Esekielu 38:1-23

  • Ko taua atu a Koka ki Isalaelu (1-16)

  • Te kaitaua o Ieova ki a Koka (17-23)

    • ‘Ka iloa ei ne atufenua i a au ko Ieova’ (23)

38  Ne toe oko mai te fekau a Ieova ki a au, ana muna:  “Te tama a te tagata, ‵fuli atu ou mata o ‵teke a Koka mai te fenua o Makoka,+ te takitaki pule o Meseko mo Tupalu,+ kae ‵valo atu o ‵teke ki ei.+  Fai atu, ‘Konei a pati a te Aliki Sili ko Ieova ne fai mai: “Au tenei e ‵teke atu ki a koe, e Koka, te takitaki pule o Meseko mo Tupalu.  Ka ‵fuli mai ne au koe kae faka‵lave a kafilo ki ou kauvae+ kae aumai koe ki tua fakatasi mo tau kautau katoa,+ solofanua mo tāgata faka‵tele solofanua, a latou katoa e ‵pei ki gatu ‵gali, se fakapotopotoga e tokouke fakatasi mo talita mo talita fo‵liki, kae e tofu latou katoa mo pelu;  a Pelesia, Aitiope mo Puti+ e ‵kau fakatasi mo latou, e tofu a latou katoa mo talita fo‵liki mo puloutau;  ko Komeli mo ana kautau katoa, te kāiga o Tokalama+ mai toe koga ‵mao i te feitu ki mātū, fakatasi mo ana kautau katoa​—e tokouke a tino e ‵kau fakatasi mo koe.+  “‘“Ke toka, fakatoka koutou, ko koe mo au kautau katoa kolā e maopoopo fakatasi mo koe, kae ka fai koe mo olotou takitaki.  “‘“Ka saga atu au ki a koe mai tua o aso e uke. I tausaga fakaotioti ka ulu mālō atu ei koe ki te fenua telā ne toe fakafou aka ne ana tino mai fakamaseiga a te pelu, ne fakamaopoopo fakatasi mai i atufenua e uke ki luga i mauga o Isalaelu, kolā ko leva ne tuku tiaki. A tino o te fenua tenei ne toe faka‵foki mai i atufenua, kae ko latou katoa e ola mo te tokagamalie.+  A koe ka vau o taua atu ki a latou e pelā me se afā, kae ka ufi ne koe te fenua e pelā me ne kaumana, ko koe mo au kautau katoa mo tino e tokouke fakatasi mo koe.”’ 10  “Konei a pati a te Aliki Sili ko Ieova ne fai mai: ‘I te aso tenā ka oko mai a mafaufauga ki tou loto, kae ka fai ei ne koe se togafiti matagā. 11  Ka fai aka koe: “Ka ulu mālō atu au ki loto i te fenua telā e seai ne ana ‵pui.+ Ka vau au o taua ki a latou kolā e ola mo te tokagamalie, e aunoa mo ne fakalavelave, ko latou katoa kolā e ‵nofo i koga e seai ne ‵pui, lakau faka‵lava io me ne mataloa mō puipui latou.” 12  Ka fai penā ko te mea ke puke kae ‵fao mai a mea e uke o te taua, ke taua atu ki koga kolā ne fakamaseigina kae ko ‵nofo nei i ei a tino+ mo se fenua ne toe fakamaopoopo mai i nisi atufenua,+ kolā e fakaputu aka olotou koloa mo kope,+ ko latou kolā e ‵nofo i te kogaloto o te lalolagi. 13  “‘A Seepa+ mo Titana,+ ko tino fai pisinisi o Talasisi+ mo ana toa ‵mafi katoa ka fai atu ki a koe: “E a, ko ulu mālō atu koe o puke a mea e uke o te taua kae ‵fao olotou mea? Ko oti ne fakamaopoopo mai ne koe au kautau ke puke a siliva mo aulo, ke puke a koloa mo kope, kae ke puke a mea e uke mai i te taua?”’ 14  “Tela la, ‵valo atu e te tama a te tagata, kae fai atu ki a Koka, ‘Konei a pati a te Aliki Sili ko Ieova ne fai mai: “I te aso tenā, kafai ko ola oku tino Isalaelu mo te tokagamalie, e a ka se iloa ne koe?+ 15  Ka vau koe mai i tou koga, mai i toe koga ‵mao i te feitu ki mātū,+ ko koe mo tino e tokouke fakatasi mo koe, a latou katoa e ‵tele i luga i solofanua, se fakapotopotoga lasi, se kautau lasi ‵ki.+ 16  E pelā me ne kaumana e ufi ne latou te fenua, ka vau koe o taua ki oku tino Isalaelu. I te fakaotiotiga o aso fakaoti ka aumai ne au koe ke taua mai ki toku fenua+ ko te mea ke iloa ne atufenua a au māfai ko fai ne au ke lavea ne latou toku ‵malu e auala i aku faiga e fai ki a koe, e Koka.+ 17  “Konei a pati a te Aliki Sili ko Ieova ne fai mai: ‘E a, e se ko koe te tino ne faipati au e uiga ki ei i aso mua e auala i aku tavini ko pelofeta o Isalaelu, kolā ne ‵valo atu i tausaga e uke me ka puke mai koe ke taua atu ki a latou?’ 18  “‘I te aso tenā, te aso e ulu mālō atu ei a Koka ki te fenua o Isalaelu,’ ko te folafolaga a te Aliki Sili ko Ieova, ‘ka oso aka ei toku kaitaua lasi.+ 19  I te lasi o toku kaitaua, i toku kaitaua telā e ‵ka pelā me se afi, ka faipati atu au; kae i te aso tenā ka isi se mafuie lasi i te fenua o Isalaelu. 20  Ona ko au, a ika o te tai, manu eva o te lagi, manu fe‵kai o te vao, manu ‵tolo katoa o te laukele, mo tino katoa i luga i te lalolagi ka pole‵pole, kae ko mauga ka ‵pei ifo ki lalo,+ a kaupapa ka ma‵toli ifo, kae ko ‵pui katoa ka maofa ki lalo i te laukele.’ 21  “‘Ka kalaga atu au ki se pelu ke taua atu ki a ia i luga i aku mauga katoa,’ ko te folafolaga a te Aliki Sili ko Ieova. ‘A pelu a tāgata taki tokotasi ka taua atu ki olotou taina eiloa.+ 22  Ka aumai ne au taku fakamasinoga ki a ia fakatasi mo famai+ mo te fakamaligiga o toto; kae ka faka‵to ifo ne au se vaiua ‵lotu mo vaiua fatu+ mo te afi+ mo te pauta ‵ka+ ki luga i a ia mo ana kautau mo tino e tokouke katoa e ‵kau mo ia.+ 23  Kae ka fakamaluga aka ne au a au eiloa kae faka‵malu ne au a au eiloa kae fai ke iloa au ne tino o atufenua e uke; kae ka iloa ei ne latou i a au ko Ieova.’

Fakamatalaga mai lalo