Te Lua Tupu 2:1-25

  • Ko avaka a Elia i te vaeosio (1-18)

    • Ko maua ne Elisaia te gatu fakapelofeta o Elia (13, 14)

  • Ko faka‵lei ne Elisaia te vai i Ieliko (19-22)

  • Ko tamate a tama‵liki tāgata ne pea i Peteli (23-25)

2  I te taimi ko pili ei o ave ne Ieova a Elia+ ki te lagi i se vaeosio,+ a Elia mo Elisaia+ ne olo atu mai Kilikala.*+  Ne fai atu a Elia ki a Elisaia: “Nofo i konei, fakamolemole, me i a Ieova ko uga ne ia au ke fano ki Peteli.” Kae ne fai atu a Elisaia: “E pelā eiloa mo Ieova e ola kae pelā foki mo koe e ola, ka se tiaki ne au a koe.” Tenā ne olo atu ei lāua ki Peteli.+  Ne o‵mai ki tua a tama tāgata a pelofeta* i Peteli ki a Elisaia kae fai atu ki ei: “E iloa ne koe me i te aso nei ka ave kea‵tea ne Ieova a tou matai mai te fai e pelā me se pule ki luga i a koe?”+ Ne fai atu a ia: “E iloa ne au. Sa faipati.”  Ne fai atu a Elia ki a ia: “Elisaia, nofo i konei, fakamolemole, me i a Ieova ko uga ne ia au ke fano ki Ieliko.”+ Kae ne fai atu a ia: “E pelā eiloa mo Ieova e ola kae pelā foki mo koe e ola, ka se tiaki ne au a koe.” Tenā ne olo atu ei lāua ki Ieliko.  Ne olo atu a tama tāgata a pelofeta i Ieliko ki a Elisaia kae fai atu ki ei: “E iloa ne koe me i te aso nei ka ave kea‵tea ne Ieova a tou matai mai te fai e pelā me se pule ki luga i a koe?” Ne fai atu a ia: “E iloa ne au. Sa faipati.”  Ne fai atu a Elia ki ei: “Nofo i konei, fakamolemole, me i a Ieova ko uga ne ia au ke fano ki te Iolitana.” Kae ne fai atu a ia: “E pelā eiloa mo Ieova e ola kae pelā foki mo koe e ola, ka se tiaki ne au a koe.” Tenā ne olo ei lāua.  Kae ne olo atu a tama tāgata e toko 50 a pelofeta o ‵tu mai i se koga ‵mao o kilo‵kilo atu ki a lāua, kae ko lāua e ‵tu i te Iolitana.  Tenā ne puke ei ne Elia tena gatu fakapelofeta+ kae pelu ne ia kae ‵kini a te vai, kae ne mavaelua te vai ki te feitu fakamaui mo te feitu fakaatamai, olo atu ei lāua ki te suā feitu i luga i te laukele malō.+  I te okoga a lāua ki te suā feitu, ne fai atu a Elia ki a Elisaia: “Fai mai so se mea e manako koe ke fai ne au koi tuai o ave au kea‵tea.” Tenā ne fai atu ei a Elisaia: “Fakamolemole, e mafai o tuku mai ki a au ne vaega e lua+ o te agaga o te Atua telā ne tuku atu ki a koe?”+ 10  Ne tali atu a ia: “Ko oko loa i te faigata te mea ne fakamolemole mai koe ki ei. Kafai e lavea ne koe au i te taimi ko ave ei au kea‵tea mai i a koe, ka tupu eiloa te mea tenā ki a koe; kae kafai e se lavea ne koe, ka se tupu eiloa te mea tenā.” 11  I te taimi ne sa‵sale atu ei lāua kae sautala, ne ‵vae fakavave lāua ne se kaliota afi mo solofanua afi,+ kae ne masagi aka a Elia ki te lagi i loto i te vaeosio.+ 12  Ne kilo atu eiloa a Elisaia kae tagi: “Toku tamana, toku tamana! Te kaliota a Isalaelu mo ana tāgata faka‵tele solofanua!”+ I te taimi ko se mafai ei o lavea ne ia tou tagata, ne puke a ia ki ana gatu kae ‵sae ki vaega e lua.+ 13  Oti aka, puke ei ne ia te gatu fakapelofeta+ o Elia telā ne tō kea‵tea kae toe foki o tu i te kaugutu o te Iolitana. 14  Tenā ne puke ei ne ia te gatu fakapelofeta o Elia telā ne tō kea‵tea kae ‵kini ki ei a te vai kae fai atu: “Tefea a Ieova, te Atua o Elia?” I te ‵kiniga ne ia te vai, ne mavaelua ki te feitu fakamaui mo te feitu fakaatamai, tenā ne fanatu ei a Elisaia ki te suā feitu.+ 15  I te laveaga ne tama tāgata a pelofeta i Ieliko a ia mai se koga ‵mao, ne fai aka latou: “A te agaga o Elia ko nofo mo Elisaia.”+ Tenā ne olo atu ei latou o fakafetaui ki a ia kae ifo ki te laukele i ana mua. 16  Ne fai atu latou ki a ia: “Konei a tāgata fakatuagagina e toko 50 fakatasi mo au tavini. Tuku atu latou ke olo, fakamolemole, o ‵sala mai tou matai. E se taumate ne sau aka a ia ne te agaga* o Ieova kae ‵pei ifo ki se mauga io me ki se vanu e tasi.”+ Kae ne fai atu a ia: “Sa uga atu latou.” 17  Kae ne finau atu faeloa latou ki a ia ke oko ki te taimi ko mā ei a ia, fai atu ei: “Uga atu latou.” Ne uga ne latou a tāgata konā e toko 50, kolā ne salasala faeloa ki a ia i aso e tolu kae seki maua ne latou a ia. 18  I te lotou ‵fokimaiga ki a ia, kae ko nofo tou tagata i Ieliko.+ Tenā ne fai atu ei a ia ki a latou: “E a, e seki fai atu au ke se olo koutou?” 19  Fakamuli ifo, ne fai atu a tāgata o te fakai ki a Elisaia: “E lavea ne toku matai me e ‵lei te koga e tu ei te fakai;+ kae ko te vai ko oko eiloa i te masei, kae fai ei a manafa ke se ‵fua mai.”* 20  Ne fai atu a ia: “Aumai se pōla foliki kae fou kae tuku a masima ki loto i ei.” Tenā ne avatu ei ne latou ki a ia. 21  Ne fanatu a ia ki te vai kae ‵pei atu a masima ki loto i ei+ kae fai atu: “Konei a pati a Ieova ne fai mai, ‘Ko oti ne faka‵lei ne au te vai tenei. Ka se toe māfua mai i ei te mate io me ko te se fa‵nau o fāfine.’” 22  Kae ne ‵lei eiloa te vai ke oko mai ki te aso nei e ‵tusa eiloa mo pati a Elisaia ne fai. 23  Ne fanaka a ia mai konā ki Peteli. I tena auala o fano, ne ‵mai a tamā tama‵liki tāgata mai te fakai kae kamata o fakaitaita atu ki a ia,+ kae fai atu faeloa ki a ia: “Ulu tula, fano kea‵tea mai konei! Ulu tula, fano kea‵tea mai konei!” 24  Ne mafuli mai a ia kae kilo atu ki a latou kae fakamalaia ne ia latou i te igoa o Ieova. Tenā ne o‵mai ei a pea fāfine e lua+ mai te vao kae saesae likiliki ne lāua a tama‵liki e toko 42.+ 25  Kae ne fano eiloa a ia mai konā ki te Mauga o Kalamelu,+ kae mai konā ne foki ei a ia ki Samalia.

Fakamatalaga mai lalo

E se ko Kilikala telā e pili ki Ieliko kae ko Kilikala telā e tu i te koga maugā e pili ki Peteli.
“Tama tāgata a te kau pelofeta” e mafai o fakasino atu ki se akoga e akoako ei a pelofeta io me ki se potukau o pelofeta.
Io me “matagi.”
Io me kāti, “e fai i ei ke ‵to a pepe.”