Te Lua Tupu 7:1-20

  • Ko ‵valo ne Elisaia te gataga o te oge (1, 2)

  • Meakai ne maua i te koga ‵nofo o tino Sulia (3-15)

  • Ko taunu te valoaga a Elisaia (16-20)

7  Ne fai atu a Elisaia, “Fakalogo mai ki pati a Ieova. Konei a pati a Ieova ne fai mai: ‘I te taimi penei i te aso ma taeao i te mataloa* o Samalia, a te sea* o falaoa ‵mata kae ‵lei ka ‵togi ki se sekela,* kae ko sea e lua o kalite ka ‵togi ki se sekela.’”+  I konā eiloa ne fai atu a te ofisa o kautau, telā e fakalagolago ki ei te tupu, ki te tagata o te Atua tonu: “Kafai e fai ne Ieova ke ‵tala mai a ‵pui o vai o te lagi, e mata, e mafai o tupu te mea tenei?”+ Kae ne fai atu a ia: “Ka lavea eiloa ne koe ki ou mata,+ kae ko koe ka se kai mai i ei.”+  E isi ne lepela e tokofa e ‵nofo i te mataloa o te fakai,+ kae ne fai atu te suā tino ki te suā tino: “Kaia e saga‵saga ei tatou i konei ke ‵mate tatou?  Kafai e fai aka tatou, ‘‵Tou olo ki loto i te fakai’ kae koi poko te oge i te fakai,+ ko tatou eiloa ko ‵mate i ei. Kae kafai e saga‵saga tatou i konei, ka ‵mate eiloa tatou. Tela la, a tatou ka olo ki te koga e ‵nofo ei te kautau a Sulia. Kafai e faka‵sao ne latou ‵tou ola, ko ola ei tatou, kae kafai e tamate ne latou a tatou, ko tatou eiloa ko ‵mate.”  Tenā ne ‵tu aka ei latou i te afiafi po kae ulu atu ki te koga e ‵nofo ei te kautau a Sulia. I te lotou okoatuga ki tafa o te koga ‵nofo o te kautau a Sulia, e seai ne tino i ei.  Me ne fai ne Ieova a te kautau a Sulia ke lagona ne latou a te ‵tagi o kaliota tau mo solofanua, te ‵tagi o se kautau lasi ‵ki.+ Tenā ne fai atu te suā tino ki te suā tino: “Kiloke! Ko oti ne ‵togi ne te tupu o Isalaelu a tupu o tino Heti mo tupu o Aikupito ke taua mai ki a tatou!”  Ne ‵tu fakavave aka latou ki luga kae ‵tele i te pouliga o te afiafi po, kae tiaki fua olotou faleie, solofanua, asini mo te koga ‵nofo o latou, kae ‵tele valevale ke ola latou.  I te okoatuga o lepela konei ki tafa o te koga ‵nofo o te kautau, ne ulu atu latou ki se faleie e tasi kae kamata o ‵kai kae inu. Ne puke ne latou mai i konā a siliva, aulo mo gatu kae ave o ‵funa. Ne toe ‵foki atu latou kae ulu ki loto i te suā faleie kae puke mai foki ne latou ne mea mai i konā kae ave o ‵funa.  Oti aka, ne fai atu te suā tino ki te suā tino: “A te mea e fai ne tatou e se ‵lei. A te aso nei se aso o te tala ‵lei! Kafai tatou e fakatalave kae faka‵tali ki te vaveao, e ‵tau eiloa o fakasala tatou. Ke na olo nei tatou o fakailoa atu te mea tenei ki te fale o te tupu.” 10  Ne olo atu latou kae ka‵laga atu ki tino tausi mataloa o te fakai kae fakailoa atu ki a latou penei: “A matou ne olo ki te koga e ‵nofo ei te kautau a Sulia, kae seai se tino i ei—e seai se tino ne lagona ne matou i kona. Ne solofanua fua mo asini e ‵sai kae ko faleie e tuku tiaki fua penā.” 11  I konā ne ka‵laga atu ei a tino tausi mataloa kae ne fakailoa atu te mea tenā ki loto i te fale o te tupu. 12  Ne tu fakavave aka te tupu i te po kae fai atu ki ana tavini: “Fakamolemole, talia mai ke fai atu ne au a mea e mafau‵fau a tino Sulia o fai ki a tatou. E iloa ne latou i a tatou e fia‵kai,+ tenā ne tiaki ei ne latou te lotou koga ‵nofo o muni i te vao, olotou muna, ‘Ka o‵mai latou ki tua mo te fakai, kae ka ‵poa ne tatou a latou kae ulu atu ki loto i te lotou fakai.’”+ 13  Tenā ne fai atu ei se tokotasi o ana tavini: “Fakamolemole talia mai ke puke ne nisi tāgata ne solofanua e lima mai solofanua kolā ne ‵toe i te fakai. Kiloke! Ka ‵pau eiloa te lotou ikuga mo tino Isalaelu katoa kolā ne ‵toe i konei. Kiloke! Ka ‵pau eiloa te lotou ikuga mo tino Isalaelu katoa kolā ne fakaseai atu. Ke na uga atu nei ne tatou a latou ke onoono latou ki ei.” 14  Ne puke ne latou se avā kaliota mo solofanua, kae uga atu ne te tupu a latou ke olo ki te koga ‵nofo o te kautau a Sulia, ana muna: “Olo o onoono.” 15  Ne tau‵tali latou i te kau Sulia ke oko atu eiloa ki te Iolitana, kae ko te auala kātoa ne ‵fonu eiloa i gatu mo meāfale a tino Sulia kolā ne ‵pei kea‵tea ne latou i te lotou ‵telega mo te ma‵taku. Ne ‵foki mai a avefekau kae fakailoa atu a te mea tenā ki te tupu. 16  Tenā ne olo ei a tino o puke a mea i te koga ‵nofo o te kautau a Sulia, telā a te sea o falaoa ‵mata kae ‵lei e tasi ko ‵togi ki se sekela, kae ko sea e lua o kalite ko ‵togi ki se sekela, e ‵tusa eiloa mo pati a Ieova.+ 17  A te tupu ko oti ne fakasopo ne ia te ofisa o kautau telā e fakalagolago a ia ki ei ke tausi i te mataloa, kae ne lakalaka a ia ne tino kae ne mate a ia i te mataloa, e pelā eiloa mo pati ne fai atu ne te tagata o te Atua tonu ki te tupu i te taimi ne vau ei ki a ia. 18  Ne tupu a te mea tenā e ‵tusa eiloa mo pati a te tagata o te Atua tonu ne fai ki te tupu: “E lua sea o kalite ka ‵togi ki se sekela, kae ko te sea o falaoa ‵mata kae ‵lei e tasi ka ‵togi ki se sekela i te taimi penei i te aso ma taeao i te mataloa o Samalia.”+ 19  Kae ne fai atu te ofisa o kautau ki te tagata o te Atua tonu: “Kafai e fai ne Ieova ke ‵tala mai a ‵pui o vai o te lagi, e mata, e mafai o tupu te mea tenā?” Kae ne tali atu a Elisaia: “Ka lavea eiloa ne koe ki ou mata, kae ko koe ka se kai mai i ei.” 20  Tenā eiloa te mea ne tupu ki a ia, me ne lakalaka a ia ne tino kae ne mate a ia i te mataloa.

Fakamatalaga mai lalo

Io me “maketi.”
A te sea e ‵pau mo te 7.33 L. Onoono ki te MF E14.
A te sekela e ‵pau mo te 11.4 kalame. Onoono ki te MF E14.