Esela 9:1-15

  • Te a‵vaga ki tino mai fenua fakaa‵tea i Isalaelu (1-4)

  • Te ‵talo a Esela mō olotou mea ‵se ne fai (5-15)

9  Kae i te taimi eiloa ne palele ei a mea konei, ne o‵mai a pelenise ki a au kae fai mai: “A tino Isalaelu mo faitaulaga mo tino Levi ne seki ‵vae kea‵tea a latou mai tino o fenua i olotou tafa mo olotou faifaiga fakatakalia‵lia,+ ko tino Kanana, tino Heti, tino Pelise, tino Iepuse, tino Amoni, tino Moapi, tino Aikupito+ mo tino Amoli.+  Ne puke ne latou a nisi tama fāfine a latou mo fai olotou avaga mo avaga a olotou tama tāgata.+ Nei la, a tama* tapu+ konā ko ‵kau fakatasi mo tino o fenua i olotou tafa.+ A pelenise mo sui pule ko latou konā e tafa ki mua i te faifaiga sē fakamaoni tenei.”  I taku logoga eiloa i te mea tenei, ne saesae ne au toku gatu mo toku gatu ‵loa telā e seai ne ana lima kae unu foki a nisi laulu mai toku ulu mo toku talafa, kae sagasaga ifo au ki lalo mo te poi.  Kae ko tino katoa kolā ne āva ki* te muna a te Atua o Isalaelu ne maopoopo mai ki oku tafa ona ko te sē fakamaoni o tino kolā ne ave fakapagota, i te taimi ne sagasaga ei au mo te poi ke oko eiloa ki te taimi ne fai ei te taulaga meakai i te afiafi.+  Kae i te taimi ne fai ei te taulaga meakai+ i te afiafi, ne tu aka au mai toku tulaga masiasi mo toku gatu mo toku gatu ‵loa telā e seai ne ana lima ko oti ne saesae, kae totuli ifo au kae ‵fola atu oku lima ki a Ieova toku Atua.  Kae ne fai atu au: “Toku Atua, ko oko loa au i te mā kae masiasi ma kilo atu ki a koe, e toku Atua, me i omotou mea ‵se ko ma‵luga atu i omotou ulu kae ko te faka‵tuga o omotou agasala ko oko eiloa ki te lagi.+  Mai aso o omotou tupuga ke oko mai ki te aso nei ko sili eiloa i te ma‵sei+ o omotou agasala; kae ona ko omotou mea ‵se, ko oti ne tuku atu matou, omotou tupu, mo omotou faitaulaga ki lima o tupu o fenua i omotou tafa, ki te pelu,+ ke ave fakapagota,+ ke kaisoa omotou mea,+ kae fakamasiasigina e pelā mo te mea ko tupu i te aso nei.+  Kae nei la, i se taimi toetoe ko fiafia a Ieova te motou Atua o faka‵sao se ‵toega o tino kae tuku mai ki a matou se tulaga tokagamalie i tena koga tapu,+ ke fai ei ke ‵pula omotou mata, e te motou Atua, kae faka‵sao aka fua matou mai te motou tulaga pologa.  E tiga eiloa a matou ne pologa,+ ne seki tuku tiaki matou ne te motou Atua ke ‵nofo pologa; kae ne fakaasi mai ne ia tena alofa fakamaoni ki a matou i mua o tupu o Pelesia,+ ke faka‵sao matou ko te mea ke fakatu aka te fale o te motou Atua+ kae faka‵lei a koga kolā ne fakamasei kae ke tuku mai se ‵pui fatu i Iuta mo Ielusalema. 10  “Kae ne a omotou pati e mafai o fai ma oti atu nei, e te motou Atua? Me ko oti ne tiaki ne matou au fakatonuga, 11  kolā ne tuku mai ne koe e auala i au tavini ko te kau pelofeta, olotou muna: ‘A te laukele ka olo koutou o puke mō koutou se laukele sē ‵ma ona ko te sē ‵ma o tino o te fenua, ona ko olotou faifaiga fakatakalia‵lia kolā ne faka‵fonu ne latou ki ei mai te mata e tasi o te fenua ke oko ki te suā mata ki te lotou tulaga sē ‵ma.+ 12  Tela la, sa tuku atu otou tama fāfine ki olotou tama tāgata, ke mo a ma talia olotou tama fāfine ki otou tama tāgata;+ kae ke mo a eiloa ma ‵sala koutou ki te lotou filemu mo te lotou manuia,+ ko te mea ke mafai o gasolo aka koutou o ‵mafi kae ‵kai ki mea ‵lei mai te fenua kae puke ma koutou mo otou tama tāgata ki te se-gata-mai.’ 13  Kae mai tua o mea katoa kolā ne ‵tupu ki a matou ona ko omotou faifaiga ma‵sei mo te lasi o te motou agasala—me i a koe, e te motou Atua, ne seki fakasala eiloa ne koe matou e ‵tusa mo omotou mea ‵se ne fai,+ kae ne talia ne koe a matou konei ke ‵sao+ 14  e a, ka toe ofa foki ne matou au fakatonuga kae fakatau a‵vaga ki tino kolā e fai ne latou a faifaiga fakatakalia‵lia konei?+ E a, ka se kaitaua malosi koe ki a matou kae fakaseai katoatoa ne koe matou, ko seai ei se tino e ‵toe io me sao? 15  Ieova te Atua o Isalaelu, a koe e amiotonu,+ me i a matou ko ‵sao e pelā me se ‵toega o tino i te aso nei. Ko ‵tu atu nei matou i ou mua mo omotou agasala, me e se mafai o tu atu se tino i ou mua ona ko te mea tenei.”+

Fakamatalaga mai lalo

Epelu, “fanau.”
Epelu, “kolā ne pole‵pole i te.”