Te Lua Tupu 23:1-37

  • Fakama‵fuliga ne fai ne Iosia (1-20)

  • Ko fakamanatu te Paseka (21-23)

  • Nisi fakama‵fuliga ne fai ne Iosia (24-27)

  • Te mate o Iosia (28-30)

  • Ioasasa, te tupu Iuta (31-33)

  • Ieoiakimo, te tupu o Iuta (34-37)

23  Ne uga atu te fekau a te tupu, kae fakamaopoopo mai ne latou a toeaina katoa o Iuta mo Ielusalema.+  Oti aka, ne fanatu te tupu ki te fale o Ieova fakatasi mo tāgata katoa o Iuta, tino katoa o Ielusalema, ko faitaulaga, mo pelofeta—ko tino katoa, mai te tamaliki foliki ke oko ki te tino matua. Ne faitau atu ne ia ke lagona ne latou a pati katoa i te tusi+ o te feagaiga+ telā ne maua i te fale o Ieova.+  Ne tu a te tupu i tafa o te pou kae fai ne ia se feagaiga* i mua o Ieova,+ me ka tautali eiloa a ia i a Ieova kae tausi ana fakatonuga, ana fakamasauaga, mo ana tulafono fakavae mo tena loto kātoa mo tena ola* kātoa mai te faiga ne ia o pati katoa i te feagaiga tenei kolā ne tusi i te tusi tenei. Kae ko tino katoa ne lotoma‵lie ki te feagaiga tenā.+  Tenā ne fai ei te fakatonuga a te tupu ki a Hilikia+ te faitaulaga sili, te kau faitaulaga fesoasoani, mo tino tausi mataloa ke aumai ki tua mo te faletapu o Ieova a meāfale katoa kolā ne faite mō Paala, te pou lakau tapu,*+ mo te kautau kātoa o te lagi. Tenā ne ‵sunu ei ne ia a mea konā i tua o Ielusalema i te ‵sifoga o Ketalono, kae ave ne ia olotou lefu ki Peteli.+  Ne afuli kea‵tea ne ia a faitaulaga o atua fakaa‵tea, kolā ne ‵tofi aka ne tupu o Iuta ke fai ne latou ke fanaka te au mai taulaga i luga i koga ma‵luga i fakai o Iuta mo kogā koga i tafa o Ielusalema, fakatasi mo latou kolā e fai ne latou ke fanaka te au mai taulaga ki a Paala, te la, te masina, fakaputuga fetū mo te kautau katoa o te lagi.+  Ne aumai ne ia ki tua a te pou lakau tapu*+ mai te fale o Ieova ki fakai i tua o Ielusalema, ki te Vanu o Ketalono, kae ‵sunu ne ia+ i te Vanu o Ketalono kae tuki ke liu lefu kae ‵ligi atu ana lefu i luga i tanuga o tino.+  Ne ofa foki ne ia ki lalo a fale o tāgata talitāgata o te faletapu,+ kolā ne ‵tu i loto i te fale o Ieova kae ‵laga i ei ne fāfine a faleie tapuaki ki te pou lakau tapu.*  Tenā ne aumai ei ne ia a faitaulaga katoa ki tua mo fakai o Iuta, kae ne fakaseaoga ne ia a koga ma‵luga kolā ne fai i ei ne faitaulaga ke fanaka te au mai taulaga, mai Kepa+ ke oko ki Pelesepa.+ Ne ofa foki ne ia ki lalo a koga ma‵luga o mataloa kolā e ‵tu i te koga e ulu atu ei ki te mataloa o Iosua te takitaki o te fakai, kae e ‵tu i te feitu fakamaui māfai e ulu atu se tino ki loto i te fakai.  A faitaulaga o koga ma‵luga ne seki tavini atu i te fatafaitaulaga o Ieova i Ielusalema,+ kae ne ‵kai latou ki falaoa sē faka‵fete fakatasi mo olotou taina. 10  Ne fakaseaoga foki ne ia a Tofeta,*+ telā e tu i te Vanu o Tama Tāgata a Hinomo,*+ ko te mea ke se mafai ne se tino o ‵sunu a tena tama tagata io me ko tena tama fafine i te afi* e pelā me se taulaga ki a Moleka.+ 11  Kae ne seki talia ne ia a solofanua kolā ne tukugina atu ne tupu o Iuta ki te la ke ulu atu ki loto i te fale o Ieova e auala i te potu* o te ofisa ko Natano-meleke, telā e tu i te fakaosoga; kae ne ‵sunu ne ia a kaliota o te la+ ki te afi. 12  Ne ofa foki ki lalo ne te tupu a fatafaitaulaga kolā ne faka‵tu ne tupu o Iuta i te tuafale+ o te potu tafa ki luga o Aasa, e pelā foki mo fatafaitaulaga kolā ne faka‵tu ne Manase i koga ateatea e lua o te fale o Ieova.+ Ne tuki ne ia a mea konā kae ‵ligi olotou ‵lefu i te Vanu o Ketalono. 13  Kae ne fakaseaoga ne te tupu a koga ma‵luga i mua o Ielusalema i te feitu ki saute* o te Mauga o Fakamaseiga,* kolā ne faite ne Solomona te tupu o Isalaelu ki a Asitate te atua fafine fakatakalialia o tino Saitonu; mo Kemoso te atua fakatakalialia o Moapi; mo Milikoma+ te atua fakatakalialia o tino Amoni.+ 14  Ne ofa likiliki ne ia a pou fatu tapu kae ‵kati ki lalo a pou lakau tapu*+ kae faka‵fonu a koga konā ki ivi o tino. 15  Ne ofa foki ne ia a te fatafaitaulaga i Peteli, te koga maluga ne faite ne Ielopoamo te tama tagata a Nepata telā ne fai ei ke agasala a tino Isalaelu.+ I te otiga ne ofa ki lalo ne ia a te fatafaitaulaga tenā mo te koga maluga, ne ‵sunu ne ia te koga maluga, tuki ke liu lefu, kae ‵sunu te pou lakau tapu.*+ 16  I te ‵fuliatuga a Iosia kae lavea ne ia a tanuga i luga i te mauga, ne fai ne ia ke puke aka a ivi mai tanuga konā kae ‵sunu i luga i te fatafaitaulaga, kae fakaseaoga i ei a te mea tenā mō tapuakiga, e ‵tusa mo pati a Ieova kolā ne folafola mai ne te tagata o te Atua tonu telā ne ‵valo ne ia me ka ‵tupu eiloa a mea konei.+ 17  Tenā ne fai atu ei a ia: “Se a te mā telā e kilo atu au ki ei?” Ne fai atu a tāgata o te fakai ki ei: “Ko te tanuga o te tagata o te Atua tonu mai Iuta+ telā ne ‵valo mai ne ia a mea konei ne fai ne koe ki te fatafaitaulaga o Peteli.” 18  Ne fai atu a ia: “Tuku ei a ia ke malōlō. Seai se tino e fakaga‵sue ne ia ana ivi.” Tenā ne seki fakaga‵sue eiloa ne latou ana ivi, e pelā foki mo ivi o te pelofeta telā ne vau mai Samalia.+ 19  Ne ave foki kea‵tea ne Iosia a fale tapuaki katoa i luga i koga ma‵luga i Samalia,+ kolā ne faite ne tupu o Isalaelu ke fai ei ke kaitaua te Atua, kae ne fai ne ia ki mea konā a te mea ne fai ne ia i Peteli.+ 20  Tenā ne ofo atu ei ne ia i luga i fatafaitaulaga a faitaulaga katoa o koga ma‵luga kolā ne ‵nofo i konā, kae ‵sunu ne ia a ivi o tino i luga i ei.+ Oti aka, toe foki ei a ia ki Ielusalema. 21  Ne fakatonu atu te tupu ki tino katoa: “Fai se Paseka+ ki a Ieova te otou Atua e pelā mo te mea e tusi i te tusi tenei o te feagaiga.”+ 22  E seki ai eiloa se Paseka penei kai fai talu mai a aso ne fai ei ne famasino a fakamasinoga i Isalaelu io me i aso katoa o tupu o Isalaelu mo tupu o Iuta.+ 23  Kae i te 18 o tausaga o te pulega a te Tupu ko Iosia, ne fai ei te Paseka tenei ki a Ieova i Ielusalema. 24  Ne ave kea‵tea foki ne Iosia a tino e fesokotaki mo agaga, tino fakamatala mea ‵tupu,+ telafimi faite,*+ tupua fakatakalia‵lia,* mo mea fakatakalia‵lia katoa kolā ne ‵sae aka i te fenua o Iuta mo Ielusalema, ko te mea ke fakataunu i ei a pati i te Tulafono+ kolā ne tusi i te tusi telā ne maua ne Hilikia te faitaulaga i te fale o Ieova.+ 25  E seai se tupu mai mua atu i a ia e ‵pau mo ia, telā ne foki ki a Ieova mo tena loto kātoa mo tena ola*+ kātoa mo tena malosi kātoa, e ‵tusa mo te Tulafono a Mose; e seai foki se tino e ‵pau mo ia ne sae aka i ana tua. 26  E se gata i ei, ne seki fulitua eiloa a Ieova mai tena kaitaua telā e ‵ka pelā me se afi ki tino Iuta ona ko mea ma‵sei katoa ne fai ne Manase ke kaitaua a Ia.+ 27  Muna a Ieova: “Ka ave foki ne au a Iuta kea‵tea mai oku mua,+ e pelā eiloa mo te avega kea‵tea ne au a Isalaelu;+ kae ka ‵teke ne au te fakai tenei ne filifili ne au, ko Ielusalema, mo te fale telā ne fai atu ei au, ‘A toku igoa ka maua faeloa i te koga tenā.’”+ 28  Kae ko te tala fakasolopito kātoa o Iosia, ana mea katoa ne fai, e a, e se tusi katoa i te tusi o tala fakasolopito i taimi o tupu o Iuta? 29  I ana aso, ne vau a te Falao ko Neko te tupu o Aikupito o fakafetaui ki te tupu o Asulia i te Vaitafe ko te Eufilate, kae ne fanatu a te Tupu ko Iosia o taua atu ki a ia; kae i te laveaga ne Neko a ia, tamate ei ne ia tou tagata i Mekito.+ 30  Ne ave tena foitino ne ana tavini i se kaliota mai Mekito o avatu ki Ielusalema kae tanu a ia i tena tanuga. Tenā ne puke ei ne tino o te fenua a Ioasasa te tama tagata a Iosia kae ‵tofi a ia ke fai mo tupu e sui ei tena tamana.+ 31  Ko 23 tausaga o Ioasasa+ i te taimi ne fai ei a ia mo tupu, kae ne pule a ia i masina e tolu i Ielusalema. A te igoa o tena mātua ko Amutala+ te tama fafine a Ielemia mai Lipina. 32  Ne kamata o fai ne ia a mea ma‵sei i te kilokiloga a Ieova, e ‵tusa mo mea katoa kolā ne fai ne ana tupuga.+ 33  Ne ‵loka a ia ne te Falao ko Neko+ i Lipila+ i te fenua ko Hamata ke mo a ma pule atu a ia ki Ielusalema, kae fai ne ia ke ‵togi mai ne te fenua a te lotou sala e 100 taleni* siliva mo te taleni aulo e tasi.+ 34  E se gata i ei, ne fai ne te Falao ko Neko a Eliakimo te tama tagata a Iosia mo fai te tupu e sui ei a Iosia tena tamana kae ‵fuli tena igoa ki a Ieoiakimo; kae ne puke ne ia a Ioasasa o aumai ki Aikupito,+ telā ne mate fakamuli a ia i ei.+ 35  Ne avatu ne Ieoiakimo a siliva mo aulo konā ki te Falao, kae ne fai ne ia ke ‵tae a lafoga mai te fenua ke avatu a siliva kolā e manako ki ei te Falao. Ne puke mai ne ia se aofaki mautinoa o siliva mo aulo mai tino taki tokotasi o te fenua ke tuku atu ki te Falao ko Neko. 36  Ko 25 tausaga o Ieoiakimo+ i te taimi ne fai ei a ia mo tupu, kae ne pule a ia i tausaga e 11 i Ielusalema.+ A te igoa o tena mātua ko Sepita te tama fafine a Petaia mai Luma. 37  Ne fai faeloa ne ia a mea ma‵sei i te kilokiloga a Ieova,+ e ‵tusa mo mea katoa ne fai ne ana tupuga.+

Fakamatalaga mai lalo

Io me “fakafou te feagaiga.”
Onoono ki te FP.
Onoono ki te FP.
Onoono ki te FP.
Onoono ki te FP.
Se koga i tua o Ielusalema telā e ofo atu i ei ne tino Isalaelu ‵teke a olotou tama‵liki e pelā me ne taulaga.
Onoono ki te FP, “Kena.”
Epelu, “ave i loto i te afi.”
Io me “potu ‵kai.”
Epelu, “fakaatamai.” Telā ko te feitu ki saute māfai a te tino e ‵fuli ki te feitu ki saegala.
Telā ko te Mauga o Olive, maise eiloa ko te mata ki saute telā e lauiloa foki e pelā me ko te Mauga o Agasala.
Onoono ki te FP.
Onoono ki te FP.
Io me “atua o te kāiga; tupua.”
A te pati Epelu e mafai o isi sena sokoga ki te pati “fekau o manu” kae e fakaaoga e pelā me se fakaasiga o te takalialia.
Onoono ki te FP.
A te taleni e ‵pau mo te 34.2 kk. Onoono ki te MF E14.