Failauga 11:1-10

  • Fakaaoga te avanoaga (1-8)

    • ‵Pei atu au falaoa ki luga i te vai (1)

    • ‵Toki au fuaga i te tafataeao ke oko ki te afiafi (6)

  • Ke maua te fiafia tonu kae koi talavou (9, 10)

11  ‵Pei atu au falaoa ki luga i te vai,+ me mai tua ifo o aso e uke ka toe maua ne koe.+  Tuku atu se vaega ki te tokofitu io me se tokovalu,+ me e se iloa ne koe me se a te fakalavelave ka tupu i te lalolagi.  Kafai e ‵fonu a kaumana i vai, ka ‵to ifo a mea konā e pelā me ne vaiua ki te lalolagi; kae kafai e siga se lakau ki te feitu ki saute io me ki te feitu ki mātū, a te koga e siga ki ei te lakau ka takato eiloa i ei.  A te tino e onoono ki te matagi ka se ‵toki fuaga, kae ko te tino e kilokilo ki kaumana ka se tau fuataga.+  E pelā eiloa mo te sē iloa ne koe a te auala e galue ei te malosi o te ola* i ivi o te tamaliki i loto* i se fafine faitama,+ e se iloa foki ne koe a galuega a te Atua tonu telā e fai ne ia a mea katoa.+  ‵Toki au fuaga i te tafataeao kae ke mo a eiloa ma mānava tou lima ke oko ki te afiafi;+ me e se iloa ne koe me kofea a mea ka manuia, ko te mea tenei io me ko te mea telā, io me ko te avā mea katoa ka ola aka.  A te mainaga e suamalie, kae se mea ‵lei ki mata ke lavea atu te la.  Me kafai e ‵tau o ola se tagata i tausaga e uke, fai ke fiafia a ia i tausaga katoa konā.+ Kae e ‵tau o masaua ne ia me i aso o te pouliga e mafai o uke; a mea katoa konā ka seai ne aoga.+  Ke fiafia, e te tamataene, i te taimi koi foliki ei koe, kae fai ke fiafia tou loto i aso koi talavou ei koe. Tautali i auala o tou loto kae fano ki te koga e takitaki ei koe ne ou mata; kae ke iloa ne koe me i te Atua tonu ka fakamasino ne ia koe ona ko mea katoa konei.+ 10  Tela la, ave kea‵tea a mea e ‵tupu ei a fakalavelave mai tou loto, kae tapale kea‵tea a mea fakalogo‵mae mai tou foitino, me i te tulaga talavou mo te tulaga malosi o te olaga e seai ne aoga.+

Fakamatalaga mai lalo

E mafai foki o fakasino atu te mea tenei ki te agaga o te Atua.
Epelu, “ivi i loto i te moegatama o.”