Esela 6:1-22

  • Te sukesukega mo te fakatonuga a Taliu (1-12)

  • Ko palele te faitega o te faletapu kae fakaulufale (13-18)

  • Ko fakamanatu te Paseka (19-22)

6  Ko te taimi tenā ne avatu ei ne te Tupu ko Taliu se fakatonuga, kae ne fai ne latou se sukesukega ki te fale e tausi ei a tusi mua i te koga telā e tuku i ei a koloa i Papelonia.  Kae ne maua aka i ei se peluga tusi i te taoa o Ekepatana i te kogā fenua o Metai, kae ne tusi i luga i ei a te fekau tenei:  “I te tausaga muamua o te pulega a te Tupu ko Kulesa, ne avatu ei ne te Tupu ko Kulesa se fakatonuga e uiga ki te fale o te Atua i Ielusalema:+ ‘Toe faite aka se fale mo fai se koga e ofo atu ei ne latou a taulaga, kae ke fakatakato tena fakavae i te koga tonu; a tena maluga e ‵tau o 60 kupita,* a tena lauefa e 60 kupita,+  fakatasi mo laina o fatu ‵lasi e tolu kolā ne faka‵teka ki olotou tulaga mo te laina e tasi o laupapa;+ kae ko te ‵togi e ‵togi mai i te fale o te tupu.+  E se gata i ei, faka‵foki aka a pōla aulo mo siliva i te fale o te Atua kolā ne puke ne Nepukanesa mai te faletapu telā ne tu i Ielusalema o aumai ki Papelonia,+ ko te mea ke tuku a mea konā i koga e ‵tau o tuku i ei i te faletapu i Ielusalema kae tuku atu ki te fale o te Atua.’+  “Nei la, a Tatenai te kovana o te kogā koga i te Suā Feitu o te Vaitafe,* Setala-posenai mo tau kau mo sui kovana o te kogā koga i te Suā Feitu o te Vaitafe+—faka‵mao mai te koga tenā.  Sa fakalavelave atu ki te galuega i te fale o te Atua. A te kovana o tino Iutaia mo toeaina o tino Iutaia ka toe faite ne latou a te fale o te Atua i tena koga mua.  E se gata i ei, ka avatu ne au se fakatonuga ki mea e ‵tau o fai ne koutou ki toeaina Iutaia konei mō te toe faitega ne latou a te fale o te Atua: Mai te koga ‵teu koloa a te tupu,+ mai lafoga ne ‵tae mai te kogā koga i te Suā Feitu o te Vaitafe, e ‵tau o avatu a tupe ki tāgata konei ke tumau te galuega e aunoa mo se fakatalave.+  Kae ko so se mea telā e manakogina—ko tamā pulumakau+ e pelā foki mo mamoe ma‵tua+ mo tamā mamoe+ mo fai a taulaga ‵sunu ki te Atua o te lagi, saito,+ masima,+ uaina+ mo sinu,+ e pelā mo mea e fai mai ne faitaulaga i Ielusalema—e ‵tau o tuku atu faeloa ki a latou i aso takitasi e aunoa mo te fakatamala, 10  ko te mea ke ofo atu faeloa ne latou a taulaga kolā e fakafiafia atu ki te Atua o te lagi kae ‵talo mō te ola o te tupu mo ana tama tāgata.+ 11  Ko oti foki ne avatu ne au se fakatonuga me kafai e soli ne se tino te tulafono tenei, ka tapale kea‵tea se laupapa mai tena fale kae ka sau aka a ia o faka‵lave* ki ei, kae ka ‵fuli a tena fale ki se falevatie* ona ko te agasala tenei. 12  Kae ko te Atua telā ne tuku ne ia tena igoa i konā+ ke tapale kea‵tea ne ia so se tupu mo tino kolā e sisi olotou lima o fakaseaoga te tulafono tenei kae fakamasei te fale o te Atua, telā e tu i Ielusalema. Ne avatu ne au, Taliu, te fakatonuga tenei. Ke na fai fakavave eiloa.” 13  Tenā ne fai fakavave ei ne Tatenai te kovana o te kogā koga i te Suā Feitu o te Vaitafe, Setala-posenai+ mo tino kolā e ‵kau ki a lāua a mea katoa ne fakatonu atu ne te Tupu ko Taliu. 14  Kae ne tumau eiloa a toeaina Iutaia i te faitega o te fale kae ne gasolo faeloa ki mua,+ mai fakamalosiga e auala i valoaga a Hakai+ te pelofeta mo Sakalia+ te mokopuna tagata o Ito. Ne fakapalele ne latou te faitega o te faletapu e ‵tusa mo te fakatonuga a te Atua o Isalaelu+ mo te fakatonuga a Kulesa+ mo Taliu+ mo te tupu o Pelesia ko Aletaseta.+ 15  Ne fakapalele ne latou te fale i te tolu o aso o te masina ko Atala,* i te ono o tausaga o te pulega a te Tupu ko Taliu. 16  Tenā ne fia‵fia malosi ei a tino Isalaelu, te kau faitaulaga, tino Levi+ mo te ‵toega o tino kolā ne ave fakapagota o fai a te fakaulufalega o te fale o te Atua. 17  Kae ne tuku atu ne latou e 100 pulumakau tāgata, e 200 mamoe ma‵tua, e 400 tamā mamoe mo fai te fakaulufalega o te fale o te Atua, kae e 12 kouti tāgata kolā e fetaui ‵lei mo te aofaki o matakāiga o Isalaelu mo fai a taulaga mō agasala a Isalaelu kātoa.+ 18  Kae ne filifili aka ne latou a faitaulaga i olotou potukau mo tino Levi i olotou potukau ke fai te taviniga ki te Atua i Ielusalema,+ e ‵tusa eiloa mo mea kolā ne tusi i te tusi a Mose.+ 19  Kae ne fai ne tino kolā ne ave fakapagota a te Paseka i te po 14 o te masina muamua.+ 20  A te kau faitaulaga mo tino Levi katoa, ko oti ne fai olotou faka‵māga,+ tela la, ko ‵ma latou. Ne tamate ne latou te manu o te Paseka mō tino katoa kolā ne ave fakapagota, mo nisi faitaulaga mo latou i ei. 21  Tenā ne ‵kai ei ki ei a tino Isalaelu kolā ne ‵foki mai i te avega fakapagota, fakatasi mo so se tino telā ne kau atu ki a latou kae ‵vae kea‵tea a ia mai te tulaga sē ‵ma o nisi fenua ko te mea ke tapuaki* atu ki a Ieova te Atua o Isalaelu.+ 22  Ne fakamanatu foki ne latou mo te fia‵fia a te ‵Kaiga Fiafia o Falaoa sē Faka‵fete+ i aso e fitu, me ne fai ne Ieova latou ke fia‵fia kae ne fai ne ia te loto o te tupu o Asulia ke fiafia ki a latou,+ ko te mea ke ‵lago atu a ia ki a latou* i te faiga o te galuega a te Atua tonu, te Atua o Isalaelu.

Fakamatalaga mai lalo

Kāti se 26.7 m (87.6 ft). Onoono ki te MF E14.
Io me “i te Suā Feitu o te Eufilate.”
Io me “ka ‵tuki a ia ki ei.”
Io me kāti, “se koga ‵pei kaiga; se fakaputuga fekau o manu.”
Onoono ki te MF E15.
Epelu, “‵sala.”
Epelu, “fakamalosi olotou lima.”