Faataoto 13:1-25
13 A te tamaliki poto e talia ne ia a polopolokiga a tena tamana,+Kae ko te tino fakatauemu e se fakalogo ki se pati fakatonutonu.+
2 A te tagata e kai ki mea ‵lei e fua mai i ana pati,*+Kae ko tino faitogafiti e ma‵nako malosi ki amioga fakasaua.
3 A te tino e leoleo ne ia tena gutu* e puipui ne ia tena ola,+Kae ko te tino e ‵tala ne ia ana laugutu ka oko atu ki ei te fakamaseiga.+
4 A te tino paie e isi ne ana manakoga, kae e seai ne ana mea,+Kae ko te tino e galue malosi ka lotomalie katoatoa.*+
5 A te tino amiotonu e takalialia ki te loi,+Kae ko faifaiga a tino amio ma‵sei e aumai ei te ma mo te masiasi.
6 A te amiotonu e puipui ei te tino e se ‵se tena auala,+Kae ko amioga ma‵sei e fakamasei i ei te tino agasala.
7 E isi se tino e fai pelā i a ia e maumea, kae seai eiloa ne ana mea;+E isi foki se suā tino e fai pelā i a ia e mativa, kae e uke ana koloa.
8 A te togiola mō te ola o se tagata ko ana koloa,+Kae ko te tino mativa e se mataku i se mea.+
9 A te mainaga o tino amio‵tonu e maina malosi,+Kae ko te moli o tino amio ma‵sei ka tamate.+
10 A te fakamatamata e iku atu fua ki kinauga,+Kae ko te poto i o latou kolā e ‵sala ki manatu fesoasoani.*+
11 A te maumea telā ne maua fakavave ka gasolo ifo o mu‵tana,+Kae ko te maumea o te tino telā e fakaputu malielie aka ne ia ka gasolo eiloa o uke.
12 A te fakamoemoega telā ko se taunu e fai ei te loto ke masaki,+Kae ko te manakoga telā ko taunu se lakau o te ola.+
13 So se tino e se fiafia ki akoakoga ka ‵togi ne ia te sala,+Kae ko te tino e āva ki fakatonuga ka maua ne ia te taui.+
14 A akoakoga* a te tino poto ko te pogai o te ola+E ‵fuli kea‵tea ei se tino mai i malei o te mate.
15 A te fiafia ki te ‵loto o te malamalama e fai ei ke fia‵fia a tino ki a koe,Kae ko te ala o tino faitogafiti e faigata.
16 A te tino atamai e gasuesue e ‵tusa mo te iloaga,+Kae ko te tino valea e fakaasi faka‵sau atu tena valea.+
17 A te avefekau masei e tō atu ki loto i te fakalavelave,+Kae ko te avefekau fakamaoni e aumai ne ia te faka‵leiga.+
18 So se tino e manatu māmā ki polopolokiga e oko atu ki ei te mativa mo te masiasi,Kae ko te tino e talia ne ia a fakatonutonuga* ka faka‵malugina.+
19 A te manakoga telā ko taunu e magalo ki te tino,+Kae ko te tino valea e takalialia ma ‵fuli kea‵tea mai i te masei.+
20 A te tino e sa‵sale fakatasi mo tino ‵poto ka poto,+Kae ko te tino telā e fai mea fakatasi mo tino va‵lea ka iku atu ki te masei.+
21 A fakalavelave e ‵sala ki tino agasala,+Kae ko te manuia ko te taui o tino amio‵tonu.+
22 A te tino ‵lei e tuku ne ia se tofi ki ana mokopuna,Kae ko maumea o te tino agasala ka tausi ma te tino amiotonu.+
23 A te laukele o te tino mativa telā ne fakamalū e fua mai ei a meakai e uke,Kae e mafai o ‵fulu faka‵ma ne te fai mea sē tonu.
24 So se tino e se fakasala* tena tama e takalialia ki ei,+Kae ko te tino e alofa ki a ia e polopoloki malosi atu ki a ia.+
25 A te tino amiotonu e kai kae makona,+Kae ko te tinae o te tino amio masei e seai ne mea i ei.+
Fakamatalaga mai lalo
^ Epelu, “gutu.”
^ Io me “ko pati e fai ne ia.”
^ Epelu, “ka fai ke putaputa.”
^ Io me “latou kolā e fai‵pati fakatasi.”
^ Io me “tulafono.”
^ Io me “polopolokiga ‵mafa.”
^ Epelu, “taofi tena tokotoko mai.”
