Esoto 20:1-26

  • Ko Tulafono e Sefulu (1-17)

  • Ko ma‵taku tino Isalaelu i te mea fakaofoofogia ne tupu (18-21)

  • Fakatonuga e uiga ki te faiga o te tapuakiga (22-26)

20  Ne fai atu ne te Atua a pati katoa konei:+  “Au ko Ieova tou Atua telā ne aumai ne ia koe ki tua mo te fenua o Aikupito, te koga ne nofo pologa+ ei koe.  E se ‵tau o isi ne nisi atua aka o koe i oku tafa.*+  “E se ‵tau mo koe o faite se tupua io me se mea* e foliga pelā mo mea i te lagi i luga io me i lalo i te lalolagi, io me i vai mai lalo o te laukele.+  E se ‵tau mo koe o ifo ki mea konā io me fakakolekolegina ke tapuaki atu ki ei,+ me i a au, Ieova tou Atua, ko te Atua telā e manako ke tapuaki+ mai fua koe ki a au tokotasi, e fakasala ne au otou tama ona ko mea ‵se ne fai ne olotou tamana, ke oko ki te tolu o kautama mo te fa o kautama o tino kolā e takalia‵lia mai ki a au,  kae fakaasi atu a te alofa fakamaoni ki te afe o kautama o tino kolā e a‵lofa mai ki a au kae faka‵logo ki aku fakatonuga.+  “E se ‵tau mo koe o sona fakaaoga a te igoa o Ieova tou Atua i se auala sē ‵tau,+ me ka fakasala eiloa ne Ieova a te tino telā e sona fakaaoga ne ia Tena igoa i se auala sē ‵tau.+  “Ke masaua te aso o te Sapati kae faka‵malu+ ki ei.  E ‵tau o fai ne koe au galuega katoa i aso e ono,+ 10  kae i te fitu o aso ko te sapati eiloa tenā ki a Ieova tou Atua. E se ‵tau mo koe o fai so se galuega, ko koe io me ko tau tama tagata io me ko tau tama fafine io me ko tau pologa tagata io me ko tau pologa fafine io me ko tau manu fagai io me ko so se tino fakaa‵tea telā e nofo i loto i ou fakai.*+ 11  Me i a Ieova ne faite ne ia te lagi mo te lalolagi, te tai mo mea katoa i loto i ei i aso e ono, kae ne kamata a ia o malōlō i te fitu o aso.+ Tenā te pogai ne fakamanuia ei ne Ieova te aso o te Sapati kae faka‵malu atu ki ei. 12  “Āva ki tou tamana mo tou mātua,+ ko te mea ke ola leva koe i te fenua telā ka tuku atu ne Ieova tou Atua ki a koe.+ 13  “E se ‵tau mo koe o tatino.+ 14  “E se ‵tau mo koe o mulilua.+ 15  “E se ‵tau mo koe o kaisoa.+ 16  “E se ‵tau mo koe o fai se molimau ‵pelo e uiga ki tou tuakoi.+ 17  “E se ‵tau mo koe o kaimanako ki te fale o tou tuakoi. E se ‵tau mo koe o manako ki te avaga a tou tuakoi+ io me ko tena pologa tagata io me ko tena pologa fafine io me ko tena pulumakau io me ko tena asini io me ko so se mea a tou tuakoi.”+ 18  Ne matea eiloa ne tino katoa a fa‵tili mo uila, te ‵tagi o te pu mo te au i te mauga; kae i te laveaga ne latou a mea konei ne pole‵pole latou i te ma‵taku kae ‵tu atu i se koga tai ‵mao.+ 19  Ne fai atu latou ki a Mose: “Faipati mai koe ki a matou, kae ka fakalogo‵logo atu matou, kae sa fai ke faipati mai te Atua ki a matou me i a matou e ma‵taku i a matou ma ‵mate i ei.”+ 20  Muna a Mose ki tino konā: “Sa ma‵taku, me i te Atua tonu ne vau ke tofotofo aka ne ia koutou,+ ko te mea ke tumau i a koutou a te mataku ki a ia kae ke se agasala koutou.”+ 21  Tenā ne ‵tu eiloa a tino i se koga tai ‵mao, kae ne fanatu a Mose ke pili atu ki te kaumana pouli telā e nofo i ei a te Atua tonu.+ 22  Tenā ne fai atu ei a Ieova ki a Mose: “Konei au pati e ‵tau o fai atu ki tino Isalaelu, ‘Ko oti ne lavea ne koutou me ne faipati atu eiloa au ki a koutou mai te lagi.+ 23  E se ‵tau mo koutou o faite ne atua siliva i oku tafa, kae e se ‵tau mo koutou o faite ne atua aulo mō koutou.+ 24  E ‵tau mo koutou o faite mai te kele se fatafaitaulaga ma aku, kae ke ofo ne koutou i ei a otou taulaga ‵sunu, otou taulaga ‵kai fakatasi, penā foki mo manu mai i otou lafu mamoe mo lafu pulumakau. So se koga telā e fai ne au ke masaua i ei toku igoa+ ka fanatu eiloa au ki a koutou kae ka fakamanuia ne au koutou i ei. 25  Kafai e faite ne koutou mai i fatu se fatafaitaulaga ma aku, e se ‵tau o fakaaoga ne koutou a fatu kolā ne ‵kati ki mea faigaluega.+ Me kafai e fakaaoga ne koutou otou tofi ki ei, ka se faka‵malu ne koutou a te fatafaitaulaga tenā. 26  Kae e se ‵tau mo koutou o ‵kake aka i sitepu ki luga i taku fatafaitaulaga, ko te mea ke se tuku faka‵sau atu otou koga tapu ki luga i ei.’

Fakamatalaga mai lalo

Io me “o ‵teke mai ki a au.” Epelu, “‵teke ki oku mata.”
Io me “se sui.”
Epelu, “mataloa o ‵pui.”