Esela 10:1-44

  • Te feagaiga ke uga kea‵tea a fāfine a‵vaga mai fenua fakaa‵tea (1-14)

  • Ko uga kea‵tea a fāfine a‵vaga mai fenua fakaa‵tea (15-44)

10  I te taimi koi ‵talo+ atu ei a Esela kae fakatoese atu, e tagi kae takato i mua o te fale o te Atua tonu, ne maopoopo atu se potukau e tokouke o tāgata, fāfine mo tama‵liki Isalaelu ki ana tafa, me i tino ne ‵tagi valevale.  Tenā ne fai atu ei a Sekania te tama tagata a Ieielu+ te tama tagata a Elama+ ki a Esela: “Ko oti ne fai ne matou a faifaiga sē fakamaoni ki te motou Atua mai te a‵vaga ki fāfine fakaa‵tea mai fenua i ‵tou tafa.+ Kae faitalia te mea tenei, koi isi eiloa se fakamoemoega mō Isalaelu.  Nei la, ke na fai ne tatou se feagaiga mo te ‵tou Atua+ ke uga kea‵tea a fāfine a‵vaga katoa mo olotou tama‵liki, e ‵tusa eiloa mo pati fakatonutonu a Ieova e pelā foki mo latou kolā e āva ki* te fakatonuga a te ‵tou Atua.+ Ke na gasue‵sue eiloa tatou e ‵tusa mo te Tulafono.  Tu ki luga, me i o koe te tiute ke fai te mea tenei, kae e ‵lago atu eiloa matou ki a koe. Ke loto malosi kae gasuesue.”  Tenā ne tu aka ei a Esela kae fai ne ia ke tauto atu a takitaki o faitaulaga, tino Levi mo Isalaelu kātoa ke fai ne latou a mea kolā ko oti ne fai atu.+ Tenā ne tauto atu ei latou.  Ne tu aka a Esela mai te fale o te Atua tonu kae fanatu ki te potu o Ieoananu te tama tagata a Eliasipa. E tiga loa ne fano a ia ki konā, ne seki kai a ia ki ne meakai kae seki inu ki ne vai, me koi fanoanoa eiloa a ia ona ko te sē fakamaoni o tino kolā ne ave fakapagota.+  Tenā ne avatu ei ne latou se fekau i loto i Iuta mo Ielusalema ke maopoopo fakatasi mai a tino katoa kolā ne ave fakapagota ki Ielusalema;  kae e ‵tusa mo te fakaikuga ne fai ne pelenise mo toeaina, so se tino e se vau i loto i aso e tolu ka fakamasei katoa ana kope, kae ‵tuli kea‵tea mai te fakapotopotoga o tino kolā ne ave fakapagota.+  Tenā ne maopoopo mai ei a tāgata katoa mai matakāiga o Iuta mo Peniamina ki Ielusalema i loto i aso e tolu, telā ko te iva o masina, i te po 20 o te masina. A tino katoa ne saga‵saga i te koga ateatea o te fale o te Atua tonu mo te pole‵pole ona ko te mataupu tāua tenā e pelā foki mo te ‵lotu o vaiua. 10  Tenā ne tu aka ei a Esela te faitaulaga kae fai atu ki a latou: “A koutou ne seki fakamaoni mai te a‵vaga ki fāfine fakaa‵tea,+ tela la, ko fakaopoopo ne koutou a agasala a Isalaelu. 11  Nei la, fakatoese atu ki a Ieova te Atua o otou tupuga kae fai tena loto. ‵Vae kea‵tea koutou mai tino i fenua i ‵tou tafa mo fāfine fakaa‵tea konei.”+ 12  Ne paka‵laga atu a te fakapotopotoga kātoa i se leo maluga o tali atu ki te mea tenei: “I o matou te tiute ke fai ne matou a mea katoa konā ne fai mai ne koe. 13  Kae ko oko loa te tokouke o tino, kae tenei foki te tau e ‵to ei a vaiua. E se mafai o ‵tu matou i tua, kae ko te mataupu tenei e se fai fua i loto i se aso e tasi io me i aso e lua, me i a matou ne ‵teke malosi ki te mea tenei. 14  Tela la, fakamolemole talia mai ke sui ne omotou pelenise a te fakapotopotoga kātoa;+ kae ko latou katoa i omotou fakai kolā ne a‵vaga ki fāfine fakaa‵tea ke o‵mai i se taimi telā ko oti ne fakatoka faka‵lei, fakatasi mo toeaina mo famasino o fakai takitasi, ke oko ki te taimi ko galo ei te kaitaua lasi o te ‵tou Atua ki a matou e uiga ki te mea tenei.” 15  Kae ko Ionatana te tama tagata a Asaelu mo Iaseia te tama tagata a Tikava ne ‵teke ki te mea tenei, kae ne ‵lago atu ki a lāua a tino Levi ko Mesulama mo Sapetai.+ 16  Kae ko tino kolā ne ave fakapagota ne fai ne latou a te mea telā ne lotoma‵lie ki ei; kae ko Esela te faitaulaga mo matai o kāiga i olotou tamana, kolā ne filifili aka olotou igoa, ne maopoopo i se koga fakaa‵tea o fai te lotou fono i te aso muamua o te sefulu o masina e uiga ki te mataupu tenei. 17  Kae i te aso muamua o te masina muamua ne palele ei te sukesukega ne fai ne latou mo tāgata katoa kolā ne a‵vaga ki fāfine fakaa‵tea. 18  Kae ne iloa aka me isi ne tama tāgata a faitaulaga ne a‵vaga ki fāfine fakaa‵tea:+ mai tama tāgata a Iesua+ te tama tagata a Iosataka mo ana taina ko Maseia, Eliesa, Ialipa mo Ketalia. 19  Kae ne tauto atu latou ke uga kea‵tea olotou avaga, kae ona ko te lotou agasala, e ‵tau o ofo atu ne latou se mamoe mai te lafu mamoe mō te lotou agasala.+ 20  Mai tama tāgata a Imela+ ko Hanani mo Sepatia; 21  kae mai tama tāgata a Halima+ ko Maseia, Elia, Semaia, Ieielu mo Usia; 22  kae mai tama tāgata a Pasula+ ko Elioenai, Maseia, Isamaeli, Netanelu, Iosapata mo Eleasa. 23  Kae mai tino Levi ko Iosapata, Simei, Kelaia (telā ko Kelita), Pateia, Iuta mo Eliesa; 24  kae mai tino usuusu ko Eliasipa; mai tino tausi mataloa ko Saluma, Telema mo Uli. 25  Kae mai Isalaelu, mai tama tāgata a Palosi+ ko Lamia, Isiai, Malakita, Mitiamina, Eleasalo, Malakita mo Penaia; 26  kae mai tama tāgata a Elama+ ko Matania, Sakalia, Ieielu,+ Apiti, Ielemota mo Elia; 27  kae mai tama tāgata a Satu+ ko Elioenai, Eliasipa, Matania, Ielemota, Sapata mo Asisa; 28  kae mai tama tāgata a Pepai+ ko Ieoananu, Hanania, Sapai mo Atelai; 29  kae mai tama tāgata a Pani ko Mesulama, Maluka, Ataia, Iasupa, Seala mo Ielemota; 30  kae mai tama tāgata a Pahata-moapi+ ko Atana, Kelali, Penaia, Maseia, Matania, Pesaleli, Pinui mo Manase; 31  kae mai tama tāgata a Halima+ ko Eliesa, Isia, Malakita,+ Semaia, Saimeona, 32  Peniamina, Maluka mo Semalia; 33  mai tama tāgata a Hasumu+ ko Matenai, Maatata, Sapata, Elifeleti, Ielemai, Manase mo Simei; 34  mai tama tāgata a Pani ko Matai, Amalamo, Uele, 35  Penaia, Peteia, Keluhi, 36  Uania, Melemota, Eliasipa, 37  Matania, Matenai mo Iasu; 38  kae mai tama tāgata a Pinui ko Simei, 39  Selemia, Natano, Ataia, 40  Makanetepai, Sasai, Saalai, 41  Asalelu, Selemia, Semalia, 42  Saluma, Amalia mo Iosefa; 43  kae mai tama tāgata a Nepo ko Ieiela, Matitia, Sapata, Sapina, Iatai, Ioelu mo Penaia. 44  A latou katoa konei ne a‵vaga ki fāfine fakaa‵tea,+ kae ne uga kea‵tea ne latou olotou avaga fakatasi mo olotou tama tāgata.+

Fakamatalaga mai lalo

Epelu, “kolā e pole‵pole i te.”