Te Lua Tupu 20:1-21

  • Te masaki o Hesekia mo tena faka‵leiga (1-11)

  • Ave fekau mai Papelonia (12-19)

  • Te mate o Hesekia (20, 21)

20  I aso konā a Hesekia ne masaki kae toeitiiti eiloa ko mate.+ Ne vau a te pelofeta ko Isaia te tama tagata a Amota kae fai atu ki a ia, “Konei a pati a Ieova ne fai mai: ‘Tuku atu a fakatonuga ki tou kaufale, me i a koe ka mate; a koe ka se toe ‵lei.’”+  I konā loa, ne ‵fuli atu ana mata ki te ‵pui kae kamata o ‵talo ki a Ieova:  “Ko akai atu au ki a koe e Ieova, fakamolemole, ke masaua ne koe te auala ne sasale ei au i ou mua mo te fakamaoni mo te loto kātoa, kae ne fai ne au a mea ‵lei i tau kilokiloga.”+ Kae ne kamata a Hesekia o tagi malosi.  Ne seki oko atu a Isaia ki te kogaloto o te koga ateatea kae oko mai te fekau a Ieova ki a ia, ana muna:+  “Toe foki o fai ki a Hesekia, te takitaki o oku tino, ‘Konei a pati a Ieova te Atua o Tavita tou tupuga ne fai mai: “Ko oti ne lagona ne au tau ‵talo. Ko oti foki ne lavea ne au ou loimata.+ Ko faka‵lei ne au koe i te taimi nei.+ I te tolu o aso ka fano ei koe ki te fale o Ieova.+  Ka fakaopoopo atu ne au e 15 tausaga ki tou olaga, kae ka fakasao ne au koe mo te fakai tenei mai lima o te tupu o Asulia,+ kae ka ‵pulu ne au te fakai tenei ona ko au kae ona foki ko taku tavini ko Tavita.”’”+  Tenā ne fai atu ei a Isaia: “Aumai se keke o mati ma‵lō.” Ne aumai ne latou te keke kae tuku atu ki luga i te fakafoa, oti aka ko te mea loa ko kamata o ‵lei tou tagata.+  Ne fesili atu a Hesekia ki a Isaia: “Se a te fakailoga+ e fakaasi mai ei me ka faka‵lei au ne Ieova kae ka fano au i te tolu o aso ki te fale o Ieova?”  Ne tali atu a Isaia: “Tenei te fakailoga mai i a Ieova e fakaasi atu i ei ki a koe me ka fakataunu ne Ieova ana pati ne fai: E a, e manako koe ko te ata i luga i te kakega* ke gasue ki mua i sitepu e sefulu io me gasue ki tua i sitepu e sefulu?”+ 10  Muna a Hesekia: “Se mea faigofie fua ke gasue te ata ki mua i sitepu e sefulu kae e faigata ke gasue ki tua i sitepu e sefulu.” 11  Tenā ne kalaga atu ei a te pelofeta ko Isaia ki a Ieova, kae ne fai ne Ia a te ata i luga i te kakega o Aasa ke gasue ki tua i sitepu e sefulu i te taimi ko oti ei ne fanaifo i sitepu konā.+ 12  I te taimi tenā, a te tupu o Papelonia ko Pelotaka-palatana te tama tagata a Palatana, ne avatu ne ia a tusi mo se meaalofa ki a Hesekia, me ne logo a ia i a Hesekia e masaki.+ 13  Ne talimalo ne Hesekia a latou kae fakaasi atu ki a latou a tena fale ‵teu koloa kātoa+—ko siliva, aulo, te sinu pasama mo nisi sinu tāua, ana meatau, mo mea katoa kolā e mafai o maua i loto i ana fale koloa. E seai eiloa se mea ne seki fakaasi atu ne Hesekia ki a latou i loto i tena fale* mo tena malo kātoa. 14  Oti aka, ne vau a te pelofeta ko Isaia ki a Hesekia kae fesili atu ki ei: “Ne a pati ne fai mai ne tāgata konei, kae ne o‵mai latou mai fea?” Ne fai atu a Hesekia: “Ne o‵mai latou mai se fenua ‵mao, mai Papelonia.”+ 15  Ne toe fesili atu a ia: “Ne a olotou mea ne lavea i tou fale?”* Ne tali atu a Hesekia: “Ne lavea ne latou a mea katoa i toku fale.* E seai se mea e seki fakaasi atu ne au ki a latou mai toku fale ‵teu koloa.” 16  Ne fai atu a Isaia ki a Hesekia: “Fakalogo mai ki pati a Ieova,+ 17  ‘Kiloke! Ka oko mai a aso, kae ko mea katoa i loto i tou fale* mo mea katoa ne ‵teu ne ou tupuga ke oko mai ki te aso nei ka ave katoa ki Papelonia.+ Ka seai se mea e ‵toe,’ ko pati a Ieova. 18  ‘Kae ko nisi tama tāgata a koe kolā ka ‵tupu mai i a koe ka ave kea‵tea+ kae ka fai e pelā me ne ofisa i te palesi o te tupu o Papelonia.’”+ 19  Ne fai atu a Hesekia ki a Isaia: “E ‵lei eiloa a pati a Ieova konā ne fai mai ne koe.”+ Tenā ne toe fakaopoopo atu ei a ia: “E ‵lei māfai e isi se filemu mo te tokagamalie* i te vaitaimi e ola ei au.”*+ 20  Kae ko te tala fakasolopito kātoa o Hesekia, tena malosi katoatoa mo te auala ne fai ei ne ia te vai+ mo te alavai kae aumai ne ia a vai ki loto i te fakai,+ e a, e se tusi katoa i te tusi o tala fakasolopito i taimi o tupu o Iuta? 21  Tenā ne takato ifo ei a Hesekia o malō‵lo fakatasi mo ana tupuga;+ kae ko tena tama tagata ko Manase+ ne fai mo tupu e sui ei a ia.+

Fakamatalaga mai lalo

Kāti a kakega konei ne fakaaoga ke lau ki ei te taimi, e pelā mo itula mua kolā ne iloa ei te taimi ona ko te ata o te la.
Io me “palesi.”
Io me “palesi.”
Io me “palesi.”
Io me “palesi.”
Io me “munatonu.”
Epelu, “aso.”