Te Lua o Tusi ki a Timoteo 1:1-18

  • Alofaaga (1, 2)

  • Fakafetai a Paulo ki te Atua mō te fakatuanaki o Timoteo (3-5)

  • Ke faka‵ka e pelā me se afi a te meaalofa a te Atua (6-11)

  • Tausi faeloa a pati aoga (12-14)

  • Fili mo taugasoa o Paulo (15-18)

1  Au ko Paulo, se apositolo a Keliso Iesu e auala i te loto o te Atua e ‵tusa mo te folafolaga e uiga ki te ola telā e auala mai i a Keliso Iesu,+  ki a Timoteo, taku tama pele:+ Ke i luga i a koe te alofa tauanoa, te alofa fakamagalo, mo te filemu mai te Atua te Tamana mo Keliso Iesu te ‵tou Aliki.  E fakafetai au ki te Atua, telā e avatu ne au ki ei te taviniga tapu e pelā eiloa mo te mea ne fai ne oku tupuga, mo se loto lagona ‵ma, kae e masaua faeloa ne au koe i aku talosaga i po mo ao.  I te taimi e masaua ei ne au ou loimata, ko oko eiloa i toku manako ke lavea ne au a koe, ko te mea ke ‵fonu toku loto i te fiafia.  Me e masaua ne au tou fakamaoni i tou fakatuanaki,+ telā ne maua muamua ne tou tupuna fafine ko Loise mo tou mātua ko Eunike, kae e talitonu au me tenā foki ko maua ne koe.  Ko te pogai eiloa tenei e fakamasaua atu ei au ke faka‵ka ne koe e pelā me se afi, te meaalofa a te Atua tenā i a koe e auala i te fakaekeatuga o oku lima ki luga i a koe.+  Me ne seki tuku mai ne te Atua ki a tatou te agaga o te mata mataku,+ kae ko te ‵mana+ mo te alofa mo te mafaufau ‵lei.  Tela la, ke mo a koe e mā i te molimau atu e uiga ki te ‵tou Aliki,+ io me ki a au, te pagota ona ko ia, kae ke fai tou tusaga i te logo‵mae i mea faiga‵ta+ mō te tala ‵lei mai te fakalagolago ki te ‵mana o te Atua.+  Ne faka‵sao kae kalagagina ne ia tatou ki te kalagaga tapu,+ e se ona ko ‵tou galuega, kae ona ko tena fuafuaga mo te alofa tauanoa.+ Ne tuku mai ki a tatou a te mea tenei i te ‵kau fakatasi mo Keliso Iesu i taimi ko ‵teka, 10  kae nei la, ko oti ne fakamaina faka‵lei mai te mea tenā e auala i te fakaasimaiga o te ‵tou Fakaola, ko Keliso Iesu,+ telā ne fakaseai ne ia te mate+ kae fakamaina atu te mainaga ki luga i te ola+ mo te foitino telā e se mafai o pala+ e auala i te tala ‵lei,+ 11  telā ne fakaeke ei au ke fai mo fai se tino talai, se apositolo mo se faiakoga.+ 12  Tenei te pogai e logo‵mae ei au i mea konei,+ kae ko au e se mā i ei.+ Me e iloa ne au a te Atua telā e talitonu au ki ei, kae e talitonu au me e mafai o puipui ne ia te mea telā ne tuku atu ne au ki a ia ke oko eiloa ki te aso tenā.+ 13  Tausi faeloa ki te tulaga* o pati aoga*+ kolā ne lagona ne koe mai i a au fakatasi mo te fakatuanaki mo te alofa kolā ne māfua mai i te ‵kau fakatasi mo Keliso Iesu. 14  Ke puipui te mea tāua tenei e auala i te agaga tapu telā e nofo i loto i a tatou.+ 15  E iloa ne koe te mea tenei, me i tāgata katoa i te kogā fenua o Asia+ ko oti ne fulitua mai ki a au, e aofia i ei a Fogelu mo Hemokene. 16  Ke i luga i te kaufale o Onesefolo te alofa fakamagalo o te Aliki,+ me ne fakamalosi mai faeloa a ia ki a au, kae e se mā tou tagata i oku pikifao i te falepuipui. 17  I lō te mā i a au, ne ‵sala malosi a ia ki a au i te taimi ne nofo ei a ia i Loma kae ne maua ne ia au. 18  Ke talia ne te Aliki ke maua ne ia te alofa fakamagalo o Ieova* i te aso tenā. Kae e iloa ‵lei ne koe ana galuega ‵lei katoa kolā ne fai i Efeso.

Fakamatalaga mai lalo

Io me “fakasologa.”
Io me “‵lei.”
Onoono ki te MF A5.