Esekielu 21:1-32

  • Ko tapale ki tua te pelu o te fakamasinoga a te Atua (1-17)

  • Te tupu o Papelonia ka taua atu ki Ielusalema (18-24)

  • Ka tapale kea‵tea a te takitaki masei o Isalaelu (25-27)

    • “Tapale te kalauna” (26)

    • “Ke oko eiloa ki te taimi e oko mai ei te tino tonu telā e ‵tau o maua ne ia” (27)

  • Te pelu telā e taua atu ki tino Amoni (28-32)

21  Ne toe oko mai te fekau a Ieova ki a au, ana muna:  “Te tama a te tagata, ‵fuli atu ou mata ki Ielusalema, kae folafola atu o ‵teke ki koga tapu i ei, kae ‵valo atu o ‵teke ki te fenua o Isalaelu.  Fai atu ki te fenua o Isalaelu, ‘Konei a pati a Ieova ne fai mai: “Au tenei e ‵teke atu ki a koe, kae ka aumai ne au te pelu mai te mea e tuku i ei+ kae ‵kati kea‵tea mai i a koe a tino amio‵tonu mo tino amio ma‵sei.  Me ka ‵kati kea‵tea ne au mai i a koe a tino amio‵tonu mo tino amio ma‵sei, a taku pelu ka tapale mai i te koga e tuku i ei ke taua atu ki tino katoa, mai te feitu ki saute ke oko ki te feitu ki mātū.  Ka iloa ne tino katoa me i a au, Ieova, ko oti ne tapale kea‵tea taku pelu mai te koga e tuku i ei. Ka se toe fakafoki eiloa ki ei.”’+  “Kae ko koe, e te tama a te tagata, mānava fi‵ta i te taimi e polepole ei koe, ao, mānava fi‵ta mo te mafatia i mua o latou.+  Kae kafai e fai atu latou ki a koe, ‘Kaia e mānava fi‵ta ei koe?’ ka fai atu koe, ‘Ona ko te lipoti.’ Me ka oko mai eiloa, kae ko loto katoa ka liuvai i te ma‵taku, kae ko lima katoa ka gau‵gau kae ko tino katoa ka loto fanoa‵noa kae ko tulivae katoa ka moti‵moti mai i ei a vai.*+ ‘Kiloke! Ka oko mai eiloa​—ka taunu eiloa,’ ko te folafolaga a te Aliki Sili ko Ieova.”  Ne toe oko mai te fekau a Ieova ki a au, ana muna:  “Te tama a te tagata, ‵valo atu kae fai atu: ‘Konei a pati a Ieova ne fai mai: “Fai atu, ‘Se pelu!+ Se pelu ko fakamata kae fakamaniania. 10  E fakamata ke fakaoko atu i ei se tamatega lasi; e fakamaniania ke malapu e pelā me se uila.’”’” “E a, e se ‵tau mo tatou o fia‵fia?” “‘E a, ka ‵teke ne ia* te tokotoko a taku tama,+ e pelā mo ana mea e fai ki lakau katoa? 11  “‘E tuku atu ke fakamaniania kae ke puke i te lima. A te pelu tenei e fakamata kae fakamaniania, ke tuku atu ki te lima o te tino tamate tino.+ 12  “‘Tagi kae tagi pakalaga,+ e te tama a te tagata, me ko oko mai te pelu o taua ki oku tino; e taua atu ki takitaki katoa o Isalaelu.+ Ka fai latou konei mo tino kolā e ‵mate i te pelu fakatasi mo oku tino. Tela la, ‵pa tou kauaga i te fanoanoa. 13  Me e isi se iloiloga ko oti ne fai,+ kae se a te mea ka tupu māfai e ‵teke ne te pelu te tokotoko? Ka se toe ai eiloa,’+ ko te folafolaga a te Aliki Sili ko Ieova. 14  “Kae ko koe, e te tama a te tagata, ‵valo atu kae pati ou lima kae toe fai atu ‘Se pelu!’ fakatolu taimi. Ko te pelu o tino kolā ne tamate, ko te pelu o te tamatega lasi, telā e fakatamilo i a latou.+ 15  A olotou loto ka liuvai i te ma‵taku+ kae e tokouke a tino ka ‵mate i mataloa o te fakai; ka fakaoko atu ne au se tamatega e auala i te pelu. Ao, e malapu e pelā me se uila kae ne fakamaniania mō te tamatega! 16  ‵Kati tonu ki te fakaatamai! ‵Kati ki te fakamaui! ‵Kati tonu ki so se koga e saga ki ei te mata o tau pelu! 17  Ka pati foki oku lima kae fakamalie aka toku ita.+ Ko au, Ieova, ko oti ne faipati atu.” 18  Kae ne toe oko mai te fekau a Ieova ki a au, ana muna: 19  “E pelā mo koe e te tama a te tagata, fakamailoga a auala e lua mō te pelu o te tupu o Papelonia ke vau i ei. A auala e lua e māfua katoa mai i te fenua e tasi, kae e ‵tau o fakatu aka se fakailoga* i te koga telā e maga ei te auala ki fakai e lua. 20  E ‵tau o fakamailoga ne koe a te auala e tasi o te pelu ke vau o taua ki Lāpa+ o tino Amoni, kae ko te suā auala ke taua atu ki Ielusalema+ telā e puipui faka‵lei i Iuta. 21  Me i te tupu o Papelonia e tu o fakaaoga a mea fakataulaitu i te maga o te auala, te koga e maga ki ei a auala e lua. E lūlū ne ia a matasana. E fesokotaki atu a ia ki ana tupua;* e iloilo ne ia te ate o se manu. 22  A te mea fakataulaitu i tena lima fakaatamai e tusi atu ki Ielusalema, ke faka‵tu aka a meatau, ke tuku atu te fakatonuga o te tamatega, ke fakatagi te kalaga o te taua, ke faka‵tu aka a meatau mo ofa a mataloa o te fakai, ke tanu a koga ke ma‵luga, ke faite se pā e fakatamilo i te ‵pui.+ 23  Kae e foliga mai a te mea fakataulaitu tenā e pelā me se mea sē tonu i te kilokiloga a latou* kolā ne fai olotou tautoga ki a latou.+ Kae ne masaua ne ia olotou mea ‵se kae ka puke ne ia latou.+ 24  “Tela la, konei a pati a te Aliki Sili ko Ieova ne fai mai: ‘Ko oti ne fai ne koe ke toe masaua aka au mea ‵se mai te fakaasi faka‵sau atu o au amioga solitulafono kae fai ei ke lavea atu au agasala i au faifaiga katoa. Nei la, ko toe masaua aka a koe, ka faimālō koe ke ave kea‵tea.’ 25  “Kae ko tou aso ko oko mai, e te tino ne pakia malosi, te takitaki masei o Isalaelu,+ ko te taimi o tou fakasalaga fakaoti. 26  Konei a pati a te Aliki Sili ko Ieova ne fai mai: ‘Ave kea‵tea te pulou o te tupu, kae tapale te kalauna.+ A te mea tenei ka se tumau.+ Fakatu aka te tino malalo,+ kae tuku ifo ki lalo te tino maluga.+ 27  Se fakamaseiga, se fakamaseiga, se fakamaseiga ka fai ne au ki ei. Kae ka se tuku atu ki se isi tino ke oko eiloa ki te taimi e oko mai ei te tino tonu telā e ‵tau o maua ne ia,+ kae ka tuku atu ne au ki a ia.’+ 28  “Kae ko koe, e te tama a te tagata, ‵valo kae fai atu, ‘Konei a pati a te Aliki Sili ko Ieova ne fai mai e uiga ki tino Amoni kae penā foki ki olotou pati sē lei.’ Fai atu, ‘Se pelu! Ko tapale se pelu mō te tamatega; e fakamaniania ke tamate kae ke malapu e pelā me se uila. 29  Faitalia a fakaasiga sē ‵tonu mo mea fakataulaitu ‵loi e uiga ki a koe, a koe ka fakaputu aka i luga o tino ne tamate, ko tāgata amio ma‵sei kolā ko oti ne oko mai te lotou aso, ko te taimi o te lotou fakasalaga fakaoti. 30  Toe fakafoki te pelu ki te mea e tuku i ei. Ka fakamasino ne au koe i te koga ne faite ei koe, i te fenua ne māfua mai ei koe. 31  Ka ‵ligi atu ne au toku kaitaua ki luga i a koe. Ka ‵pusi atu ne au ki luga i a koe a te afi o te kaitaua, kae ka tuku atu ne au a koe ki tāgata fakasaua, ko tāgata apo i te fakamasei mea.+ 32  A koe ka fai pelā me se fafie mo tafu te afi;+ a tou toto ka fakamaligi i te fenua, kae ka se toe masaua atu koe, me i a au, Ieova, ko oti ne faipati atu.’”

Fakamatalaga mai lalo

Telā ko mimi ona ko te mataku.
Telā ko te pelu a Ieova.
Epelu, “lima.”
Epelu, “telafimi.”
Telā ko tino kolā e ‵nofo i Ielusalema.