Te Lua Tupu 22:1-20

  • Iosia, te tupu o Iuta (1, 2)

  • Fakatonuga ki te faka‵leiga o te faletapu (3-7)

  • Ko maua te tusi o te Tulafono (8-13)

  • Te valoaga a Hulita e uiga ki te puapuaga (14-20)

22  Ko valu tausaga o Iosia+ i te taimi ne fai ei a ia mo tupu, kae ne pule a ia i tausaga e 31 i Ielusalema.+ A te igoa o tena mātua ko Ietita te tama fafine a Ataia mai Posikata.+  Ne fai ne ia te mea tonu i te kilokiloga a Ieova kae sasale i auala katoa o Tavita tena tupuga,+ kae ne seki ‵fuli atu a ia ki te feitu fakaatamai io me ko te feitu fakamaui.  I te 18 tausaga o te pulega a te Tupu ko Iosia, ne uga atu ne te tupu a Safana te failautusi, te tama tagata a Asalaia te tama tagata a Mesulama, ki te fale o Ieova,+ ana muna:  “Fano ki a Hilikia+ te faitaulaga sili, kae fai ke ‵tae mai ne ia a tupe katoa kolā ne avatu ki te fale o Ieova,+ kolā ne ‵tae ne tino tausi mataloa mai i tino.+  Fai ke tuku atu a tupe konā ki a latou kolā ne ‵tofi aka ke onoono ki te faiga o te galuega i te fale o Ieova, kae ka tuku atu ne latou ki tino ga‵lue i te fale o Ieova, ko tino kolā e faka‵lei ne latou a mea ma‵sei o* te fale,+  ko tufuga faite mea, ko kamuta, mo tino ‵poto i te faite mea ki fatu; kae e ‵tau o fakaaoga ne latou mo ‵togi a laupapa kae ‵kati a fatu mo faka‵lei te fale.+  E se manakogina ke fakamasino latou ona ko tupe kolā ne tuku atu ki a latou, me i a latou e fakatuagagina.”+  Fakamuli ifo, ne fai atu a Hilikia te faitaulaga sili ki a Safana te failautusi:+ “Ko oti ne maua ne au te tusi o te Tulafono+ i te fale o Ieova.” Tenā ne tuku atu ei ne Hilikia te tusi ki a Safana, telā ne kamata o faitau ki ei.+  Tenā ne fanatu ei a Safana te failautusi ki te tupu kae fai atu ki ei: “Ko oti ne ‵ligi ki tua ne tau tavini a tupe kolā ne maua i te fale, kae ko oti ne tuku atu ne latou ki tino kolā ne ‵tofi aka ke onoono ki te faiga o te galuega i te fale o Ieova.”+ 10  Ne fai atu foki a Safana te failautusi ki te tupu: “E isi se tusi+ ne tuku mai ne Hilikia te faitaulaga ki a au.” Tenā ne kamata ei o faitau ne Safana i mua o te tupu. 11  I te taimi eiloa ne lagona ei ne te tupu a pati i te tusi o te Tulafono, ne saesae ne ia ana gatu.+ 12  Tenā ne tuku atu ei ne te tupu a te fakatonuga tenei ki a Hilikia te faitaulaga, Aikamo+ te tama tagata a Safana, Akopa te tama tagata a Mikaio, Safana te failautusi mo Asaia te tavini a te tupu: 13  “Olo o sui au e pelā foki mo tino valevale mo Iuta kātoa kae fesili atu ki a Ieova e uiga ki pati o te tusi tenei ne maua aka; me i te kaitaua o Ieova ki a tatou ko oko loa te lasi,+ me i ‵tou tupuga ne seki faka‵logo ki pati i te tusi tenei mai te tausi ki mea katoa kolā e tusi i ei e uiga ki a tatou.” 14  Tenā ne olo atu ei a Hilikia te faitaulaga, Aikamo, Akopa, Safana mo Asaia ki a Hulita te pelofeta fafine.+ A ia ko te avaga a Saluma te tama tagata a Tikava te tama tagata a Halase, te tino tausi o te sefe gatu, kae ne nofo a ia i te fakai fou o Ielusalema, kae ne fai‵pati atu latou ki tou fafine i konā.+ 15  Ne fai atu tou fafine ki a latou: “Konei a pati ne fai mai ne Ieova te Atua o Isalaelu, ‘Fai ki te tagata ne uga mai ne ia koutou ki a au: 16  “Konei a pati ne fai mai ne Ieova, ‘Ka aumai ne au te puapuaga ki te koga tenei fakatasi mo ana tino, ko pati katoa i te tusi kolā ne faitau ne te tupu o Iuta.+ 17  Me ne tiakina ne latou au kae ko fai nei ke fanaka te au mai olotou taulaga ki nisi atua+ ko te mea ke kaitaua au ki olotou galuega katoa,+ a toku kaitaua ka ‵ka eiloa e pelā me se afi ki te koga tenei kae ka se mafai o tamate.’”+ 18  Kae e pelā mo te tupu o Iuta telā ne uga mai ne ia koutou ke o‵mai o fesili atu ki a Ieova, konei otou pati e ‵tau o fai ki a ia, “Konei a pati a Ieova te Atua o Isalaelu ne fai mai: ‘E uiga ki pati ne lagona ne koe, 19  ona ko koe ne saga tonu mai mo te loto maulalo+ i mua o Ieova i te lagonaga ne koe a mea ne fai atu ne au e uiga ki te koga tenei mo ana tino—me ka fai latou e pelā me se mea fakamataku kae se fakamalaiaga—kae ne saesae ne koe ou gatu+ kae tagi mautuutu i oku mua, ko oti foki ne lagona ne au koe, ko te folafolaga a Ieova. 20  Tenā te pogai ka fai ei ne au ke fakatasi atu koe ki ou tupuga,* kae ka takato koe i loto i tou tanuga mo te filemu, kae ka se lavea ne koe ki ou mata a puapuaga katoa kolā ka aumai ne au ki te koga tenei.’”’” Tenā ne aumai ei ne latou a te tali ki te tupu.

Fakamatalaga mai lalo

Io me “koga mafa‵fa i loto i.”
A te mea tenei se tugapati fakauiga telā e fakasino atu ki te mate.