Esela 8:1-36

  • Igoa o tino kolā ne ‵foki fakatasi mo Esela (1-14)

  • Fakatokaga mō te malaga (15-30)

  • Ko tiaki a Papelonia kae oko atu ki Ielusalema (31-36)

8  Konei a ulu o kāiga i olotou tamana mo te fakasologa o gafa o latou kolā ne olo fakatasi mo au ki tua mo Papelonia i te taimi o te pulega a te Tupu ko Aletaseta:+  mai tama tāgata a Fineaso+ ko Kelesoma; mai tama tāgata a Itamala+ ko Tanielu; mai tama tāgata a Tavita ko Hatusa;  mai tama tāgata a Sekania mo tama tāgata a Palosi ko Sakalia, kae fakatasi mo ia ko tāgata e toko 150 kolā ne tusi olotou igoa i te fakasologa o gafa;  mai tama tāgata a Pahata-moapi+ ko Elionai te tama tagata a Seilaia, kae fakatasi mo ia ko tāgata e toko 200;  mai tama tāgata a Satu+ ko Sekania te tama tagata a Iasielu, kae fakatasi mo ia ko tāgata e toko 300;  mai tama tāgata a Atini+ ko Epeto te tama tagata a Ionatana, kae fakatasi mo ia ko tāgata e toko 50;  mai tama tāgata a Elama+ ko Iesaia te tama tagata a Atalia, kae fakatasi mo ia ko tāgata e toko 70;  mai tama tāgata a Sefatia+ ko Sepatia te tama tagata a Mikaele, kae fakatasi mo ia ko tāgata e toko 80;  mai tama tāgata a Ioapo ko Opetaia te tama tagata a Ieielu, kae fakatasi mo ia ko tāgata e toko 218; 10  mai tama tāgata a Pani ko Selomita te tama tagata a Iosifia, kae fakatasi mo ia ko tāgata e toko 160; 11  mai tama tāgata a Pepai+ ko Sakalia te tama tagata a Pepai, kae fakatasi mo ia ko tāgata e toko 28; 12  mai tama tāgata a Asikata+ ko Ioananu te tama tagata a Hakatana, kae fakatasi mo ia ko tāgata e toko 110; 13  mai tama tāgata a Atonikama,+ ko latou kolā ne fakamuli, kae konei olotou igoa: Elifeleti, Ieiela mo Semaia kae fakatasi mo latou ko tāgata e toko 60; 14  kae mai tama tāgata a Pikivai+ ko Utai mo Saputi, kae fakatasi mo lāua ko tāgata e toko 70. 15  Ne fakamaopoopo mai ne au a latou i te vaitafe telā e fano ki Aava,+ kae ne ‵nofo matou i konā i aso e tolu. Kae i te taimi ne sukesuke ei ne au a tino mo faitaulaga, ne seki maua ne au se tino Levi i konā. 16  Tenā ne uga atu ei taku fekau ki takitaki ko Eliesa, Alielu, Semaia, Elenatano, Ialipa, Elenatano, Natano, Sakalia mo Mesulama, mo faiakoga ko Ioialipa mo Elenatano. 17  Kae ne tuku atu ne au se fakatonuga ki a latou e uiga ki a Ito te takitaki i te koga e fakaigoa ko Kasifia. Ne fai au ki a latou ke fai atu ki a Ito mo ana taina, ko tavini o te faletapu* kolā e ‵nofo i Kasifia, ke aumai ki a matou ne tavini mō te fale o te motou Atua. 18  Ona ko te fakatasi mai o te motou Atua ki a matou, ne aumai ne latou se tagata poto mai tama tāgata a Mali+ te mokopuna tagata o Levi te tama tagata a Isalaelu, e igoa ki a Selepaia,+ mo ana tama tāgata mo ana taina, e toko 18 tāgata; 19  mo Hasapaia, kae fakatasi atu ki a ia ko Iesaia mai tino Melali+, mo ana taina mo olotou tama tāgata, e toko 20 tāgata. 20  Kae e toko 220 a tavini o te faletapu kolā ne tuku atu ne Tavita mo pelenise ke fai te taviniga a tino Levi, ko latou katoa kolā ne filifiligina olotou igoa. 21  Tenā ne fai atu ei au ke fai se fakalikilikiga i te vaitafe ko Aava, ke loto maulalo matou i mua o te motou Atua, ke ‵sala ki tena takitakiga i te motou malaga, ko matou mo omotou tama‵liki mo omotou kope katoa. 22  Au ne mā ma fakamolemole atu ki te tupu ke tuku mai ne sotia mo tāgata faka‵tele solofanua ke puipui ei matou mai fili i te auala, me ko oti ne fai atu matou ki te tupu: “A lima ‵lei o te motou Atua e i luga i a latou kolā e salasala atu ki a ia,+ kae ko tena malosi mo tena kaitaua e i luga i a latou katoa kolā e tuku tiaki ne latou a ia.”+ 23  Tenā ne fakaliki‵liki ei matou kae fakamolemole atu ki te motou Atua e uiga ki te mea tenei, kae ne fakalogo mai a ia ki te motou fakatagi.+ 24  Ne ‵vae kea‵tea ne au a takitaki o faitaulaga e toko 12, ko Selepaia mo Hasapaia+ fakatasi mo lā taina e tokosefulu. 25  Tenā ne fua atu ei ne au ki a latou a siliva mo aulo mo meāfale, ko meaalofa a te tupu mo ana tino fakatonutonu mo ana pelenise mo tino Isalaelu katoa kolā ne ‵nofo atu i konā ne fai ki te fale o te motou Atua.+ 26  Ne fua aka ne au kae tuku atu ki olotou lima e 650 taleni* siliva, e 100 meāfale siliva kolā e taki 2 taleni te ‵togi, e 100 taleni aulo, 27  e 20 tamā pōla kolā e 1,000 taleki* te ‵togi, e 2 meāfale ne faite ki kopa ‵lei, e kula kae matilotilo kae manakogina eiloa e pelā mo te aulo. 28  Tenā ne fai atu ei au ki a latou: “A koutou e tapu ki a Ieova,+ kae ko meāfale e tapu foki, kae ko siliva mo aulo ne taulaga o te lotomalie ki a Ieova te Atua o otou tupuga. 29  Tausi faka‵lei a mea konā ke oko ki te taimi e fua aka ei ne koutou i mua o takitaki o faitaulaga mo tino Levi mo pelenise o matai o Isalaelu i Ielusalema,+ i loto i potu* o te fale o Ieova.” 30  Kae ne puke ne faitaulaga mo tino Levi a siliva mo aulo mo meāfale kolā ne fua kae tuku atu ki a latou, ke aumai a mea konā ki Ielusalema ki te fale o te motou Atua. 31  Fakamuli loa, ne olo matou kea‵tea mai te vaitafe ko Aava+ i te 12 o aso o te masina muamua+ o olo ki Ielusalema, kae ne fakatasi mai eiloa a te motou Atua ki a matou, kae ne faka‵sao ne ia matou mai i lima o te fili mo tino e ‵muni i auala o taua mai ki a matou. 32  Ne oko atu matou ki Ielusalema+ kae ‵nofo i ei i aso e tolu. 33  Kae i te fa o aso, ne fua aka ne matou a siliva mo aulo mo meāfale i te fale o te motou Atua+ kae tuku atu a mea konā ki a Melemota+ te tama tagata a Ulita te faitaulaga, kae fakatasi mo ia ko Eleasalo te tama tagata a Fineaso, kae fakatasi mo lāua ko tino Levi ko Iosapata+ te tama tagata a Iesua mo Noatia te tama tagata a Pinui.+ 34  Ne lau aka kae fua a mea katoa konā, kae ne fakamau ki lalo a te ‵mafa o mea katoa konā. 35  A latou kolā ne ‵foki mai i te avega fakapagota, kolā ne ave fakapagota i te taimi muamua, ne ofo atu ne latou a taulaga ‵sunu ki te Atua o Isalaelu, e 12 pulumakau+ tāgata mō Isalaelu kātoa, e 96 mamoe ma‵tua,+ e 77 tamā mamoe tāgata kae 12 kouti+ tāgata e pelā me ne taulaga mō agasala; a mea katoa konei ko te taulaga ‵sunu ki a Ieova.+ 36  Tenā ne tuku atu ei ne matou a tulafono a te tupu+ ki tino pule* a te tupu mo kovana o te kogā koga i te Suā Feitu o te Vaitafe,*+ kae ne ‵lago atu eiloa latou ki tino mo te fale o te Atua tonu.+

Fakamatalaga mai lalo

Io me “ko Netini.” Epelu, “tino ne tuku atu.”
A te taleni e ‵pau mo te 34.2 kk. Onoono ki te MF E14.
A te taleki se tupe aulo mai Pelesia. Onoono ki te MF E14.
Io me “potu ‵kai.”
Se tofi telā e fakauiga ki “tino e puipui ne latou te koga tenā,” e fakasino atu i konei ki kovana o kogā fenua i te Malo o Pelesia.
Io me “i te Suā Feitu o te Eufilate.”