Te Lua Tupu 8:1-29

  • Ko toe fakafoki te laukele o te fafine Sunema ki a ia (1-6)

  • Elisaia, Peniata mo Hasaeli (7-15)

  • Iolama, te tupu o Iuta (16-24)

  • Aasaia, te tupu o Iuta (25-29)

8  Ne fai atu a Elisaia ki te fafine telā ne fakaola ne ia tena tama tagata:+ “Tu ki luga o fano, ko koe mo tou kaufale, kae ola e pelā me se tino fakaa‵tea i so se koga e mafai o ola koe i ei, me ko oti ne folafola mai ne Ieova me ka poko se oge+ i luga i te fenua i tausaga e fitu.”  Tenā ne tu aka te fafine kae fai ne ia a mea ne fai atu ne te tagata o te Atua tonu. Ne olo a ia mo tena kaufale o ‵nofo i te fenua o tino Filisitia+ i tausaga e fitu.  I te otiga o tausaga e fitu, ne foki mai ei te fafine mai te fenua o tino Filisitia kae fano o fai tena tagi ki te tupu e uiga ki tena fale mo tena laukele.  Ne faipati atu a te tupu ki a Keasi te tavini a te tagata o te Atua tonu, ana muna: “Fakamatala mai ki a au, fakamolemole, a mea ‵gali katoa ne fai ne Elisaia.”+  I te taimi koi fakamatala atu ei ne ia ki te tupu a te auala ne fakaola aka ei ne tou tagata se tino mate,+ ne vau te fafine telā ne fakaola aka tena tama tagata ki te tupu o fai tena tagi e uiga ki tena fale mo tena laukele.+ I konā loa ne fai atu a Keasi: “Toku aliki te tupu, tenei te fafine, kae tenei tena tama tagata telā ne fakaola aka ne Elisaia.”  I konā eiloa ne fesili atu te tupu ki te fafine, kae ne fakamatala atu ne tou fafine te tala ki a ia. Tenā ne ‵tofi ei ne te tupu se ofisa ki tou fafine kae fai atu ki ei: “Faka‵foki a mea katoa a te fafine tenei kae ‵togi atu ki ei a tupe kolā ne ‵tau o maua ne ia mai ana fuataga i te fitu tausaga ne galo a ia i ei.”  Ne vau a Elisaia ki Tamaseko+ i te taimi ne masaki ei a Peniata+ te tupu o Sulia. Tenā ne avatu ei te lipoti ki a ia: “A te tagata o te Atua tonu+ ko oti ne vau ki konei.”  I konā ne fai atu te tupu ki a Hasaeli:+ “Puke aka se meaalofa kae fano o fakafetaui ki te tagata o te Atua tonu.+ Fesili atu ki a Ieova e auala i a ia, penei ‘E mata, ka ‵lei au mai te masaki tenei?’”  Ne fanatu a Hasaeli o fakafetaui ki a ia kae puke ne ia se meaalofa, ko so se mea ‵lei i Tamaseko, e 40 kamela ne fakauta ki ei. Ne fanatu a ia kae tu atu i ana mua, ana muna: “A tau tama ko Peniata te tupu o Sulia, ne uga mai ne ia au ki a koe, ke fesili atu, ‘E mata, ka ‵lei au mai te masaki tenei?’” 10  Ne tali atu a Elisaia ki a ia: “Fano kae fai ki ei, ‘A koe ka ‵lei eiloa,’ kae ne fakaasi mai ne Ieova ki a au i a ia ka mate eiloa.”+ 11  Kae ne pula ‵toka eiloa a ia ki tou tagata ke oko ki te taimi ko mā ei tou tagata. Tenā ne tagi mautuutu ei te tagata o te Atua tonu. 12  Ne fesili atu a Hasaeli: “Kaia e tagi ei toku aliki?” Ne tali atu a ia: “Me e iloa ne au te fakamaseiga ka fai ne koe ki tino Isalaelu.+ Ka ‵sunu ne koe olotou fakai ma‵losi, ka tamate ne koe olotou tāgata ‵lei ki te pelu, kae tuki pala ne koe olotou tama‵liki, kae ko olotou fāfine fai‵tama ka saesae ne koe olotou tinae.”+ 13  Muna a Hasaeli: “E mafai pefea ne tau tavini, telā se kuli fua, o fai ne ia a te mea tenā?” Kae ne fai atu a Elisaia: “Ko oti ne fakaasi mai ne Ieova me ka fai koe mo tupu o Sulia.”+ 14  Tenā ne tiaki ei ne ia a Elisaia kae foki atu ki tena aliki, telā ne fai atu ki a ia: “Ne a pati a Elisaia ki a koe?” Ne tali atu a ia: “Ne fai mai a ia me i a koe ka ‵lei eiloa.”+ 15  Kae i te suā aso, ne puke ne Hasaeli se sulukafu, ufi ki vai kae ‵tao atu ki ana mata ke saitia tena mānava, mate ei a ia.+ Kae ne fai a Hasaeli mo tupu e sui ei a ia.+ 16  I te lima o tausaga o te pulega a Iolama+ te tama tagata a Aapo te tupu o Isalaelu, kae ko Iosefatu ko te tupu o Iuta, ne fai a Iolama+ te tama tagata a te tupu o Iuta ko Iosefatu mo fai te tupu. 17  Ko 32 ana tausaga i te taimi ne fai ei a ia mo tupu, kae ne pule atu a ia ki Ielusalema i tausaga e valu. 18  Ne sasale a ia i auala o tupu o Isalaelu,+ e pelā eiloa mo mea ne fai ne tino i te kāiga o Aapo,+ me ne fai a te tama fafine a Aapo mo fai tena avaga;+ kae ne fai faeloa ne ia a mea ma‵sei i te kilokiloga a Ieova.+ 19  Kae ko Ieova ne seki manako o fakaseai a te malo o Iuta ona ko tena tavini ko Tavita,+ me ne tauto a ia ki tou tagata me ka isi faeloa se tino e pule mai tena gafa.*+ 20  I aso koi pule ei a ia ne ‵teke atu te kau Etoma ki Iuta+ kae fakatu aka ne latou te lotou tupu.+ 21  Ne fanatu a Iolama ki te suā feitu ki Saela mo ana kaliota katoa, kae ne tu aka a ia i te po kae fakatakavale ne ia a tino Etoma kolā ne nikoi i a ia penā foki loa mo takitaki o kaliota; kae ne ‵tele a te kautau ki olotou faleie. 22  Kae ne tumau eiloa a Etoma i te ‵teke atu ki Iuta ke oko mai ki te aso nei. Ne ‵teke atu foki a Lipina+ i te taimi tenā. 23  Kae ko te tala fakasolopito kātoa o Iolama, ana mea katoa ne fai, e a, e se tusi i te tusi o tala fakasolopito i taimi o tupu o Iuta? 24  Tenā ne takato ifo ei a Iolama o malō‵lo fakatasi mo ana tupuga kae ne tanu fakatasi mo ana tupuga i te Fakai o Tavita.+ Kae ko tena tama tagata ko Aasaia+ ne fai mo tupu e sui ei a ia. 25  I te 12 tausaga o te pulega a Iolama te tama tagata a Aapo te tupu o Isalaelu, ne fai a Aasaia te tama tagata a te tupu o Iuta ko Iolama mo fai te tupu.+ 26  Ko 22 a tausaga o Aasaia i te taimi ne fai ei a ia mo tupu, kae ne pule a ia i se tausaga e tasi i Ielusalema. A te igoa o tena mātua ko Atalia+ te mokopuna fafine* a te tupu o Isalaelu ko Omeli.+ 27  Ne sasale a ia i auala o te kāiga o Aapo+ kae fai faeloa ne ia a mea ma‵sei i te kilokiloga a Ieova, e pelā mo te kāiga o Aapo, me i tena tamana ne avaga ki te kāiga o Aapo.+ 28  Tenā ne olo ei a ia mo Iolama te tama tagata a Aapo o taua atu ki te tupu o Sulia ko Hasaeli i Lamota-kileata,+ kae ne fakapakia ne tino Sulia a Iolama.+ 29  Ne foki a te Tupu ko Iolama ki Ieseleelu+ o fai ke ‵lei tena pakiaga mai tino Sulia i Lama i te taimi ne taua ei a ia ki te tupu o Sulia ko Hasaeli.+ Aasaia te tama tagata a Iolama te tupu o Iuta ne fanaifo ki Ieseleelu o āsi ki a Iolama te tama tagata a Aapo, me i a ia e pakia.*

Fakamatalaga mai lalo

Epelu, “tuku atu ki ei se moli.”
Epelu, “tama fafine.”
Io me “i a ia e masaki.”