Esekielu 9:1-11

  • Tino fakaoko sala e tokoono mo te tagata mo tena mea tusitusi (1-11)

    • Ka kamata te fakamasinoga i te koga tapuaki (6)

9  Tenā ne kalaga mai ei a ia ki oku taliga i se leo maluga, ana muna: “‵Kami mai a latou kolā ka aumai ne latou te fakasalaga ki te fakai, ko tino taki tokotasi mo olotou meatau o te fakamaseiga i olotou lima!”  Ne lavea ne au a tāgata e tokoono e o‵mai i te feitu o te mataloa tafa ki luga+ telā e ‵fuli atu ki mātū, ko tino taki tokotasi mo olotou meatau i olotou lima mō pago a mea; kae e tokotasi te tagata e tu i a latou e pei ki gatu lino, mo te mea tusitusi a te failautusi i tena taugasulu, kae ne o‵mai latou ki loto kae ‵tu i tafa o te fatafaitaulaga kopa.+  Tenā ne fanaka ei te ‵malu o te Atua o Isalaelu+ mai te koga ne nofo i ei mai i luga o kelupi kae gasue atu ki te mataloa o te fale,+ kae ne kamata o kalaga atu ki te tagata telā e pei ki gatu lino mo te mea tusitusi a te failautusi i tena taugasulu.  Muna a Ieova ki a ia: “Fano i loto i te fakai, i loto i Ielusalema, kae fakamailoga a lae o tāgata kolā e mānava fi‵ta kae ‵tagi fi‵ta+ ona ko mea fakatakalia‵lia katoa kolā e fai i loto i te fakai.”+  Kae ne lagona ne au a ia e fai atu ki nisi tino: “Olo i loto i te fakai i tua o tou tagata tenā o ‵ta a tino. Ke mo a eiloa ma ‵kilo a‵lofa atu otou mata ki a latou, kae ke mo a foki e a‵lofa atafai koutou.+  E ‵tau mo koutou o tamate katoa a tāgata ma‵tua, tamataene, tamafine, tama‵liki mo fāfine.+ Kae ke mo a ma fakapilipili atu ki so se tagata e isi se fakamailoga i ei.+ E ‵tau mo koutou o kamata mai i toku koga tapuaki.”+ Tenā ne kamata ei latou mai i toeaina i mua o te fale.+  Ne fai atu a ia ki a latou: “Fakalailai te fale kae faka‵fonu te koga ateatea ki tino ne tamate.+ Olo!” Tenā ne olo ei latou kae ‵ta a tino i loto i te fakai.  I te taimi ne ‵ta ei ne latou a tino, ne nofo tokotasi au, kae ne totuli ifo au mo oku mata e ‵fuli ki lalo kae tagi: “Oi aue, e te Aliki Sili ko Ieova! E a, ka tamate eiloa ne koe a te ‵toega o tino Isalaelu i te taimi e ‵ligi ei ne koe tou kaitaua ki luga i Ielusalema?”+  Tenā ne fai mai ei a ia ki a au: “A te mea ‵se a te kāiga o Isalaelu mo Iuta ko oko eiloa i te lasi.+ A te fenua ko ‵fonu i te fakamaligi toto,+ kae ko te fakai ko ‵fonu i te fai mea piko‵piko.+ Me e fai mai latou, ‘Ko oti ne tiaki ne Ieova te fenua, kae e se lavea ne Ieova a tatou.’+ 10  Kae e pelā mo au, oku mata ka se kilo alofa atu ki a latou; io me alofa atafai+ au. A ikuga o olotou auala ka aumai ne au ki luga i olotou ulu.” 11  Tenā ne lavea ei ne au te tagata e pei ki gatu lino mo te mea tusitusi i tena taugasulu e avatu ne ia se tala, ana muna: “Ko oti eiloa ne fai ne au te mea ne fakatonu mai ne koe.”

Fakamatalaga mai lalo