Esoto 3:1-22

  • Mose mo te vao lakau tala‵tala (1-12)

  • Ko fakamatala mai ne Ieova Tena igoa (13-15)

  • Ko fakatonu ne Ieova a Mose (16-22)

3  Ne fai a Mose mo fai te tausi mamoe o te lafu manu a te tamana o tena avaga ko Ietelo,+ te faitaulaga o Mitiana. I te ‵takiatuga ne ia o te lafu manu ki te feitu ki togala o te vao, oko atu ei a ia ki Holepa,+ te mauga o te Atua tonu.  Tenā ne fakasae atu ei ki a ia te agelu a Ieova mai loto i se afi e ‵ka i te vao lakau tala‵tala.+ Ne kilokilo atu faeloa a ia kae matea ne ia a te afi e ‵ka i loto i te vao lakau tala‵tala, kae e se ‵paku a te vao lakau tenā.  Ne fai ifo a Mose: “Au ka fano o iloilo aka a te mea fakaofoofogia tenei ke onoono aka me kaia e se ‵paku ei a te vao lakau tala‵tala.”  I te mateaga ne Ieova me ko fanatu a ia o onoono ki ei, kalaga atu ei te Atua ki a ia mai te vao lakau tala‵tala, ana muna: “Mose! Mose!” kae ne fai atu a ia: “Tenei au.”  Fai atu ei te Atua: “Sa tō fakapilipili mai. Tapale ou taka mai ou vae, me i te koga tenā e tu koe i ei se laukele tapu.”  Ne toe fai atu te Atua: “Au ko te Atua o tou tamana, te Atua o Apelaamo,+ te Atua o Isaako,+ mo te Atua o Iakopo.”+ Tenā ne ‵pono ei ne Mose ana mata, me i a ia ko mataku ma kilo atu ki te Atua tonu.  Ne toe fai atu a Ieova: “Ko oti eiloa ne lavea ne au a te puapuaga o oku tino kolā e ‵nofo i Aikupito, kae ko oti ne lagona ne au olotou ‵tagi ona ko tino kolā e faimālō latou ke ga‵lue; e iloa ‵lei ne au te lotou logo‵mae.+  Au ka fanaifo o faka‵sao latou mai lima o tino Aikupito+ kae aumai latou kea‵tea mai te fenua tenā o ave ki se fenua gali kae lasi, se fenua telā e ‵tafe i ei a susu mo hani,+ ko te kogā fenua o tino Kanana, tino Heti, tino Amoli, tino Pelise, tino Hivi, mo tino Iepuse.+  Kiloke! Ko oti ne oko mai ki a au te ‵tagi a tino Isalaelu, kae ko oti foki ne lavea ne au a faifaiga matagā a tino Aikupito ki a latou.+ 10  Kae nei la, vau ke uga ne au koe ki te Falao kae ka aumai ne koe oku tino Isalaelu ki tua mo Aikupito.”+ 11  Kae ne fai atu a Mose ki te Atua tonu: “Ko oi au ke fano au ki te Falao o aumai a tino Isalaelu ki tua mo Aikupito?” 12  Ne fai atu te Atua: “Ka fakatasi atu eiloa au ki a koe,+ kae tenei te fakailoga e iloa ei i a koe ne uga atu ne au: Kafai ko oti ne aumai ne koe a tino ki tua mo Aikupito, a koutou ka tavini* ki te Atua tonu i luga i te mauga tenei.”+ 13  Kae ne fai atu a Mose ki te Atua tonu: “Kafai e fano au ki tino Isalaelu kae fai atu ki a latou, ‘A te Atua o otou tupuga ne uga mai ne ia au ki a koutou,’ kae kafai e fai mai latou ki a au, ‘Ko oi tena igoa?’+ Ne a aku pati ka fai atu ki a latou?” 14  Muna a te Atua ki a Mose: “Ka Fai Eiloa Au mo Fai a te Mea Telā e Filifili* Au o Fai.”*+ Kae ne toe fai atu a ia: “Tenei te mea e ‵tau o fai atu ne koe ki tino Isalaelu, ‘A te tino telā e fakaigoa ki a, Ka Fai Eiloa Au, ne uga mai ne ia au ki a koutou.’”+ 15  Kae ne toe fai atu te Atua ki a Mose: “Konei au pati ka fai atu ki tino Isalaelu, ‘A Ieova te Atua o otou tupuga, te Atua o Apelaamo,+ te Atua o Isaako,+ mo te Atua o Iakopo,+ ne uga mai ne ia au ki a koutou.’ Tenei toku igoa ki te se-gata-mai,+ kae tenei te igoa ka masaua ei au ne kautama katoa. 16  Nei la, fano o fakamaopoopo a toeaina o Isalaelu kae fai atu ki a latou: ‘A Ieova te Atua o otou tupuga ko oti ne fakasae mai ki a au, ko te Atua o Apelaamo, Isaako, mo Iakopo, kae ne fai mai a ia: “Ko oti eiloa ne lavea ne au a koutou+ mo mea kolā ko oti ne fai atu ki a koutou i Aikupito. 17  Tela la, au ko fai atu penei, ka ave ne au koutou kea‵tea mai te puapuaga+ i lima o tino Aikupito ki te fenua o tino Kanana, tino Heti, tino Amoli,+ tino Pelise, tino Hivi mo tino Iepuse,+ ki se fenua telā e ‵tafe i ei a susu mo hani.”’+ 18  “Ka faka‵logo eiloa latou ki tou leo,+ ko olo ei koutou, ko koe mo toeaina o Isalaelu ki te tupu o Aikupito, kae e ‵tau o fai atu koutou ki a ia: ‘A Ieova te Atua o tino Epelu+ ko oti ne fesokotaki mai ki a matou. Tela la, fakamolemole, talia mai ke ma‵laga matou ki te koga lavaki i aso e tolu, ko te mea ke mafai ne matou o ofo atu a taulaga ki a Ieova te motou Atua.’+ 19  Kae e iloa ‵lei ne au me ka se talia ne te tupu o Aikupito ke olo koutou vagana ke faimālō a ia.+ 20  Tela la, ka ‵fola atu toku lima o fakasala a Aikupito ki aku galuega fakaofoofogia kolā ka fai i loto i ei, ka oti ko uga atu ei ne ia koutou ke olo.+ 21  Kae ka fai ne au a tino Aikupito ke fia‵fia ki a koutou, kae kafai e olo koutou, ka se olo koutou e aunoa mo ne mea i otou lima.+ 22  A fāfine taki tokotasi e ‵tau o fakamolemole ki tena tuakoi mo te fafine telā e nofo i tena fale ki mea e faite ki siliva mo aulo e pelā foki mo gatu kae faka‵pei atu ki luga i otou tama tāgata mo otou tama fāfine; kae ka fakama‵tiva ne koutou a tino Aikupito.”+

Fakamatalaga mai lalo

Io me “tapuaki.”
Io me “Manako.”
Io me “Ka Fai Eiloa ne Au so se Mea e ‵Tau o Fai.” Onoono ki te MF A4.