Te Lua Tupu 4:1-44

  • Ko fai ne Elisaia ke uke a sinu a se fafine ko mate tena avaga (1-7)

  • Te uiga talimalo o se fafine Sunema (8-16)

  • Ko maua ne se fafine se tamaliki tagata; ko mate te tamaliki tagata (17-31)

  • Ko fakatu aka ne Elisaia te tamaliki tagata telā ne mate (32-37)

  • Ko fai ne Elisaia te sitiu ke ‵lei i te kai (38-41)

  • Ko fai ne Elisaia ke uke a falaoa (42-44)

4  Ne tagi mai se avaga a te tama tagata e tokotasi a te kau pelofeta+ ki a Elisaia, ana muna: “A tau tavini ko taku avaga ko mate, kae e iloa ‵lei ne koe i tau tavini ne mataku faeloa ki a Ieova.+ Kae nei la, a te tino ne kaitalafu a ia i ei ko vau o puke aku tama‵liki e tokolua ke fai mo ana pologa.”  I konā eiloa ne fai atu a Elisaia ki tou fafine: “Se a taku mea e mafai o fai ki a koe? Fai mai, ne a au mea i te fale?” Ne tali atu tou fafine: “E seai eiloa se mea a tau tavini i te fale kae se tiā sinu fua.”+  Tenā ne fai atu ei a ia: “Fano ki tua o ‵sala mai ne tiā mai ou tuakoi, ne tiā ‵masa. Puke mai ke uke au tiā.  Ko fano ei koe ki loto kae ‵pono te mataloa mai tua o koe mo au tama tāgata. Faka‵fonu a tiā katoa konei, kae fakatafa kea‵tea a tiā kolā ko ‵fonu.”  Tenā ne fano ei tou fafine. I te okoga o tou fafine mo ana tama tāgata ki te fale, ne ‵pono ne ia te mataloa mai ana tua mo ana tama tāgata, kae ne avatu ne lāua a tiā ki tou fafine, kae ‵ligi faeloa ne ia a sinu ki loto i ei.+  I te taimi ne ‵fonu ei a tiā konā, ne fai atu tou fafine ki tena tama tagata e tokotasi: “Aumai te suā tiā ki a au.”+ Kae ne fai atu tou tagata ki ei: “Ko seai ne tiā.” I konā eiloa ko te sinu eiloa ko se ‵sali.+  Ne vau tou fafine ki loto kae fai atu ne ia te mea tenā ki te tagata o te Atua tonu, kae ne fai atu tou tagata: “Fano o fakatau atu a sinu konā mo ‵togi au kaitalafu, ko ola ei koe mo au tama tāgata mai i mea kolā e ‵toe.”  I te aso e tasi ne fano ei a Elisaia ki Sunema,+ kae isi se fafine lauiloa e nofo i ei, kae ne finau atu tou fafine ke kai a ia i konā.+ I taimi katoa e vau ei tou tagata ki konā, e mānava faeloa a ia i konā o kai.  Ne fai atu tou fafine ki tena avaga: “E iloa ne au i te tagata tenei e vau sāle penei se tagata ‵malu o te Atua. 10  Fakamolemole, ke faite ne tāua se tamā potu i te tuafale+ kae tuku i ei se moega, se taipola, se nofoga mo se tugamoli mō ia. So se taimi e vau a ia ki a tāua e mafai o nofo a ia i konā.”+ 11  I te aso e tasi ne vau tou tagata ki konā, kae ne fanaka a ia ki te potu i te tuafale o takato i ei. 12  Ne fai atu a ia ki a Keasi+ tena tavini: “Kalaga atu ki te fafine Sunema.”+ Tenā ne kalaga atu tou tagata ki ei, kae ne vau tou fafine o tu i ana mua. 13  Tenā ne fai atu ei tou tagata ki a Keasi: “Fakamolemole fai ki ei, ‘Ko oko loa te uke o mea konei ne fai ne koe mō māua.+ Se a te mea e mafai o fai ne au mō koe?+ E mata, e ‵tau o faipati au mō koe ki te tupu+ io me ki te takitaki o te kautau?’” Kae ne tali atu tou fafine: “Au e ‵nofo fakatasi eiloa mo oku tino.” 14  Ne fai atu tou tagata: “Kae se a la te mea e mafai o fai ne au mō ia?” Ne fai atu a Keasi: “A te fafine tenei e seai sena tamaliki tagata,+ kae ko tena avaga ko matua.” 15  Ne fai fakavave atu tou tagata: “Kalaga ki ei.” Tenā ne kalaga atu ei a ia ki tou fafine, kae ne tu mai tou fafine i te mataloa. 16  Tenā ne fai atu ei tou tagata: “I te taimi penei i te suā tausaga ka ‵sai atu koe ki se tamaliki tagata.”+ Kae ne fai atu tou fafine: “Ikai, e toku matai, te tagata o te Atua tonu! Sa fakaloiloi ne koe tau tavini fafine.” 17  Kae ne faitama te fafine kae fanau ne ia se tamaliki tagata i te taimi eiloa tenā i te tausaga mai tua ifo i ei, e pelā eiloa mo mea ne fai atu ne Elisaia ki tou fafine. 18  Ne tupu aka eiloa te tamaliki, kae i te aso e tasi ne fanatu a ia ki tena tamana telā e ‵nofo mo tino ‵kati saito. 19  Kae ne fai faeloa a ia ki tena tamana: “Oi toku ulu, oi toku ulu!” Tenā ne fai atu ei a tena tamana ki tena tavini: “Sau aka a ia ki tena mātua.” 20  Ne sau ne tou tagata te tamaliki ki tena mātua, kae ne sagasaga eiloa i vae o tena mātua ke oko ki te fakatutonu, oti aka ko te mea loa ko mate.+ 21  Tenā ne fanaka ei tou fafine kae fakatakato a tena tama ki luga i te moega o te tagata o te Atua tonu,+ kae ‵pono ne ia te mataloa i ana tua kae fano. 22  Ne kalaga atu a ia ki tena avaga kae fai atu: “Fakamolemole, uga mai se tavini e tokotasi mo se asini e tasi, ke fano fakavave au ki te tagata o te Atua tonu ko foki mai ei au.” 23  Kae ne fai atu tou tagata: “Kaia e fano ei koe ki ei i te aso nei? A te aso nei e se ko te taimi o te masina sae+ io me se sapati.” Kae ne fai atu tou fafine: “E ‵lei fua.” 24  Tenā ne fakatoka ei ne tou fafine te asini kae fai atu ki tena tavini: “Fano fakavave. Sa fakatalave ona ko au seiloga ke fai atu au ke fai penā.” 25  Ne fano tou fafine ki te tagata o te Atua tonu i te Mauga o Kalamelu. I te taimi eiloa ne lavea ‵mao a ia ne te tagata o te Atua tonu, ne fai atu tou tagata ki a Keasi tena tavini: “Kiloke! A te fafine Sunema telā i ko. 26  Fakamolemole, tele o fakafetaui ki a ia kae fesili atu ki ei, ‘A koe e ‵lei? E ‵lei tau avaga? E ‵lei tau tamaliki?’” Kae ne tali atu tou fafine: “E ‵lei a mea katoa.” 27  I tena vauga ki te tagata o te Atua tonu i te mauga, ne puke fakavave atu tou fafine ki vae o tou tagata.+ Kae ne fanatu a Keasi o tule a ia kea‵tea, kae ne fai atu a te tagata o te Atua tonu: “Tuku malie tou fafine, me ko oko eiloa i te loto mafatia, kae ne ‵funa ne Ieova te mea tenei mai i a au kae seki fai mai ne ia ki a au.” 28  Tenā ne fai atu ei tou fafine: “E a, ne fakamolemole atu au ke maua saku tamaliki tagata? E a, e seki fai atu au, ‘Sa fakaloiloi ne koe au’?”+ 29  Ne fai fakavave atu tou tagata ki a Keasi: “‵Sai ou gatu ki tou taugasulu+ kae puke toku tokotoko i tou lima kae fano. Kafai e fetaui koe mo se tino, sa fakatalofa ki ei; kae kafai e fakatalofa mai se tino ki a koe, sa tali ki ei. Fano o tuku toku tokotoko ki luga i mata o te tamaliki tagata.” 30  I konā ne fai atu te mātua o te tamaliki tagata: “E pelā eiloa mo Ieova e ola kae pelā foki mo koe e ola, ka se tiaki ne au a koe.”+ Tenā ne tu aka tou tagata kae olo fakatasi mo tou fafine. 31  Ne fano a Keasi i mua kae tuku te tokotoko ki luga i mata o te tamaliki tagata, kae seai eiloa se mea e lagona io me se tali e maua mai i ei.+ Ne foki a ia o fakafetaui ki a Elisaia kae fai atu: “A te tamaliki tagata e seki ala mai.” 32  I te okoatuga a Elisaia ki loto i te fale, a te tamaliki e takato atu i luga i tena moega ko mate.+ 33  Ne ulu atu a ia ki loto kae ‵pono mai te mataloa i lā tua kae kamata o ‵talo ki a Ieova.+ 34  Tenā ne fanaka a ia ki luga i te moega kae takato ki luga i te tamaliki kae tuku tena gutu ki te gutu o te tamaliki, ana mata ki mata o te tamaliki, mo ana alofilima ki luga i alofilima o te tamaliki kae punou faeloa mai luga i ei, kae ne kamata o mafanafana a te foitino o te tamaliki.+ 35  Ne sasale a ia i loto i te fale, ne toe fanaka ki luga i te moega kae toe punou i luga i ei. Ne mafatua te tamaliki tagata fakafitu taimi, oti aka ko te mea loa ko ‵pula ana mata.+ 36  Ne kalaga atu a Elisaia ki a Keasi kae fai atu: “Kalaga ki te fafine Sunema.” Ne kalaga atu tou tagata ki te fafine, vau ei ki loto i a ia. Tenā ne fai atu ei tou tagata: “Puke tau tamaliki tagata.”+ 37  Kae ne vau tou fafine ki loto kae totuli ki lalo i vae o tou tagata kae ifo ki lalo i te laukele i ana mua, oti aka puke ei ne tou fafine a tena tamaliki tagata kae olo ki tua. 38  I te fokimaiga a Elisaia mai Kilikala ne poko te oge i te fenua.+ A tama tāgata a pelofeta+ e saga‵saga mai i ana mua, kae ne fai atu a ia ki tena tavini:+ “Fakatu te ulo lasi ki luga i te afi kae tunu te supu ma tama tāgata a pelofeta.” 39  Ne fano se tokotasi i a latou ki te vao o tau mai ne laulakau, kae ne maua ne ia se vine vao, tau mai ei ne ia ana fuaga ke ‵fonu tena gatu. Ne foki atu a ia kae katikati ne ia ki loto i te ulo supu kae e se iloa ne ia me ne a mea konā. 40  Fakamuli ifo, ne asu atu ne latou a te supu ki tāgata ke ‵kai, kae i te otiga ne ‵kai ki te supu ne fai aka latou: “Te tagata o te Atua tonu, e isi se mea poisini i loto i te ulo.” Ne seki mafai eiloa latou o ‵kai ki ei. 41  Ne fai atu tou tagata: “Aumai ne falaoa.” I te otiga ne ‵pei ne ia ki loto i te ulo, ne fai atu a ia: “Asu atu ki tino.” Kae ne seki ai se mea fakamataku i loto i te ulo.+ 42  Ne vau se tagata mai Paala-salisa+ kae ne aumai ne ia ki te tagata o te Atua tonu e 20 falaoa kalite+ ne faite mai te taukai muamua kolā ko ‵pala, fakatasi mo se taga o saito ‵fou.+ Tenā ne fai atu ei a Elisaia: “Tuku atu ki tino ke ‵kai ki ei.” 43  Kae ne fai atu tena tavini: “E mafai pefea o tuku atu ne au a mea konei i mua o tāgata e toko 100?”+ Kae ne fai atu tou tagata: “Tuku atu ki tino ke ‵kai ki ei, me konei a pati a Ieova ne fai mai, ‘Ka ‵kai latou kae ka isi ne mea e ‵toe.’”+ 44  Ne tuku atu ne ia a mea konā ki olotou mua, kae ne ‵kai latou kae isi ne mea ne ‵toe,+ e ‵tusa eiloa mo pati a Ieova.

Fakamatalaga mai lalo