Te Lua Tupu 21:1-26

  • Manase, te tupu o Iuta; ana toto ne fakama‵ligi (1-18)

    • Ielusalema ko ‵tau o fakaseai (12-15)

  • Amone, te tupu o Iuta (19-26)

21  Ko 12 tausaga o Manase+ i te taimi ne fai ei a ia mo tupu, kae ne pule a ia i tausaga e 55 i Ielusalema.+ A te igoa o tena mātua ko Hefesipa.  Ne fai ne ia a mea ma‵sei i te kilokiloga a Ieova, mai te tautali atu i faifaiga fakatakalia‵lia a atufenua+ kolā ne afuli kea‵tea ne Ieova i mua o tino Isalaelu.+  Ne toe faite ne ia a koga ma‵luga kolā ne fakaseai ne tena tamana ko Hesekia,+ kae ne faka‵tu ne ia a fatafaitaulaga ki a Paala kae faite se pou lakau tapu,*+ e pelā mo te mea ne fai ne Aapo te tupu o Isalaelu.+ Kae ne ifo a ia ki te kautau kātoa o te lagi kae tavini atu ki a latou.+  Ne faite foki ne ia a fatafaitaulaga i te fale o Ieova,+ telā ne fai mai ei a Ieova: “A toku igoa ka tuku ne au i Ielusalema.”+  Kae ne faite ne ia a fatafaitaulaga ki te kautau kātoa o te lagi+ i koga ateatea e lua i te fale o Ieova.+  Kae ne ‵sunu ne ia tena tama tagata i te afi;* ne fai ne ia a faifaiga faivailakau, ne ‵sala ki fakailoga o mea ka ‵tupu,+ kae ‵tofi aka ne ia a tino e fesokotaki mo agaga mo tino fakamatala mea ‵tupu i aso mai mua.+ Ne fai ne ia a mea matagā e uke i te kilokiloga a Ieova, telā ne fai ei ke kaitaua a ia.  Ne tuku ne ia te tupua o te pou lakau tapu*+ telā ne faite ne ia ki loto i te fale telā ne fai atu a Ieova ki a Tavita mo tena tama tagata ko Solomona: “I loto i te fale tenei mo Ielusalema, kolā ne filifili ne au mai matakāiga katoa o Isalaelu, ka tuku ne au i ei toku igoa ki te se-gata-mai.+  Kae ka se toe fai eiloa ne au a vae o Isalaelu ke sasale kea‵tea mai te laukele ne tuku atu ne au ki olotou tupuga,+ māfai fua e faka‵logo faka‵lei latou ki mea katoa kolā ne fakatonu atu ne au ki a latou,+ ko te Tulafono kātoa telā ne fakatonu atu ne taku tavini ko Mose ke tau‵tali latou i ei.”  Kae ne seki faka‵logo latou, kae ne tumau eiloa a Manase i te takitaki ‵se ne ia latou, kae fai ne ia latou ke sili atu te matagā o olotou mea e fai i lō atufenua kolā ne ‵ta fakapalele ne Ieova i mua o tino Isalaelu.+ 10  Kae ne faipati atu faeloa a Ieova e auala i ana tavini ko te kau pelofeta,+ ana muna: 11  “Ne fai ne Manase te tupu o Iuta a mea fakatakalia‵lia katoa konei; e sili atu te ma‵sei o ana mea ne fai i lō tino Amoli katoa+ mai mua atu i a ia,+ kae ne fai ne ia ke agasala a Iuta i ana tupua fakatakalia‵lia.* 12  Tela la, konei a pati ne fai mai ne Ieova te Atua o Isalaelu: ‘Ko aumai nei ne au se fakalavelave ki luga i Ielusalema+ mo Iuta telā ka fai ei a te avā taliga o so se tino telā e lagona ne ia ke ‵ki.+ 13  Kae ka ‵futi ne au te uka i luga i Ielusalema+ telā ne fua ki ei a Samalia+ kae fakaaoga te levolo telā ne fakaaoga i te fale o Aapo,+ kae ka ‵fulu ne au a Ielusalema ke ‵ma, e pelā eiloa mo te tino e ‵fulu ne ia se pōla ke ‵ma, e ‵solo ne ia kae ‵fuli ki lalo.+ 14  Ka tiaki ne au te ‵toega o toku tofi+ kae tuku atu ki lima o olotou fili, kae ka ave fakapagota latou kae ka kaisoa olotou mea ne olotou fili katoa,+ 15  me ne fai ne latou a mea ma‵sei i taku kilokiloga kae ne tumau i te faiga ke kaitaua au mai te aso ne o‵mai ei ki tua olotou tupuga mai Aikupito ke oko mai ki te aso nei.’”+ 16  Ne fakamaligi foki ne Manase a toto o tino e tokouke kolā e seai ne olotou ‵se ke oko eiloa ki te taimi ko ‵fonu ei a Ielusalema mai te mata e tasi ke oko ki te suā mata,+ i tafa o tena agasala ko te faiga o tino Iuta ke agasala mai te faiga o mea ma‵sei i te kilokiloga a Ieova. 17  Kae ko te tala fakasolopito kātoa o Manase mo ana mea katoa ne fai mo agasala ne fai ne ia, e a, e se tusi katoa i te tusi o tala fakasolopito i taimi o tupu o Iuta? 18  Tenā ne takato ifo ei a Manase o malō‵lo fakatasi mo ana tupuga kae ne tanu i te fatoaga o tena fale, i te fatoaga o Usaa;+ kae ko tena tama tagata ko Amone ne fai mo tupu e sui ei a ia. 19  Ko 22 tausaga o Amone+ i te taimi ne fai ei a ia mo tupu, kae ne pule a ia i Ielusalema i tausaga e lua.+ A te igoa o tena mātua ko Mesulemeta te tama fafine a Halusa mai Iotipa. 20  Ne tumau a ia i te faiga o mea ma‵sei i te kilokiloga a Ieova, e pelā eiloa mo mea ne fai ne tena tamana ko Manase.+ 21  Ne tumau a ia i te sasale i auala katoa ne sasale i ei tena tamana, kae ne tavini kae ifo faeloa a ia ki tupua fakatakalia‵lia kolā ne tavini ki ei tena tamana.+ 22  Ne tiaki ne ia a Ieova te Atua o ana tupuga, kae ne seki sasale a ia i te auala o Ieova.+ 23  Fakamuli ifo, ne fai ne tavini a Amone se togafiti o ‵teke atu ki a ia kae ne tamate ne latou te tupu i tena fale eiloa. 24  Kae ko tino o te fenua ne ‵ta ne latou a tino katoa kolā ne fai te lotou togafiti o ‵teke te Tupu ko Amone, kae ne fai ne latou a tena tama tagata ko Iosia ke fai mo tupu e sui ei a ia.+ 25  Kae ko te tala fakasolopito kātoa o Amone mo ana mea ne fai, e a, e se tusi katoa i te tusi o tala fakasolopito i taimi o tupu o Iuta? 26  Ne tanu ne latou a ia i tena tanuga i te fatoaga o Usaa,+ kae ko tena tama tagata ko Iosia+ ne fai mo tupu e sui ei a ia.

Fakamatalaga mai lalo

Onoono ki te FP.
Epelu, “ave i loto i te afi.”
Onoono ki te FP.
A te pati Epelu e mafai o isi sena sokoga ki te pati “fekau o manu” kae e fakaaoga e pelā me se fakaasiga o te takalialia.