Te Lua Tupu 5:1-27

  • Ko faka‵lei ne Elisaia te lepela o Namanu (1-19)

  • Te tagata kaimanako ko Keasi ko lepela (20-27)

5  A Naamanu te takitaki kautau a te tupu o Sulia se tagata lauiloa telā e fakaaloalo malosi ki ei te tupu,* me ne tuku atu ne Ieova te manumalo* ki Sulia e auala i a ia. A ia se toa mafi, kae ko ia foki se lepela.*  I te taimi e tasi ne taua atu ei latou, ne puke fakapagota ne tino Sulia mai i Isalaelu se tamaliki fafine telā ne fai mo fai te tavini a te avaga a Naamanu.  Ne fai atu tou fafine ki tena matai fafine: “Aku muna loa ke fano toku aliki o āsi ki te pelofeta+ i Samalia! Ko faka‵lei aka ei ne ia tena lepela.”+  Tenā ne fano ei tou tagata* o fakailoa atu ki tena aliki a te mea ne fai atu ne te tamaliki fafine mai Isalaelu.  Tenā ne fai atu ei te tupu o Sulia: “Fano! Kae ka tusi ne au se tusi ki te tupu o Isalaelu.” Ne fano tou tagata kae puke ne ia a taleni* siliva e sefulu, e 6,000 aulo, kae sefulu a gatu.  Ne avatu ne ia ki te tupu o Isalaelu a te tusi telā e faitau penei: “Fakatasi mo te tusi tenei ki a koe, ko uga atu ne au taku tavini ko Naamanu ke faka‵lei aka ne koe tena lepela.”  I te taimi eiloa ne faitau ei te tupu o Isalaelu ki te tusi, ne saesae ne ia ana gatu kae fai aka: “E a, au nei ko te Atua ke tamate kae fakaola a tino?+ E uga mai ne ia te tagata tenei ki a au, kae fai mai ke faka‵lei aka tena lepela! E lavea ne koutou me e manako a ia o kinau mai ki a au.”  Kae i te taimi ne logo ei a Elisaia, te tagata o te Atua tonu, me ne saesae ne te tupu o Isalaelu ana gatu, ne avatu fakavave tena fekau ki te tupu: “Kaia ne saesae ei ne koe ou gatu? Fakamolemole, tuku mai a ia ke vau ki a au ko te mea ke iloa ne ia me e isi se pelofeta i Isalaelu.”+  Ne olo atu a Naamanu mo ana solofanua mo ana kaliota tau kae ‵tu i te mataloa o te fale o Elisaia. 10  Kae ne uga atu ne Elisaia se avefekau ke fai atu ki a ia: “Fano o uku fakafitu taimi+ i te Iolitana,+ kae ka ‵lei tou pa‵kili, kae ka ‵ma koe.” 11  Ne kaitaua a Naamanu i te mea tenei kae kamata o fano, ana muna: “Ne fai ifo au ki a au eiloa, ‘Ka vau a ia ki tua i a au o tu i konei kae kalaga ki te igoa o Ieova tena Atua, kae fakagasuesue tena lima ki mua mo tua i luga i te lepela o faka‵lei aka ne ia.’ 12  E a, e se ‵lei atu a te Aipana mo te Falapa, ko vaitafe o Tamaseko+ i lō vai katoa o Isalaelu? E a, e se mafai au o uku i vai konā ko ‵ma ei au?” I konā ne ‵fuli ei a ia o fano mo te kaitaua. 13  Ne olo atu ana tavini ki a ia kae fai atu: “Toku tamana, moi ne fai atu te pelofeta ke fai ne koe se mea fakaofoofogia, e a, ka se fai ne koe? Kae pefea la te ‵lei atu me ne fai atu fua a ia ki a koe, ‘Uku kae ka ‵ma koe’?” 14  I konā ne fano ei a ia o uku* fakafitu taimi i te Iolitana, e ‵tusa mo pati a te tagata o te Atua tonu.+ Tenā ne ‵lei ei tena pa‵kili e pelā eiloa mo te pa‵kili o se tamā tamaliki tagata,+ kae ne ‵ma ei a ia.+ 15  Fakamuli ifo, ne toe foki a ia ki te tagata o te Atua tonu,+ ko ia mo tena kau malaga katoa, kae ne tu a ia i ana mua kae fai atu: “Ko iloa nei ne au me e seai se isi Atua aka i te lalolagi kātoa kae maua fua te Atua tonu i Isalaelu.+ Fakamolemole, ke talia aka ne koe te meaalofa* tenei mai tau tavini.” 16  Kae ne fai atu a Elisaia: “E pelā eiloa mo Ieova telā e tavini au ki ei e ola, ka se talia ne au te meaalofa tenā.”+ Ne finau atu a ia ke talia te meaalofa, kae ne ita faeloa a ia. 17  Fakamuli loa, ne fai atu a Naamanu: “Kafai e se talia ne koe, fakamolemole, talia mai ke fakauta ne au, tau tavini, a miula e lua ki one mai te laukele tenei, me ka se toe ofo atu ne tau tavini se taulaga ‵sunu ki se isi atua i tafa o Ieova. 18  Kae ke fakamagalo eiloa ne Ieova au, ko tau tavini, i te mea e tasi tenei: Kafai e fanatu toku aliki ki loto i te fale* o Limoni o ifo i ei, e fakapale a ia ki toku lima tela la ko ifo foki au i te fale o Limoni. Kafai e ifo au i te fale o Limoni, fakamolemole ke fakamagalo ne Ieova au, tau tavini, ona ko te mea tenei.” 19  Tenā ne fai atu ei a ia: “Fano mo te filemu.” I te tiakinaga ne ia tou tagata kae ko tai ‵mao eiloa, 20  ne fai ifo a Keasi+ te tavini a te tagata o te Atua tonu+ ki a ia eiloa: ‘A toku matai ko tuku ne ia a Naamanu te tino Sulia+ ke fano kae e se talia ne ia a mea ne aumai ne tou tagata. E pelā eiloa mo Ieova e ola, ka tele atu au i ana tua o puke se mea mai i a ia.’ 21  Tenā ne afuli ei ne Keasi a Naamanu. I te taimi ne lavea ei ne Naamanu te tino e tele mai ana tua, ne tu ifo a ia mai tena kaliota o fakafetaui ki ei kae fai atu: “E ‵lei a mea katoa?” 22  Kae ne fai atu a ia: “E ‵lei a mea katoa. Au ne uga mai ne toku matai, ana muna, ‘Kiloke! E isi ne tamataene mai te koga maugā o Efalaima mai tama tāgata a pelofeta ne āsi mai ki a au. Fakamolemole, tuku aka ki a lāua se taleni siliva mo gatu e lua.’”+ 23  Ne fai atu a Naamanu: “Fano o puke a taleni e lua.” Ne finau atu eiloa a ia ki tou tagata,+ tenā ne tuku ei ne tou tagata a taleni siliva e lua ki loto i taga e lua fakatasi mo gatu e lua, kae tuku atu ne ia ki ana tavini e tokolua, kolā ne sau ne lāua i ana mua. 24  I tena okoatuga ki Ofele,* ne puke ne ia a mea konā mai i lā lima kae tuku ki loto i te fale kae uga atu a tāgata konā ke olo kea‵tea. I te lā oloatuga, 25  ne fanatu a ia ki loto o tu i tafa o tena matai. Ne fai atu a Elisaia ki a ia: “Keasi, a koe ne vau mai fea?” Kae ne fai atu a ia: “A tau tavini e seki fano ki se koga.”+ 26  Ne fai atu a Elisaia ki a ia: “E mafaufau koe me e se iloa ne au i a koe ne fano i tua o te tagata tenā, kae ne tu ifo a ia mai tena kaliota o fakafetaui ki a koe? E mata, tenei te taimi ke talia ei a siliva io me ke talia ei a gatu io me ko togaolive io me ko togavine io me ko mamoe io me ko pulumakau io me ko tavini tāgata io me ko tavini fāfine?+ 27  I te taimi nei ka nofo i luga i a koe e pelā foki mo tino i tou gafa a te lepela o Naamanu+ ki te se-gata-mai.” Ne fano fakavave tou tagata kea‵tea mai i ei kae ko maua ne te lepela, ko ‵kena eiloa e pelā me se kiona.+

Fakamatalaga mai lalo

Io me “tena aliki.”
Io me “fakaolataga.”
Io me “poko i se masaki o te pa‵kili.”
Kāti e fakasino atu ki a Naamanu.
A te taleni e ‵pau mo te 34.2 kk. Onoono ki te MF E14.
Io me “ufi a ia ki loto.”
Epelu, “fakamanuiaga.”
Io me “faletapu.”
Se koga i Samalia, kāti se tamā mauga io me se ‵pui malosi.