō oku mo fakasiusiu ki ei a lakau ola ‵lei.  Ne maua ne au a tavini tāgata mo tavini fāfine,+ kae ne isi ne aku tavini ne fa‵nau mai i loto i toku kāiga. Ne maua foki ne au a lafu manu e uke—lafu pulumakau mo lafu mamoe+—e uke atu i lō tino ne sui ne au i Ielusalema.  Ne fakaputu aka ne au a siliva mo aulo ma aku,+ ko koloa o tupu mo kogā fenua.+ Ne fakamaopoopo mai ne au a tāgata mo fāfine usuusu ma aku, e pelā foki mo so se mea e aumai ei te fiafia lasi ki tama a tāgata—se fafine, ao, ne fāfine e tokouke.  Ne gasolo aka eiloa au o sili kae sili atu i lō so se tino mai i mua o oku i Ielusalema.+ Kae ko toku poto ne tumau eiloa i a au. 10  Ne seki taofi aka ne au mai i a au eiloa so se mea ne manako toku loto ki ei.+ Ne seki taofi foki ne au mai toku loto so se vaegā fakafiafiaga, me i toku loto ne fiafia ona ko aku galuega ‵mafa katoa, kae tenei toku taui* mō aku galuega ‵mafa katoa.+ 11  Kae kafai e mafaufau au ki galuega katoa ne fai ne oku lima mo galuega ‵mafa katoa ne galue malosi au o fakataunu,+ ne lavea ne au me i mea katoa e seai se lotou aoga, ko te afuliga fua o te matagi;+ e seai eiloa se mea e aoga tonu i lalo o te la.+ 12  Tenā ne ‵fuli ei au o saga atu ki te poto mo te fakavalevale mo te valea.+ (Me se a te mea e mafai o fai ne se tagata telā e vau i tua o te tupu? Ko mea fua kolā ko oti ne fai.) 13  Kae ne lavea ne au me e isi se aoga o te poto i luga i te valea,+ e pelā mo te aoga o te mainaga i luga i te pouliga. 14  A mata o te tino poto e kilo ‵tonu atu;+ kae ko te tino valea e sasale i te pouliga.+ Ne iloa aka foki ne au me e tasi eiloa te ikuga e maua ne mea katoa konā.+ 15  Tenā ne fai ifo ei au i toku loto: “A mea kolā ne ‵tupu ki te tino valea ka ‵tupu foki ki a au.”+ Se a la te mea ne maua mai te faiga ke poto malosi au? Fai ifo ei au i toku loto: “A te mea foki tenei e se aoga.” 16  Me ka seai ne fakamasausauaga tumau o te tino poto io me ko te tino valea.+ I aso mai mua, a tino katoa ka fakapuli atu. Kae ka mate pefea a te tino poto? E pelā eiloa mo te tino valea.+ 17  Tenā ne takalialia ei au ki te olaga,+ me i mea katoa ne fai i lalo o te la e fakafi‵ta ki a au, me i mea katoa e seai se aoga,+ ko te afuliga fua o te matagi.+ 18  Ne kamata au o takalialia ki mea kolā ne galue malosi au ki ei i lalo o te la,+ me e ‵tau eiloa o tiaki ne au a mea konā ma te tagata telā e vau i oku tua.+ 19  Kae ko oi e iloa ne ia me ko ia ka poto io me valea?+ Kae ka pule eiloa a ia i mea katoa kolā ne fakamāumāu ki ei toku malosi mo te poto ke maua ne au i lalo o te la. A te mea foki tenei e seai se aoga. 20  Ne kamata au o fanoanoa i toku loto ona ko galuega ‵mafa katoa ne galue malosi au ki ei i lalo o te la. 21  Me i te tagata e mafai o galue malosi, e takitaki ne te poto mo te iloaga mo te apo, kae e ‵tau mo ia o tuku atu tena vaega* ki se tagata telā ne seki galue mō mea konā.+ A te mea foki tenei e seai se aoga kae se matugā fakalavelave lasi eiloa. 22  Se a te mea e maua ne se tagata mai i ana galuega ‵mafa katoa mo te manakoga telā e fakamalosi ei a ia* ke galue malosi i lalo o te la?+ 23  Me i ana aso katoa, e aumai ne tena galuega a te ‵mae mo te fi‵ta,+ ke oko foki ki te po e se malōlō eiloa tena loto.+ A te mea foki tenei e seai se aoga. 24  E seai se mea e ‵lei atu ki te tagata i lō te kai kae inu kae maua te fiafia i ana galuega ‵mafa.+ Ne iloa aka ne au, i te mea foki tenei ne maua mai e auala i te lima o te Atua tonu,+ 25  me ko oi te tino e sili atu te ‵lei o ana meakai mo ana meainu i lō au?+ 26  Ki te tagata telā e fakafiafia atu ki a ia e tuku ne ia ki ei a te poto mo te iloaga mo te fiafia,+ kae ki te tino agasala e tuku ne ia ki ei a te galuega ki te fakamaopoopomaiga mo te ‵lukumaiga o mea ke tuku atu ki te tino e fakafiafia ne ia te Atua tonu.+ A te mea foki tenei e seai se aoga, ko te afuliga fua o te matagi.

Fakamatalaga mai lalo

Io me “te fiafia.”
Io me “vaega.”
Io me “tuku atu a mea katoa.”
Epelu, “mo te mea e kausaki ki ei tena loto.”