Esekielu 3:1-27

  • E ‵tau o kai a Esekielu ki te peluga tusi mai te Atua (1-15)

  • Ka fai a Esekielu e pelā me se leoleo (16-27)

    • A te fakatamala e iku atu ki te fakamaligiga o toto (18-21)

3  Tenā ne fai mai ei a ia ki a au: “Te tama a te tagata, kai ki te mea tenā i ou mua. Kai ki te peluga tusi tenei, kae fano o faipati ki te kāiga o Isalaelu.”+  Tenā ne fakamaga aka ei toku gutu kae fai ne ia ke kai ne au te peluga tusi tenei.  Ne toe fai mai a ia ki a au: “Te tama a te tagata, kai ki te peluga tusi tenei e tuku atu ne au, kae faka‵fonu tou tinae ki ei.” Tenā ne kamata ei au o kai ki ei, kae ne magalo eiloa e pelā me se hani i loto i toku gutu.+  Ana muna ki a au: “Te tama a te tagata, fano ki loto i te kāiga o Isalaelu kae fai atu aku pati ki a latou.  Me i a koe e seki uga atu ki se fenua e fai‵pati ki se ‵gana e faigata o malamalama i ei io me faigata ke faipati ki ei, kae ki te kāiga o Isalaelu.  A koe e seki uga atu ki tino e tokouke kolā e fai‵pati ki se ‵gana e faigata o malamalama i ei io me faigata ke faipati ki ei, kae faigata ke malamalama koe i olotou pati. Kafai e uga ne au koe ki a latou, ka faka‵logo mai latou ki a koe.+  Kae ko te kāiga o Isalaelu ka ita ma faka‵logo ki a koe, me e se ma‵nako latou o faka‵logo mai ki a au.+ A tino katoa i te kāiga o Isalaelu e loto ma‵keke kae fai ‵tonu.+  Kiloke! Ko oti ne fai ne au ou mata ke ma‵keke eiloa e pelā mo olotou mata kae ko tou lae ke makeke eiloa e pelā mo olotou lae.+  Ko oti ne fai ne au tou lae ke pelā me se taemani, e makeke atu i lō te fatu makeke.+ Sa mataku i a latou io me mataku i olotou mata,+ me i a latou se kāiga ‵teke.” 10  Ne toe fai mai a ia ki a au: “Te tama a te tagata, tausi a mea konei i tou loto kae fakalogo mai ki aku pati katoa e fai atu ki a koe. 11  Fano ki loto i ou tino kolā ne ave fakapagota+ kae faipati atu ki a latou. Fai atu ki a latou, ‘Konei a pati a te Aliki Sili ko Ieova ne fai mai,’ faitalia me faka‵logo latou io me ita latou ma faka‵logo.”+ 12  Tenā ne ave ei au ne se agaga+ kae ne lagona ne au i oku tua se mea e ‵gulu malosi telā ne fai mai: “Ke vikia a te ‵malu o Ieova mai i tena koga.” 13  Ne lagona atu i konā a te ‵tagi o kapakau o mea ola e kapatā te suā kapakau ki te suā kapakau,+ mo te ‵tagi o teka i olotou tafa,+ mo te ‵tagi o te mea telā e ‵gulu malosi. 14  Kae ne puke aka au ne te agaga kae ave ne ia au, kae ne fano au mo te kaitaua mo toku loto ita, kae ko te lima o Ieova ne malosi ‵ki i luga i a au. 15  Tenā ne fanatu ei au ki tino kolā ne ave fakapagota i Tele-apipa, kolā e ‵nofo i tafa o te vaitafe ko Kepala,+ kae ne nofo au i konā i te koga ne ‵nofo latou i ei; ne nofo atu au i konā mo te ‵numi+ i aso e fitu. 16  I te fakaotiga o aso e fitu ne oko mai te fekau a Ieova ki a au: 17  “Te tama a te tagata, ko oti ne ‵tofi aka ne au koe e pelā me se leoleo mō te kāiga o Isalaelu;+ kae kafai e lagona ne koe se fekau mai i toku gutu, e ‵tau o fakailoa atu ne koe ki a latou a te mea tenā mai i a au.+ 18  Kafai e fai atu au ki se tino amio masei, ‘A koe ka mate eiloa,’ kae e se fakailoa atu ne koe te mea tenā ki ei, kae e se faipati atu koe o fakailoa atu ki te tino amio masei ke ‵fuli mai i tena auala matagā ko te mea ke tumau a ia i te ola,+ ka mate eiloa a ia ona ko tena mea ‵se me i a ia se tino amio masei,+ kae ka taui atu ne au ki a koe a toto o te tagata tenā.+ 19  Kae kafai ne fakailoa atu ne koe ki te tino amio masei kae e se ‵fuli mai a ia mai i ana amioga ma‵sei mo ana auala ma‵sei, ka mate eiloa a ia ona ko tena mea ‵se, kae ko fakasao eiloa ne koe a tou ola.+ 20  Kae kafai e tiaki ne se tino amiotonu a tena amiotonu kae fai a te mea ‵se, ka tuku ne au se fatu faka‵siga tino i ana mua kae ka mate a ia.+ Kafai ne seki fakailoa atu ne koe ki a ia, ka mate a ia i tena agasala kae ko ana faifaiga amio‵tonu ka se masaua eiloa, kae ka toe taui atu ne au ana toto ki a koe.+ 21  Kae kafai ne fakailoa atu ne koe ki te tino amiotonu ke se agasala, kae ne seki agasala a ia, ka tumau eiloa a ia i te ola me ne isi se fakailoaga ne oko atu ki a ia,+ kae ka fakasao eiloa ne koe a tou ola.” 22  A te lima o Ieova ne oko mai ki a au i konā, kae ne fai mai a ia ki a au: “Tu ki luga, fano ki te vanu laugatasi, kae ka faipati atu au ki a koe i konā.” 23  Tenā ne tu aka ei au ki luga kae fano ki te vanu laugatasi, kae kiloke! a te ‵malu o Ieova e nofo mai i konā,+ e pelā mo te ‵malu ne lavea ne au i tafa o te vaitafe ko Kepala,+ kae ne totuli ifo au mo oku mata e ‵fuli ki lalo. 24  Tenā ne oko mai ei te agaga ki a au kae fai ei au ke tu ki luga i oku vae,+ kae ne faipati mai a ia ki a au, ana muna: “Fano o ‵loka koe i loto i tou fale. 25  E pelā mo koe e te tama a te tagata, ka tuku atu ne latou ki luga i a koe a lōpu kae saisai koe ki ei ko te mea ke se mafai ne koe o fano ki tua i a latou. 26  Kae ka fai ne au tou alelo ke ‵piki ki tou gutu, kae ko koe ka gūgū, ko se mafai o polopoloki ‵mafa atu latou, me i a latou se kāiga ‵teke. 27  Kae kafai e faipati atu au ki a koe ka fakamaga ne au tou gutu, kae e ‵tau mo koe o fai atu ki a latou:+ ‘Konei a pati a te Aliki Sili ko Ieova ne fai mai.’ A te tino telā e fakalogo ke na fakalogo eiloa,+ a te tino telā e ita ma fakalogo ke na ita eiloa, me i a latou se kāiga ‵teke.+

Fakamatalaga mai lalo