Te Lua Tupu 24:1-20

  • Te ‵tekeatuga a Ieoiakimo mo tena mate (1-7)

  • Ieoiakini, te tupu o Iuta (8, 9)

  • Te avega fakapagota muamua ki Papelonia (10-17)

  • Setekaia, te tupu o Iuta; tena ‵tekeatuga (18-20)

24  I aso o Ieoiakimo ne vau te tupu o Papelonia ko Nepukanesa+ o taua ki a ia, kae ne fai a Ieoiakimo mo fai tena tavini i tausaga e tolu. Kae ui i ei, ne mafuli atu a ia o ‵teke ki tou tagata.  Tenā ne kamata ei o uga ne Ieova a potukau o tino kai‵soa mai Kaletaia,+ Sulia, Moapi mo Amoni ke taua atu ki a ia. Ne uga atu faeloa ne ia latou ke fakaseai a Iuta, e ‵tusa eiloa mo pati a Ieova+ ne fai e auala i ana tavini ko pelofeta.  E tonu, ne tupu te mea tenei ki Iuta e ‵tusa mo te fakatonuga a Ieova, ke ave kea‵tea latou mai ana mua+ ona ko agasala katoa ne fai ne Manase,+  mo te fakamaligiga foki ne ia a toto o tino e seai ne olotou mea ‵se ne fai,+ me ko oti ne faka‵fonu ne ia a Ielusalema ki toto o tino e seai ne olotou mea ‵se ne fai kae ko Ieova e se manako o fakamagalo latou.+  Kae ko te tala fakasolopito kātoa o Ieoiakimo, ana mea katoa ne fai, e a, e se tusi katoa i te tusi o tala fakasolopito i taimi o tupu o Iuta?+  Tenā ne takato ifo ei a Ieoiakimo o malō‵lo fakatasi mo ana tupuga;+ kae ko tena tama tagata ko Ieoiakini ne fai mo tupu e sui ei a ia.  Ne seki toe fano eiloa a te tupu o Aikupito kea‵tea mo tena fenua, me ko oti ne puke ne te tupu o Papelonia a mea katoa a te tupu o Aikupito,+ mai te Vanu o Aikupito+ ke oko ki te Vaitafe ko te Eufilate.+  Ko 18 tausaga o Ieoiakini+ i te taimi ne fai ei a ia mo tupu, kae ne pule a ia i masina e tolu i Ielusalema.+ A te igoa o tena mātua ko Neusita te tama fafine a Elenatano mai Ielusalema.  Ne fai faeloa ne ia a mea ma‵sei i te kilokiloga a Ieova, e ‵tusa mo mea katoa ne fai ne tena tamana. 10  I te taimi tenā, ne o‵mai a tavini a te tupu o Papelonia ko Nepukanesa o taua atu ki Ielusalema, kae ne nikoi i ei te fakai.+ 11  Ne vau a te tupu o Papelonia ko Nepukanesa ki te fakai i te taimi ne nikoi i ei ne ana tavini. 12  Ne fanatu a te tupu o Iuta ko Ieoiakini ki te tupu o Papelonia,+ fakatasi mo tena mātua, ana tavini, ana pelenise, mo ana ofisa;+ kae ne puke fakapagota a ia ne te tupu o Papelonia i te valu tausaga o tena pulega.+ 13  Tenā ne puke mai ei ne ia mai konā a koloa katoa o te fale o Ieova mo koloa o te fale* o te tupu.+ Ne katikati ne ia ki potumea a meāfale aulo katoa kolā ne faite ne Solomona te tupu o Isalaelu i te faletapu o Ieova,+ e pelā eiloa mo te mea ne folafola mai ne Ieova. 14  Ne ave fakapagota ne ia a Ielusalema kātoa, ko pelenise katoa,+ ko toa ‵mafi katoa, mo tufuga faite mea katoa mo tino faite mea ki fiti+—ne ave fakapagota ne ia a tino e toko 10,000. E seai se tino ne tiakina kae na ko toe tino ma‵tiva eiloa o te fenua.+ 15  Ne ave fakapagota ne ia a Ieoiakini+ ki Papelonia;+ ne ave foki ne ia a te mātua o te tupu, avaga a te tupu, ana ofisa, mo toe tāgata tāua o te fenua, ne ave fakapagota ne ia latou mai Ielusalema ki Papelonia. 16  Ne ave fakapagota foki ne te tupu o Papelonia a tāgata ‵toa katoa e toko 7,000 ki Papelonia fakatasi mo tufuga faite mea mo tino faite mea ki fiti e toko 1,000, a latou katoa ne tāgata ‵mafi kae ne akoako mō te taua. 17  Ne fai ne te tupu o Papelonia a Matania, te fakatamana o Ieoiakini,+ mo fai te tupu e sui ei a ia, kae ‵fuli ne ia tena igoa ki a Setekaia.+ 18  Ko 21 tausaga o Setekaia i te taimi ne fai ei a ia mo tupu, kae ne pule a ia i tausaga e 11 i Ielusalema. A te igoa o tena mātua ko Amutala+ te tama fafine a Ielemia mai Lipina. 19  Ne fai faeloa ne ia a mea ma‵sei i te kilokiloga a Ieova, e ‵tusa mo mea katoa ne fai ne Ieoiakimo.+ 20  Ona ko te kaitaua o Ieova ne ‵tupu i ei a mea konei i Ielusalema mo Iuta, ke oko ki te taimi ne ave kea‵tea ei ne ia latou mai ana mua.+ Kae ko Setekaia ne ‵teke atu ki te tupu o Papelonia.+

Fakamatalaga mai lalo

Io me “palesi.”