Te Lua Tupu 6:1-33

  • Ko fai ne Elisaia te mata o te takū ke laga aka (1-7)

  • Elisaia mo tino Sulia (8-23)

    • Ko ‵pula a mata o te tavini a Elisaia (16, 17)

    • Ko ‵kivi a tino Sulia i te feitu faka-te-mafaufau (18, 19)

  • Te oge i loto i Samalia telā ko nikoigina (24-33)

6  Ne fai atu a tama tāgata a pelofeta+ ki a Elisaia: “Kiloke! A te koga telā e ‵nofo fakatasi ei matou mo koe ko tō foliki ki a tatou.  Fakamolemole tuku mai matou ke olo atu ki te Iolitana. Ke puke ne matou taki tokotasi se lakau mai konā mo faite se koga i ei mo ‵nofo matou.” Ana muna: “Olo.”  Ne fai atu se tokotasi i a latou: “Fakamolemole, e mafai koe o vau ke olo fakatasi mo au tavini?” Ne fai atu a ia: “Au e fanatu.”  Tenā ne fano ei a ia i a latou, kae ne oko atu latou ki te Iolitana kae kamata o ‵kati ki lalo a lakau.  I te taimi ne ‵kati ei ne se tokotasi i a latou a te lakau, ne tō a te mata o te takū ki loto i te vai, kae ne kalaga aka a ia: “Oi aue, e toku matai, a te mea tenā ne fanoi mai ne au!”  Ne fai atu te tagata o te Atua tonu: “Ne tō i fea?” Tenā ne fakaasi atu ei ne ia te koga. Ne ‵kati ne ia se potu lakau kae ‵pei ne ia ki te koga tenā kae fai ne ia ke laga aka te mata o te takū.  Ana muna: “Puke aka te mata o te takū.” Ne ‵kapa atu tena lima kae puke aka ne ia.  I konā loa, ne fanatu te tupu o Sulia o taua atu ki Isalaelu.+ Ne fesokotaki a ia ki ana tavini kae fai atu: “Au ka ‵nofo fakatasi mo koutou i ko.”  Tenā ne uga atu ei ne te tagata o te Atua tonu+ a tena fekau ki te tupu o Isalaelu, ana muna: “Fakaeteete ma o‵mai koutou i te koga tenei, me tenā te koga ka o‵mai ki ei a tino Sulia.” 10  Ne avatu te fekau a te tupu o Isalaelu ki te koga telā ne fai atu te tagata o te Atua tonu ke fakaeteete a ia i ei. Ne avatu faeloa ana fakailoaga ki a ia, kae i nisi taimi ne seki fanatu eiloa tou tagata ki te koga tenā.+ 11  Ne fai ne te mea tenei ke kaitaua te tupu o Sulia, tenā ne ‵kami mai ei ne ia ana tavini kae fai atu ki a latou: “Fai mai! Ko oi te tino i a tatou e kau i te tupu o Isalaelu?” 12  Tenā ne fai atu ei sena tavini e tokotasi: “E seai, e toku aliki te tupu! Ko Elisaia te pelofeta i Isalaelu e fakailoa ne ia ki te tupu o Isalaelu a mea e faipati ne koe i loto i tou potu moe.”+ 13  Ne fai atu a ia: “Fano o ‵sala te koga e nofo a ia i ei, ke uga atu ne au ne tāgata o puke fakapagota mai a ia.” Fakamuli ifo, ne fakailoa atu ki tou tagata: “A ia telā i Totana.”+ 14  Ne uga fakavave atu ne ia a solofanua mo kaliota tau ki konā, fakatasi mo se kautau lasi; ne olo atu latou i te po kae nikoi te fakai. 15  I te taimi ne tu aka ei te tavini a te tagata o te Atua tonu i te tafataeao ‵malu kae fano ki tua, ne lavea ne ia se kautau mo solofanua mo kaliota tau e nikoi te fakai. I konā eiloa ne fai atu te tavini ki tou tagata: “Oi aue, e toku matai! Ne a ‵tou mea ka fai?” 16  Ne fai atu a ia: “Sa mataku!+ Me tokouke atu a ‵tou kau i lō te lotou kau.”+ 17  Tenā ne kamata ei a Elisaia o ‵talo kae fai atu: “E Ieova, fakamolemole faka‵pula aka ana mata ko te mea ke lavea ne ia.”+ Ne faka‵pula fakavave aka ne Ieova a mata o te tavini ko te mea ke lavea ne ia, kae kiloke! ne ‵fonu eiloa te koga maugā i solofanua mo kaliota afi+ e fakatamilo i a Elisaia.+ 18  I te oloifoga o tino Sulia ki a ia, ne ‵talo atu a Elisaia ki a Ieova kae fai atu: “Fakamolemole, faka‵kivi aka a mata o te fenua tenei.”+ Tenā ne faka‵kivi ei ne ia latou, e pelā eiloa mo te fakamolemole a Elisaia. 19  Ne fai atu a Elisaia ki a latou: “E se tenei te auala, kae e se tenei foki te fakai. Tau‵tali mai i a au, kae ka ‵taki atu ne au koutou ki te tagata e ‵sala koutou ki ei.” Kae ne ‵taki atu ne ia latou ki Samalia.+ 20  I te lotou okoatuga ki Samalia, ne fai atu a Elisaia: “Ieova, faka‵pula aka olotou mata ke lavea ne latou.” Ne faka‵pula ne Ieova olotou mata, kae lavea aka ne latou i a latou e ‵nofo i te kogaloto o Samalia. 21  I te laveaga ne te tupu o Isalaelu a latou, ne fai atu a ia ki a Elisaia: “E a, e ‵tau o ‵ta ne au latou, e ‵tau o ‵ta ne au a latou, e toku tamana?” 22  Kae ne fai atu a ia: “E se ‵tau o ‵ta ne koe latou. E a, e ‵ta ne koe a latou kolā ne puke fakapagota ne koe ki tau pelu mo tau kausana? Tuku atu a meakai mo vai ki a latou ko te mea ke ‵kai kae inu latou,+ ko ‵foki ei ki te lotou aliki.” 23  Ne fai ne ia se ‵kaiga lasi mō latou, kae ne ‵kai kae inu latou, oti aka uga atu ei ne ia latou ke ‵foki ki te lotou aliki. Kae ne seki toe ai eiloa se potukau o tino kai‵soa mai Sulia+ ne toe o‵mai ki te fenua o Isalaelu. 24  Fakamuli ifo, ne fakamaopoopo ne Peniata te tupu o Sulia a tena kautau kātoa kae olo aka o nikoi a Samalia.+ 25  Ne poko se oge lasi+ i Samalia, kae ne nikoi eiloa ne latou a te fakai ke oko ki te taimi ko ‵togi ei a te ulu o te asini+ ki te 80 tupe siliva, kae e 5 tupe siliva ke ‵togi ki ei a te tasi-vae-fa o te fuāga o te kapu* telā e ‵fonu i fekau o lupe. 26  I te taimi ne sasale mai ei te tupu o Isalaelu i luga i te ‵pui, ne kalaga atu se fafine ki a ia: “Fesoasoani mai ki a matou, e toku aliki te tupu!” 27  Kae ne fai atu tou tagata: “Kafai a Ieova e se fesoasoani atu ki a koe, tefea te koga e mafai ei ne au o maua se fesoasoani mō koe? Mai te koga tuki saito? Io me mai te mea ‵tau uaina mo te mea ‵tau sinu?” 28  Ne fesili atu te tupu ki tou fafine: “Se a te fakalavelave ki a koe?” Ne tali atu tou fafine: “A te fafine tenei ne fai mai ki a au, ‘Tuku mai tau tama tagata ke kai ne tāua i te aso nei, kae taeao ko kai ne tāua taku tama tagata.’+ 29  Tenā ne tunu ei ne māua taku tama tagata kae kai ne māua.+ I te suā aso ne fai atu au ki ei, ‘Tuku mai tau tama tagata ke kai ne tāua.’ Kae ne ‵funa aka ne ia tena tama tagata.” 30  I te logoga a te tupu i pati a te fafine, ne saesae ne ia ana gatu.+ I te taimi ne sasale mai ei a ia i luga i te ‵pui, ne lavea a ia ne tino e pei ki gatu lautaga mai loto i ana gatu. 31  Tenā ne fai atu ei a ia: “Ke fakasala eiloa au ne te Atua kae fakaopoopo atu ki ei māfai e se tō kea‵tea a te ulu o Elisaia te tama tagata a Safata i te aso nei!”+ 32  A Elisaia ne sagasaga i loto i tena fale, kae ko toeaina ne saga‵saga fakatasi mo ia. Ne uga atu ne te tupu se tagata i ana mua, kae koi tuai o oko atu te avefekau ne fai atu a Elisaia ki toeaina: “E lavea ne koutou te auala ne uga mai ei te tama tagata a te tino tatino+ tenei ke ‵kati toku ua? Onoono faka‵lei, kafai ko vau te avefekau, ‵pono te mataloa, kae taofi loa ke ‵mau te mataloa mai i a ia. E a, e se ko vae o tena matai konā e lagona atu mai i ana tua?” 33  Kae koi faipati a ia ki a latou, ne vau te avefekau ki a ia, kae ne fai atu te tupu: “A te fakalavelave tenei e maua mai i a Ieova. Kaia e ‵tau ei o toe faka‵tali au ki a Ieova?”

Fakamatalaga mai lalo

A te kapu e ‵pau mo te 1.22 L. Onoono ki te MF E14.