Esoto 12:1-51

  • Te fakatokaga o te Paseka (1-28)

    • E ‵tau o faka‵pisi atu a toto ki luga i pou o mataloa (7)

  • Mala i te 10: toekimua ko tamate (29-32)

  • Ko kamata o Olo Kea‵tea (33-42)

    • Te fakaotiga o tausaga e 430 (40, 41)

  • Fakatonuga e uiga ki te ‵kau atu ki te Paseka (43-51)

12  Ne faipati atu a Ieova ki a Mose mo Alona i te fenua o Aikupito:  “A te masina tenei ko te kamataga o masina mō koutou. Ko te masina muamua o masina o te tausaga mō koutou.+  Faipati atu ki tino Isalaelu katoa, kae fai atu, ‘I te po sefulu o te masina tenei, e ‵tau o puke mai ne latou taki tokotasi se mamoe+ mō te kāiga o te lotou tamana, e tasi te mamoe i te fale.  Kae kafai ko to mu‵tana a tino o te kāiga ke kai ne latou te mamoe e tasi, e ‵tau o ‵kai fakatasi latou mo te lotou* tuakoi pili mai i loto i olotou fale e ‵tusa mo te aofaki o tino i ei. I te taimi e fai ei te fakatautauga, fakamautinoa aka me e pefea te uke o ‵kano mamoe e mafai o kai ne tino taki tokotasi.  E ‵tau o ‵lei otou mamoe,+ ne mamoe tāgata ko takitasi tausaga te ma‵tua. E mafai o filifili ne koutou mai tamā mamoe tāgata io me mai kouti.  E ‵tau o tausi faka‵lei ne koutou a manu konā ke oko eiloa ki te po 14 o te masina tenei,+ kae e ‵tau o ‵ta ne te fakapotopotoga kātoa o tino Isalaelu olotou manu i te afiafi kae koi tuai o pouli.*+  E ‵tau o puke ne latou ne toto kae faka‵pisi atu ki luga i pou mataloa e lua mo te feitu ki luga o te mataloa o fale kolā e ‵kai ei latou.+  “‘E ‵tau o kai ne latou a ‵kano i te po tenei.+ E ‵tau o tao ne latou ki te afi kae ‵kai fakatasi mo falaoa sē faka‵fete+ mo laulakau ‵kona.+  Ke mo a ma kai ‵mata te manu tenā io me saka ki vai, kae ke tao ki te afi, ko tena ulu fakatasi mo ana vae mo ana tōtōga katoa. 10  E se ‵tau o tausi ne koutou ne ‵kano ke oko ki te taeao, kae ko so se mea e ‵toe ki te taeao e ‵tau o ‵sunu ne koutou ki te afi.+ 11  E ‵tau o ‵kai koutou ki ei penei, ‵sai ke ‵mau otou fusi,* mo taka i otou vae, mo otou tokotoko i otou lima; kae e ‵tau mo koutou o ‵kai fakavave ki ei. A te mea tenā ko te Paseka a Ieova. 12  Me i a au ka fano i loto i te fenua o Aikupito i te po tenei o ‵ta a toekimua katoa i te fenua o Aikupito, mai i tāgata ke oko ki manu;+ kae ka fakasala ne au a atua katoa o Aikupito.+ Au ko Ieova. 13  Ka fai a te toto mo fai te otou fakailoga i luga i fale kolā e ‵nofo ei koutou; ka lavea ne au a te toto ko fakaseke ei au i luga i a koutou, kae ka se oko atu a te mala ki luga i a koutou o fakaseai koutou māfai ko ‵ta ne au a te fenua o Aikupito.+ 14  “‘Ka fai a te aso tenei mo fai se fakamanatuga mō koutou, kae e ‵tau o fakamanatu ne koutou e pelā me se ‵kaiga fiafia ki a Ieova i otou kautama katoa. E ‵tau o fakamanatu ne koutou a te aso tenā e pelā me se tulafono fakavae ki te se-gata-mai. 15  E fitu a aso e ‵tau ei o ‵kai koutou ki falaoa sē faka‵fete.+ Ao, i te aso muamua e ‵tau o ave ne koutou kea‵tea mai i otou fale a falaoa ne palu ki te isi,* me i so se tino e kai ki falaoa faka‵fete, mai te aso muamua ke oko ki te fitu o aso, e ‵tau o tapale kea‵tea* mai tino Isalaelu. 16  I te aso muamua, ka fai ne koutou se fakatasiga tapu, kae i te fitu o aso, ko te suā fakatasiga tapu. E seai se galuega e ‵tau o fai i aso konei.+ Ko mea fua kolā e manakogina mō otou ‵kai, konā fua a mea e ‵tau o fakatoka mō koutou. 17  “‘E ‵tau mo koutou o fakamanatu faeloa a te ‵Kaiga Fiafia o Falaoa sē Faka‵fete,+ me ko te aso eiloa tenei ka aumai ei ne au te otou potukau o tino e tokouke* ki tua mo te fenua o Aikupito. Kae e ‵tau o tausi ne koutou a te aso tenei i otou kautama katoa e pelā me se tulafono fakavae ki te se-gata-mai. 18  I te po 14 o te masina muamua i te fakaafiafi, e ‵tau o ‵kai koutou ki falaoa sē faka‵fete ke oko eiloa ki te po 21 o te masina tenā i te fakaafiafi.+ 19  E seai ne falaoa ne palu ki te isi e ‵tau o maua atu i otou fale i aso e fitu konā, me i so se tino e kai ki se mea faka‵fete, faitalia me ko ia se tino fakaa‵tea io me se tino o te fenua,+ a te tino tenā e ‵tau o tapale kea‵tea* mai i te fakapotopotoga o tino Isalaelu.+ 20  E se ‵tau o ‵kai koutou ki so se mea faka‵fete. E ‵tau o ‵kai koutou ki falaoa sē faka‵fete i otou fale katoa.’” 21  Ne kalaga fakavave atu a Mose ki toeaina katoa o Isalaelu+ kae fai atu ki a latou: “Olo o fili a tamā manu* mō otou kāiga takitasi, kae ‵ta a manu mō te taulaga o te Paseka. 22  Tenā ko ufi ei ne koutou se kaula o te lakau ko te isopo ki toto i loto i te pesini kae ‵kini a te feitu ki luga o te mataloa mo pou mataloa e lua ki toto; kae e seai se tino i a koutou e ‵tau o fano ki tua mo te mataloa o tena fale ke oko eiloa ki te tafataeao. 23  Tela la, kafai e vau a Ieova o fakaoko atu te mala ki tino Aikupito kae lavea ne ia a toto i te feitu ki luga o te mataloa mo pou mataloa e lua, ka fakaseke eiloa a Ieova mai i luga i otou mataloa, kae ka se talia ne ia te mala o te mate* ke ulu ki loto i otou fale.+ 24  “E ‵tau o fakamanatu faeloa ne koutou a te mea tenei e pelā me se tulafono ki te se-gata-mai mō koutou mo otou tama tāgata.+ 25  Kae kafai ko o‵mai koutou ki te fenua telā ka tuku atu ne Ieova ki a koutou e pelā eiloa mo ana pati ne fai, e ‵tau eiloa mo koutou o fai a te fakamanatuga tenei.+ 26  Kae kafai e fesili atu otou tama tāgata ki a koutou, ‘Se a te uiga o te fakamanatuga tenei ki a koutou?’+ 27  e ‵tau o fai atu koutou, ‘Ko te taulaga o te Paseka ki a Ieova, telā ne fakaseke i luga i fale o tino Isalaelu i Aikupito i te taimi ne fakaoko atu ei ne ia te mala ki tino Aikupito, kae ne faka‵sao ne ia a fale o tatou.’” Tenā ne to‵tuli ei a tino kae ifo ki lalo. 28  Ne fai eiloa ne tino Isalaelu a mea katoa ne fakatonu atu ne Ieova ki a Mose mo Alona.+ Ne fai eiloa ne latou a mea konā. 29  Tenā ne tamate ei ne Ieova a toekimua katoa i te fenua o Aikupito i te valuapo,+ mai te toekimua a te Falao telā e sagasaga i luga i tena nofogaaliki, ke oko ki te toekimua a te pagota telā i loto i te falepuipui,* mo toekimua katoa a manu.+ 30  Ne ala aka a te Falao mo ana tavini katoa mo nisi tino Aikupito katoa i te po tenā, kae ne ‵tagi paka‵laga a tino Aikupito, me e seai eiloa se fale e seki mate se tino i ei.+ 31  I konā eiloa ne kalaga atu a te Falao ki a Mose mo Alona+ i te po tenā kae fai atu: “‵Tu ki luga, olo kea‵tea mai i oku tino, ko koulua mo nisi tino Isalaelu. Olo o tavini atu ki a Ieova, e pelā eiloa mo aulua pati.+ 32  Puke foki otou lafu mamoe mo otou lafu pulumakau kae olo, e pelā eiloa mo aulua pati.+ Kae e ‵tau foki o fakamanuia mai au ne koulua.” 33  Kae ko tino Aikupito ne kamata o fakamalosi atu ki tino ke olo fakavave+ kea‵tea mai i te fenua, “me” e pelā mo olotou pati, “i a matou e ‵pau eiloa me ne tino ko ‵mate!”+ 34  Ne ave ne tino Isalaelu olotou palugā falaoa kolā e seki faka‵fete, fakatasi mo olotou mea palu falaoa* e pelu i olotou gatu kae amo i olotou tuauma. 35  Ne fai ne tino Isalaelu a te mea telā ne fakatonu atu ne Mose ki a latou, kae ne fakamolemole atu ki tino Aikupito ke aumai ma latou ne mea e faite ki siliva mo aulo e pelā foki mo gatu.+ 36  Ne fai ne Ieova a tino Aikupito ke fia‵fia ki tino Isalaelu, tenā ne tuku atu ei ne latou a mea kolā ne fakamolemole atu ki ei a tino Isalaelu, kae ne fakama‵tiva ne latou a tino Aikupito.+ 37  Tenā ne tiaki ei ne tino Isalaelu a Lamese+ o olo ki Sukota,+ kāti e toko 600,000 tāgata e sa‵sale, kae e se lau i ei a tama‵liki.+ 38  Kae e tokouke foki a tino valevale*+ ne olo mo latou, e pelā foki mo lafu mamoe mo lafu pulumakau, se lafu manu lasi ‵ki eiloa. 39  Ne kamata o tao ne latou a palugā falaoa kolā ne aumai ne latou mai Aikupito e pelā me ne falaoa puku‵puku sē faka‵fete. E se ‵fete a falaoa konā me ne ‵tuli fakavave a latou kea‵tea mai Aikupito, telā ne seki mafai ei o fakatoka ne meakai ma latou.+ 40  Ne ‵nofo atu a tino Isalaelu i Aikupito+ i tausaga e 430.+ 41  I te fakaotiga o tausaga e 430, i te aso eiloa tenei, ne olo ei kea‵tea a te potukau kātoa o tino e tokouke* o Ieova mai te fenua o Aikupito. 42  Ko te po eiloa tenā e fakamanatu ei ne latou a te aumaiga kea‵tea o latou ne Ieova mai te fenua o Aikupito. A te po tenei e fai ei ne tino Isalaelu katoa a te fakamanatuga ki a Ieova i olotou kautama katoa.+ 43  Tenā ne fai atu ei a Ieova ki a Mose mo Alona, “Tenei te tulafono fakavae o te Paseka: E seai se tino fakaa‵tea e kai ki ei.+ 44  Kae kafai e isi se tino ne ‵togi ne ia se tagata ki tupe ke fai mo fai tena pologa, e ‵tau o pilitome ne koe a ia.+ Ko fatoa mafai ei o kai a ia i te Paseka. 45  A te tino telā e nofo i te fenua mo te tino galue sē tumau e se ‵tau o ‵kai ki ei. 46  E ‵tau o ‵kai koutou i loto i otou fale. E se ‵tau o ave ne koutou ne ‵kano ki tua i te fale, kae e se ‵tau o ‵fati ne koutou se ivi+ i ei. 47  E ‵tau o fakamanatu ne te fakapotopotoga kātoa o Isalaelu a te mea tenei. 48  Kafai e ‵nofo koutou mo se tino fakaa‵tea kae manako o fakamanatu te Paseka ki a Ieova, e ‵tau o pilitome katoa a tāgata kolā e ‵nofo mo ia. Tenā ko mafai ei o kau a ia ki te fakamanatuga, kae ka fai a ia mo fai se tino tonu o te fenua. E seai se tino e seki pilitome e ‵tau o kai ki ei.+ 49  E tasi eiloa te tulafono ka fakaaoga ki tino o te fenua mo tino fakaa‵tea kolā e ‵nofo mo koutou.”+ 50  Ne fai ne tino Isalaelu katoa a mea kolā ne fakatonu atu ne Ieova ki a Mose mo Alona. Ne fai eiloa ne latou a mea konā. 51  Ko te aso eiloa tenei ne aumai ei ne Ieova a tino Isalaelu fakatasi mo te potukau o tino e tokouke* ki tua mo te fenua o Aikupito.

Fakamatalaga mai lalo

Epelu, “a ia mo tena”
Epelu, “i te va o afiafi e lua.”
Epelu, “‵sai ke ‵mau a kona.”
Io me “mea faka‵fete.”
Io me “tamate.”
Epelu, “kautau.”
Io me “tamate.”
Kolā ko tamā mamoe io me ko tamā kouti.
Epelu, “te fakamaseiga.”
Epelu, “te fale o te vaikeli.”
Io me “pōla.”
Ko tino kolā e se ne tino Isalaelu, e aofia i ei a tino Aikupito.
Epelu, “kautau.”
Epelu, “kautau.”