Te Lua Tupu 25:1-30

  • Ko nikoi ne Nepukanesa a Ielusalema (1-7)

  • Ko fakaseai a Ielusalema mo tena faletapu; te avega fakapagota i te lua (8-21)

  • Ko fai a Ketalia mo fai te kovana (22-24)

  • Ko tamate a Ketalia; ko ‵tele a tino ki Aikupito (25, 26)

  • Ko fakasaoloto a Ieoiakini i Papelonia (27-30)

25  I te iva tausaga o te pulega a Setekaia, i te sefulu o aso o te sefulu o masina, ne o‵mai a te tupu o Papelonia ko Nepukanesa+ mo tena kautau kātoa o taua atu ki Ielusalema.+ Ne nikoi ne ia te fakai kae faite se pā e fakatamilo i ei,+  kae ne nikoi eiloa te fakai ke oko ki te 11 tausaga o te pulega a te Tupu ko Setekaia.  I te iva o aso i te fa o masina ne poko malosi ei te oge+ i te fakai, kae ko seai eiloa ne meakai a tino o te fenua.+  Ne ofa ki lalo te ‵pui o te fakai,+ kae ne ‵tele atu a sotia katoa i te po i loto i te mataloa telā e tu i te va o ‵pui e lua i tafa o te fatoaga a te tupu, kae ko tino Kaletaia e fakatamilo ne latou te fakai; kae ko te tupu ne fanatu i te auala telā e fano ki te Alapaa.+  Kae ne afuli ne te kautau Kaletaia a te tupu, kae maua atu ne latou a ia i te koga laugatasi o Ieliko, kae ko ana kautau katoa ne ‵tele kea‵tea mai i a ia.  Tenā ne puke ei ne latou te tupu+ kae aumai a ia ki te tupu o Papelonia i Lipila, kae ne fai ne latou tena fakamasinoga.  Ne tamate ne latou a tama tāgata a Setekaia i ana mua eiloa; kae ne fai ne Nepukanesa ke ‵kivi a Setekaia, saisai a ia ki filifili kopa, kae aumai a ia ki Papelonia.+  I te lima o masina, i te fitu o aso o te masina, telā ko te 19 tausaga o te pulega a te tupu o Papelonia ko Nepukanesa, ne vau ki Ielusalema a Nepusalatana+ te pule o leoleo, te tavini a te tupu o Papelonia.+  Ne ‵sunu ne ia te fale o Ieova,+ te fale* o te tupu,+ mo fale katoa i Ielusalema;+ ne ‵sunu foki ne ia a fale o tāgata takutakua taki tokotasi.+ 10  Kae ko ‵pui fakatamilo o Ielusalema ne ofa katoa ki lalo ne te kautau Kaletaia kātoa kolā ne olo tasi mo te pule o leoleo.+ 11  Ne ave fakapagota ne Nepusalatana te pule o leoleo a te ‵toega o tino kolā ne tiaki i te fakai, mo tino kolā ne ‵sola o olo ki te tupu o Papelonia, mo te ‵toega o tino katoa.+ 12  Kae ko te pule o leoleo ne tiaki ne ia a nisi tino mai toe tino ma‵tiva eiloa o te fenua ke ga‵lue i togavine kae ga‵lue ‵mafa i fatoaga.+ 13  Kae ne ofa likiliki ne tino Kaletaia a pou kopa+ o te fale o Ieova mo kā+ mo te Tai kopa+ kolā ne ‵tu i loto i te fale o Ieova, kae ne ave ne latou a kopa ki Papelonia.+ 14  Ne puke foki ne latou a kāpa, sevolo, mea tamate moli, ipu, mo meāfale kopa katoa kolā ne fakaaoga i te taviniga i loto i te faletapu. 15  Ne puke ne te pule o leoleo a mea tuku malala ‵ka mo pōla kolā ne faite ki tinā aulo+ mo siliva.+ 16  E pelā mo pou e lua, te Tai, mo kā kolā ne faite ne Solomona mō te fale o Ieova, ne seki mafai o iloa a te ‵mafa o kopa ne faite ki ei a mea katoa konei.+ 17  A pou takitasi e 18  kupita* te ma‵luga,+ kae ko te ulupou i luga i ei ne faite ki kopa; kae ko te maluga o te ulupou e tolu kupita, kae ko te mea valavala mo pomekalanite katoa kolā e fakatamilo i te ulupou ne faite katoa ki kopa.+ E penā foki a te lua o pou mo tena mea valavala. 18  Ne puke foki ne te pule o leoleo a Selaia+ te faitaulaga pule, Sefanaia+ te faitaulaga i te tokolua, mo tāgata tausi mataloa e tokotolu.+ 19  Kae ne puke mai ne ia mai te fakai se ofisa e tokotasi telā ko te pule o sotia, e tokolima taugasoa ‵pili o te tupu kolā ne maua i te fakai, fakatasi mo te failautusi a te takitaki o te kautau, ko ia telā e fakamaopoopo ne ia a tino o te fenua, mo tāgata e toko 60 mai tino o te fenua kolā ne maua atu i te fakai. 20  Ne puke ne Nepusalatana+ te pule o leoleo a latou kae avatu ki te tupu o Papelonia i Lipila.+ 21  Ne ‵ta latou ne te tupu o Papelonia kae tamate latou i Lipila i te fenua o Hamata.+ Tenā ne ave fakapagota ei a tino Iuta mai te lotou fenua.+ 22  Ne fakasopo ne te tupu o Papelonia ko Nepukanesa a Ketalia+ te tama tagata a Aikamo+ te tama tagata a Safana+ ke pule i tino kolā ne tiaki ne ia i te fenua o Iuta.+ 23  I te ‵logoga a takitaki kautau mo olotou tāgata me ko oti ne fakasopo aka ne te tupu o Papelonia a Ketalia, ne o‵mai fakavave ei latou ki a Ketalia i Mesepa. A latou konā ko Isamaeli te tama tagata a Netania, Ioananu te tama tagata a Kalia, Selaia te tama tagata a Tanumeta te tino Netopa, mo Iasania te tama tagata a te tino Maakata, fakatasi mo olotou tāgata.+ 24  A Ketalia ne tauto ki a latou mo olotou tāgata kae fai atu ki a latou: “Sa ma‵taku o fai koutou mo tavini a tino Kaletaia. ‵Nofo i te fenua kae tavini atu ki te tupu o Papelonia, kae ka manuia koutou.”+ 25  Kae i te fitu o masina, ne vau a Isamaeli+ te tama tagata a Netania te tama tagata a Elisama, telā se tino mai te gafa o te tupu, fakatasi mo nisi tāgata e tokosefulu, kae ‵ta ne latou a Ketalia, mate atu ei, fakatasi mo tino Iutaia mo tino Kaletaia kolā ne ‵nofo fakatasi mo ia i Mesepa.+ 26  Fakamuli ifo, ne ‵tu aka a tino katoa, mai te tamaliki foliki ke oko ki te tino matua, e aofia i ei a takitaki o kautau kae olo ki Aikupito,+ me i a latou e ma‵taku i tino Kaletaia.+ 27  Kae i te 37 tausaga o te ave fakapagotaga o te tupu o Iuta ko Ieoiakini,+ i te 12 o masina, i te 27 o aso o te masina, ne fakasaoloto ei ne te tupu o Papelonia ko Evile-malota, i te tausaga ne fai ei a ia mo tupu, a te tupu o Iuta ko Ieoiakini mai te falepuipui.+ 28  Ne faipati faka‵lei a ia ki tou tagata kae fakamaluga aka ne ia tena nofogaaliki ke maluga atu i nofogaaliki o nisi tupu kolā ne ‵nofo mo ia i Papelonia. 29  Ne tapale ne Ieoiakini ana gatu pagota, kae ne kai faeloa a ia i mua o te tupu i aso katoa o tena olaga. 30  Ne avatu faeloa ki a ia a tena vaega o meakai mai te tupu, i aso takitasi katoa o tena olaga.

Fakamatalaga mai lalo

Io me “palesi.”
A te kupita e ‵pau mo te 44.5 sm (17.5 ini.). Onoono ki te MF MF E14.